Iobu

 2 Au burena na heto e papamu, bena e maraimu;

laulau na heto e lao bubunimu, se miamu.

 3 Unuhetomana na o haḡereamu,

bona o hahemaoro heniamu, a?

 4 Daika ese ḡau ḡoevaḡoevana na ḡau asi ḡoevaḡoevana amo baine havaraia?

Asi tauna ta ese.

 5 Ena dina vada e gwauraidia,

bona ena hua ihagaudia vada o diba;

bona hetoana vada o henia, basine hanaidia;

 6 una dainai iena amo ba roha muri,

bona basio haturiaia,

bena ena nega baine moalelaia,

mai davana e ḡaukaramu tauna na heto.

 7 Badina be au na mai ena mauri dalana;

bae utua kwadogi, bena ma baine tubu lou,

bona tuhutuhuna ma bae gara kau lou.

 8 Ena be ramuna na nega daudau tano ai bema mia,

bona badina na tano ai bema mase,

 9 to ranu bonana baine kamonai, bena tuhutuhuna bae gara,

bona rigina do bae vara, au matamatana na heto.

10 A taunimanima na e masemu, ena goada e oremu;

laḡana e oremu, bena ia be edeseni ai?

11 Gohu ranuna e oremu

bona sinavai na e kororomu na heto,

12 unuhetomana taunimanima na e hekuremu, bena se tore isi loumu;

ia na basine noga lou ela bona guba baine puki,

eiava ena mahuta amo basie haoa diba.

13 Mase gabuna ai boma hunigu,

boma hunigu ela bona emu badu baine ore;

nega korikori boma gwaurai henigu,

bena boma lalogu tao.

14 Tau ta bema mase, ia na baine mauri lou a?

Egu hesiai dinadia iboudiai lalodiai bama henari,

ela bona ikahu-negegu negana bema kau.

15 Boma boiboi, bena bama haere henimu;

oi imamu ḡaukarana boma uralaia lalo-dika.

16 Badina be una negana ai ae-dagagu boma duahidia,

egu kara dika basioma itaia tao;

17 egu kerere na puse lalonai bema hiria ahu,

egu kara havara boma ḡovaia ahu.

18 A ororo na e heḡiḡi dobimu, e dimura-dimuramu;

nadi hagana na ena gabu amo e hevarure ohomu.

19 Ranu ese nadi e arua hehuhu-hehuhumu,

abata ese tano na e ha-arua ohomu,

unuhetomana oi ese taunimanima ena helaro o ha-oreamu.

20 Oi ese o hadarerea hanaihanaiamu, bena e pukimu;

oi ese vairana o ha-idauamu, bena o siaia ohomu.

21 Natuna na dagi namodia e abimu, a ia na asi dibana;

e ogoḡamimu, a ia ese se itadiamu.

22 Ia sibona tau-anina hisihisina e mamiamu,

bona ia sibona taina e taimu.