Evanelia Ioane

Iesu ena toa gini-gunana

2 Dina ihatoina ai headava anibouna ta e karaia, Kana, Galilea hanuana ta, ai. Iesu sinana danu unuseni ai. 2 Bona Iesu mai ena hahediba ida danu e vavedia, una anibou ela.

3 Vine ranuna e ore, bena sinana ese Iesu e hamaoroa, eto, Idia na asi adia vine ranuna. 4 A Iesu ese e haere henia, eto, Hahine e, dahaka dainai lau o hamaorogumu? Egu nega na dohore. 5 Bena sinana ese hesiai taudia e hamaorodia, eto, Baine hamaoromui ḡauna na ba karaia. 6 Unuseni ai nadi hodudia autauratoi hehelai, Iuda taudia edia haheḡoeva karadia daidiai; ta ta anidia na lita sinahuta sisivana. 7 Iesu ese hesiai taudia e haduadia; eto, Hodu na ranu amo a hahonu. Bena e hahonu dae roha. 8 Ma e haduadia, eto, Harihari ba sei, bona ba laohai anibou biaguna dekena. Bena idia ese e laohai. 9 Anibou biaguna ese vine ranuna ai e halaoa ranuna e inua toho; a ia na asi dibana ede amo ema, ranu iseina memerodia sibodia mo mai dibadia. Bena anibou biaguna ese headava matamata tauna e boiria, e hereva henia, eto, 10 Taunimanima iboudiai vine ranuna namo-hereana e nuia diho gunamu, bena ia ese e hakekerodiamu murinai vine ranuna mia-namona e nuia dihomu. To oi ese vine ranuna namo-hereana vada o dogoa tao ema bona harihari. 11 Iesu ena toa ginigunana na ini e hahedinaraia toma, Kana, Galilea kahana, ai e karaia; unu amo ia hairaina e hahedinaraia, bona ena hahediba ese e abidadama henia.

12 Una murinai ia mai sinana ida, bona tadina bona ena hahediba ida, e diho ela Kaperanaum ai, unuseni ai dina dia hoho e nohova.

Ierusalem ai: Lagau-hanai

13 Iuda taudia edia Lagau-hanai Ariana vairadiai e hure negana ai Iesu na Ierusalem ai eha dara dae. 14 Dubu Helaḡa ai boromakau bona mamoe bona pune ihoidia taudia e davaridia, bona moni e senisi taudia danu helaidia ai e davaridia. 15 Bena hekwadi kwanauna e hatua, iboudiai Dubu Helaḡa amo e luludia lasi, mamoe bona boromakau danu. Moni e senisi taudia danu edia moni ia ese e bubu nege, bona edia pata e uhe hebubu. 16 Bena pune ihoidia taudia e gwau henidia, eto, Ene na avabi oho; Tamagu ena ruma na hoihoi rumana ai basio halaoa. 17 Bena ena hahediba vada e helalo une, Buka Helaḡa ai ini e torea toma, eto, Emu ruma iura-henina ese baine hamasegu.

18 Bena Iuda taudia ese e nanadaia, eto, Oi ini o kara tomamu anina be dahaka? Emu siahu toana ba henimai. 19 Iesu ese e haere henidia, eto, Ina Dubu Helaḡa ba rohoa, bena lau ese dina toi lalodiai baina haginia lou. 20 Iuda taudia eto, Ina Dubu Helaḡa na laḡani hari-ahui tauratoi lalodiai e haginia bona e ha-orea, bena oi ese dina toi lalodiai ma ba haginia lou o tomu a? 21 A ia ese tau anina Dubu Helaḡa ida e haheḡereḡerea. 22 Taunabunai, ia na mase amo e tore isi lou negana ai ena hahediba ese una hereva e helalolaia une, ia na unu e gwau toma. Bena idia ese Buka Helaḡa bona iena hahediba herevadia danu vada e abi dae.

23 Iesu Lagau-hanai Ariana dinadia ai Ierusalem ai e nohova negana ai hutuma ese e abiabiraia, e karava toadia e ita daidiai. 24 A Iesu ese idia se abidadama henidia, badina be ia taunimanima iboudiai mai dibana. 25 Bona ta ese taunimanima ta herevana bema hamaorolaia na asi badina, badina be taunimanima lalodia vada e diba vaitani.