Kaha 5
Dirava Ena Ura Tanobada ai be Dahaka?
Dahaka dainai Iehova ese tanobada e karaia? (1, 2)
Dahaka dainai harihari tanobada na dia paradaiso? (3)
Kara dika taudia ediai be dahaka baine vara? (4)
Nega vairai, Iesu be dahaka baine kara gorere taudia daidiai? burukadia daidiai? mase taudia daidiai? (5, 6)
Vaira hahenamodia bavabi totona, dahaka ba kara? (7)
1. Iehova ese ina tanobada e karaia, taunimanima ese mai moaledia ida bae noholaia ela bona hanaihanai totona. Ia ena ura na tanobada na hanaihanai kara maoromaoro bona moale taudia ese bema noholaia. (Salamo 115:16; Isaia 45:18) Tanobada na nega ta basie hadikaia ore; ia na baine mia hanaihanai.—Salamo 104:5; Kohelete 1:4.
2. Dirava ese taunimanima do se karadia neganai, Ia ese tanobada kahana marağina ta e abia hidi bena paradaiso mai hairaina ai e halaoa. Ladana e hatoa Eden imeana. Unuseniai ia ese tau bona hahine ginigunadia, Adam bona Eva, e atodia. Dirava ena ura na natudia bae havara, tanobada ibounai bae hahonua. Bena taina ruana, idia ese tanobada ibounai na paradaiso ai bema halaoa.—Genese 1:28; 2:8, 15.
3. Adam bona Eva na e kara dika badina sibodia edia ura ai Dirava ena taravatu e utua. Una dainai Dirava ese Eden imeana murimurinai e atodia. Paradaiso vada e haboioa. (Genese 3:1-6, 23) To, Iehova ese ena ura tanobada ai na se laloaboio. Ia ena gwauhamata na ina tanobada na paradaiso ai baine halaoa, bena taunimanima na unuseniai bae mauri hanaihanai. Ede be havaraia tomamu?—Salamo 37:29.
4. Ina tanobada na paradaiso ai do basinela lalonai, kara dika taudia na do bae hekoki. (Salamo 37:38) Una na Aramagedono, Dirava ese kara dika baine haorea tuarina, ai be varamu. Una murinai, Satana na lağani daha ta bae hadiburaia. Una anina na kara dika taudia ta dia noho tanobada baine hadikaia. Dirava ena taunimanima mo bae roho mauri.—Apokalupo 16:14, 16; 20:1-3.
5. Una nega ai, Iesu Keriso ese lağani daha ta ina tanobada baine lohiaia. (Apokalupo 20:6) Ia ese metairametaira ita darada bona tauanida amo kara dika baine kokia. Ita na taunimanima ğoevadaediai baitala, guna Adam bona Eva do se kara dika ai ğoğoevadae heğereğeredia. Una neganai gorere, buruka, bona mase na ma basie vara lou. Gorere taudia be hanamodiamu, bona buruka taudia na be matamata loumu.—Iobu 33:25; Isaia 33:24; Apokalupo 21:3, 4.
6. Iesu ena Lağani Daha Lohiana lalonai, abidadama taudia na be ğaukaramu ina tanobada ibounai paradaiso ai bainela totona. (Luka 23:43) Mase taudia milioni milioni danu tanobada ai be hatoredia isi loumu. (Kara 24:15) Bema idia na Dirava e uramu karadia bae kara, tanobada ai bae mauri hanaihanai. Bema lasi, baine haoredia vaitani.—Ioane 5:28, 29; Apokalupo 20:11-15.
7. Dirava ena ura ginigunana tanobada ai na una dala amo baine vara ğuğuru. Oi o uramu unu vaira hahenamodia ba davari, a? Bema o tomu oibe, Iehova idibana karana na ba hahesiriua bona ia e uramu karadia ba badina. Iehova ena Witnes taudia edia Kingdom Hall ai e heabimu heboudia ese bae durumu diba unu ba kara toma totona.—Isaia 11:9; Heberu 10:24, 25.
[Picture on page 10]
Paradaiso e haboioa
[Pictures on page 11]
Aramagedono murinai, tanobada na paradaiso ai bae halaoa