2 Samuel

David na Israel pavapavana ai ela

5 Bena Israel iduhudia iboudiai na David dekena ela, Heberon ai, eto, Ai na oi turiamu bona oi hidiomu. 2 Nega gunadia ai, Saulo ese e lohiadava negadia ai, oi ese ai Israel taumai o hakaumai lasi bona o hakaumai vareai. Bena Iehova ese e hamaoromu, eto “Oi ese egu bese Israel do ba reḡua, bona pavapavana ai baola”. 3 Taunabunai, Israel tau-badadia iboudiai na hanua pavapavana dekena ela, Heberon ai; bena King David na idia ida e hegwauhamata heheni Heberon ai, Iehova vairanai. Bena idia ese David e horoa, Israel pavapavana ai e halaoa.

4 David ena mauri laḡanidia na toi-ahui, e lohia matama negana ai; ena lohia laḡanidia na hari-ahui. 5 Laḡani hitu hua tauratoi ia ese Iuda iduhuna e lohiaia Heberon ai, ma laḡani toi-ahui toi ia ese Israel idoinai bona Iudea idoinai e lohiadia Ierusalem ai.

David ese Siona e abia

6 Hanua pavapavana na ena tuari taudia ida Ierusalem ela, Iebusu taudia, una tano taudia, bae tuari henidia totona. Idia ese David e hamaoroa, eto, Oi na iniseni ai basio dae kau, a mata-kepulu taudia bona ae-hedairie taudia ese bae laomu ahu. Edia lalo-hadai be David na unuseni ai basine dae kau diba. 7 A David ese Siona kohorona e abia: David ena hanua bunai. 8 Una dina ai David eto, Daika ese Iebusu taudia baine hadareredia, ia na ranu gabuna amo baine dae, ae-hedairike taudia bona mata-kepulu taudia, David laumana ese e inai henidiamu taudia, baine tuari henidia. Unu amo ina hereva e vara: Mata-kepulu taudia bona ae-hedairike taudia na ruma ai basie dae kau. 9 Bena David na una kohoro ai e nohova, ladana e hatoa “David ena hanua”. David ese danu hanua ma e hadaia heḡeḡe, hetoa ladana Milo lalonai. 10 Bena David na e goada e laova, badina be Dirava, Iehova Sabaota, na ia ida.

Hirama bona David

11 Hirama, Turo pavapavana, ese gwaukau taudia na David dekena e siaidia; bona sida audia, bona kamuta taudia, bona nadi-koro taudia. Bena idia ese ruma auta e hadaia, David ena. 12 Bena David lalona e parara Iehova ese vada e haginia, Israel pavapavana, bona ena basileia vada e hadaea herea, ena orea taudia Israel daidiai.

David natuna haida e vara Ierusalem ai

13 David ese hahine haida ma e adavadia, Ierusalem ai, Heberon e rakatania murinai; bena natuna mamaruanedia bona natuna hahinedia haida ma e vara. 14 Natuna Ierusalem ai e vara taudia ladadia bini: Samua, Sobab, Natan, Solomon, 15 Ibihara, Elisua, Nefeg, Iafia, 16 Elisama, Eliada, Elifelete.

David ese Filistia taudia e hadareredia

17 Filistia taudia hari e kamonai David vada e horoa, Israel pavapavana; bena Filistia taudia iboudiai na e tore isi, David itahuna ela. A David e kamonai, bena ena kohoro ela. 18 Filistia taudia na ema, Refaim kourana idoinai e hahonua. 19 Bena David ese Iehova e nanadaia, eto, Bainala, Filistia taudia baina tuari henidia eiava? Imagu ai bavatodia eiava? Iehova ese David e haere henia, eto, Aola: momokani lau ese Filistia taudia na oi imamu ai baina atodia. 20 Bena David na Baal-perasimi ela, unuseni ai e hadareredia. Bena ia eto, Iehova ese lau inaigu vada e haheḡiḡidia dobi, abata ese ḡau ta bema ḡiḡia dobi na heto. Taunabunai, una gabu ladana e hatoa Baal-perasimi.* 21 Filistia taudia ese edia kaivakuku e rakatanidia unuseni ai, bena David bona ena orea taudia ese e haboudia, e huadia lao.

22 Filistia taudia ma ema, Refaim kourana ma e hahonua lou. 23 A David ese Iehova e nanadaia negana ai, Iehova ese e haere henia, eto, Basiola; a ba rakadia heḡeḡe, bona muridia kahana amo ba hahoadia, baka* audia italaidia. 24 Bena reḡe ta baka audia doridia ai ba kamonai, e kara tuari taudia e raka hanaimu reḡedia na heheto, negana ai vada ba raka haraḡa; badina be ba diba, Iehova vada e guna oi vairamu ai, Filistia edia tuari taudia irahu-masedia totona. 25 Bena David ese Iehova ena hahedua heḡereḡerena e karaia; bena ia ese Filistia taudia e rahudia mase, Geba amo ela bona Gesere.