Salamo

40 Iehova na nariava mai haheaukagu ida;

ia ese e igo diho henigu, egu taitai e kamonai.

 2 Ia ese guri dikana amo e verigu lasi,

kopukopu gabuna amo e abigu isi;

aegu na nadi badana latanai e atodia kau,

egu raka e reḡua.

 3 Ia ese ane matamata na udugu ai e atoa,

eda Dirava ihanamolaina anena.

Hutuma bae itaia, bena bae gari,

bona Iehova bae abidadama henia.

 4 Iehova e abidadama heniamu tauna na namo;

ia ese heaḡi taudia se matauraidiamu,

bona dirava koikoidia ilao-henidia totona e raka sirimu taudia se haḡerediamu.

 5 Iehova e, egu Dirava, emu hoa karadia bona ilalolaimai lalo-hadaidia

vada o habada emai ai;

oi na asi idaimu.

Bama gwauraidia bona bama herevalaidia,

to basinama duahidia diba.

 6 Rara boubouna bona flaoa boubouna na so uramu,

a taiagu vada o hakiraradia.

Ḡole-oho boubouna bona kara-dika boubouna

oi ese so gwauraimu.

 7 Bena lau nato “A itaia, na vasimu,

buka ilokuna ta ai vada e torelaigu:

 8 egu Dirava e, oiemu ura ikarana na moalelaiamu,

oiemu taravatu na lalogu ai e miamu”.

 9 Hahemauri sivaraina namona vada na gwauraia,

hebou badana lalonai;

Iehova e, oi dibamu,

bibinagu asina hakapudia.

10 Oiemu kara maoromaoro na lalogu ai asina hunia,

emu heabidadama bona emu hahemauri vada na herevalaidia;

emu hebogahisi bona emu hereva momokani na

hebou badana amo asina hunia.

11 Iehova e, emu hebogahisi na egu amo basio rua;

emu lalokau bona emu heabidadama ese bae reḡugu hanaihanai.

12 Badina be hahedika momo herea vada e ḡeḡegu ahu,

egu kara havara ese vada e lasigu tao,

asi egu dala baina gaga isi;

idia na momo herea, kwaragu huidia na dia hoho;

daragu na e dokomu.

13 Iehova e, mani emu kara ba hamaurigu,

Iehova e, ba durugu haraḡa.

14 Egu mauri iabi ohona dalana e tahuamu taudia na

ba hahemaraidia bona ba haheḡonudia;

ihahisigu e uramu taudia na

ba haloudia bona ba hahemaraidia;

15 e gwau henigumu, e tomu “Aha, aha”, taudia na

edia hemarai dainai bae kudou hetaha.

16 A e tahumumu taudia iboudiai na bae moale,

oi bae moalelaimu.

Emu hahemauri e ura heniamu taudia bae hereva loulou,

baeto “Iehova na herea dae”.

17 Lau be na ogoḡamimu bona na dabumu,

A Ḡaubada ese e lalogumu.

Dirava e, basio halahe;

oi na lau ikahagu bona lau ihamaurigu Diravana.