KAROA 8
Iosia Turana Na Taunimanima Namodia
O laloamu kara namo ikarana be auka, a?— Momo e laloamu una na auka. Baibel ese e hahedinaraiamu mero maraḡina ta ladana Iosia ese kara namo baine karaia na auka. To ia na turana namodia ese e durua. Mani Iosia bona ia turana sivaraidia aita ita.
Iosia tamana Amon na Iuda pavapavana. Ia na tau dikana bona kaivakuku e tomadiho heniva. Iosia tamana e mase neganai, Iosia na Iuda pavapavana ai ela. To una negai ia laḡanina na eit! O laloamu ia be mero dikana tamana heḡereḡerena?— Lasi, ia na mero namona!
Sefania ese taunimanima e hamaorodia kaivakuku basie tomadiho henidia
Ena be Iosia na mero maraḡina, to e urava Iehova baine badinaia. Una dainai, Iehova e lalokau heniava taudia mo e bamodiava. Bona idia ese e durua kara namodia baine kara. Ia turana be daidia?
Ia turana ta na Sefania. Sefania na peroveta tauna, bona ia ese Iuda taudia e hamaorodia bema kaivakuku bae tomadiho henidia, dika bae davari. Iosia ese Sefania ena hereva e kamonai bona Iehova e tomadiho henia, dia kaivakuku.
Iosia turana ma ta na Ieremia. Iosia ida laḡanidia na heḡereḡere, gabu tamona ai e nohova bona e tubu hebou. Edia hebamo na namo herea dainai, Iosia e mase neganai Ieremia ese e laloa momova bena anena ta e karaia. Idia raruosi na e heduru heheniva kara namodia bae kara bona Iehova bae badinaia.
Iosia bona Ieremia na e heduru heheniva kara namodia bae kara
Iosia ena kara amo dahaka ome diba?— Ena be Iosia na mero maraḡina, to ia na e urava kara namodia baine kara. Ia na mai dibana Iehova e lalokau heniamu taudia mo baine bamodia. Namona na oi turamu na Iehova e lalokau heniamu taudia bona oi bae durumu kara namodia ba kara!