Kongrigeisen Elda Taudia Edia Ḡaukara be Dahaka?

Emai orea lalonai pris o unu bamona taudia basio davarimu. To, elda taudia ese ‘Dirava ena kongrigeisen e hakauamu,’ Keristani kongrigeisen e matama neganai e karava bamona. (Kara 20:28, NW ) Unu elda na ‘Dirava ena ura heḡereḡerena; dia gwaugwau amo, a lalodia iha-uradia amo; dia kohu idavarina totona, a lalodia e uramu dainai’ kongrigeisen e reḡuamu. (1 Petro 5:1-3) Idia ese ede e durumai tomamu?

E narimaimu bona e gimamaimu. Elda taudia ese Dirava ena hereva amo kongrigeisen taudia e hakaudiamu bona e durudiamu Iehova bae badinaia totona. E dibamu edia ḡaukara na Dirava amo dainai, edia henari henunai e atodia taudia edia abidadama asie biagumu, to e durudiamu bae noho namonamo o bae moale totona. (2 Korinto 1:24) Mamoe e narimu tauna ese ena mamoe ta ta e dibadiamu bona e reḡudiamu heḡereḡerena, elda taudia danu e uramu kongrigeisen taudia ta ta bae dibadia bona bae reḡudia.—Hereva Lada-isidia 27:23.

Dirava ena ura ikarana dalana e hadibamaimu. Wiki ta ta iboudiai, elda na kongrigeisen heboudia e hakaumu, emai abidadama bae hagoada totona. (Kara 15:32) Danu, haroro ḡaukara e gunalaimu, e bamomaimu, bona haroro daladia idauidau e hadibamaimu.

Ta ta e hagoadamaimu. Elda ese Kingdom Hall ai o emai rumai e vadivadimaimu neganai, Baibel amo e durumaimu bona e hagoadamaimu Iehova baia badinaia totona.—Iakobo 5:14, 15.

Elda momo na dia kongrigeisen mo e nariamu, to edia ruma bese e naridiamu bona moni ḡaukara e karamu. Una dainai, baita matauraidia na namo.—1 Tesalonika 5:12, 13.

• Elda edia ḡaukara be dahaka?

• Elda ese ai ta ta be ede e hagoadamai tomamu?