Iesu Na Hanaihanai E Kamonaiva

Nega iboudiai tamamu sinamu ikamonai henidia be haraḡa, eiava?​— Nega haida na auka. Oi mai dibamu Iesu na Iehova bona tamana sinana e kamonai henidiava?​— Iena haheitalai ese baine durumu tamamu sinamu ba kamonai henidia, ena be nega haida na auka. Mani Iesu sivaraina aita itaia.

Iesu tanobada do sema, ia na gubai e nohova Tamana Iehova ida. To tanobadai ia na mai tamana bona sinana. Ladadia na Iosef bona Maria. Oi mai dibamu, edena dalai idia na ia tamana sinana ai ela?​—

Iehova ese Iesu ena mauri na guba amo e kokia bena Maria boganai e atoa, Iesu baine vara bona tanobadai baine noho totona. Una na hoa ḡauna! Iesu na Maria bogana ai e tubu, beibi haida heḡereḡeredia. Iesu na hua nain murinai e vara. Unu amo Maria bona adavana Iosef na Iesu tamana bona sinana ai ela.

Iesu laḡanina 12 ai, e karaia ḡauna ta amo ena lalokau Tamana Iehova enai e hahedinaraia. Iesu bona ena ruma bese na Pasova totona Ierusalem ela neganai una kara e vara. Edia hanua e lou laova ai, Iosef bona Maria ese Iesu e tahua to se davaria. O laloamu ia be edeseniai?​—

Dahaka dainai Iesu na dubu helaḡa ai?

Iosef bona Maria na e ḡava lou Ierusalem, gabu iboudiai e hetahu. E wari bada herea badina asie davaria. To dina toi murinai, dubu helaḡa ai e davaria! To dahaka dainai Iesu na dubu helaḡa ai?​— Badina unuseniai Tamana Iehova sivaraina baine dibaia. Iehova e lalokau heniava dainai e urava ihamoalena dalana baine diba. Iesu e bada neganai danu, nega iboudiai Iehova e kamonai heniava, ena be una na auka bona ia na baine hisihisi. Iesu ese Iosef bona Maria danu e kamonai henidia, a?​— Oibe, Baibel na e gwaumu, ia na unu e kara toma.

Iesu ena haheitalai amo dahaka ome diba?​— Namona na tamamu sinamu ba kamonai henidia, ena be nega haida na auka. Oi danu bo kamonaimu?​—