“Taunimanima Iboudiai” Baita Bogadia Hisi

IESU ese ena hahediba ediai sivarai namona iharorolaina dalana e hadibadia neganai, e hamaorodia nega haida taunimanima ese Basileia sivaraina na basie abia daemu. (Luka 10:3, 5, 6) Eda haroro ḡaukara ai, ta davaridiamu taudia haida ese ita na e gwau henidamu bona e badu henidamu. Momokani, unu kara daidiai ta haroro henidiamu taudia baita bogadia hisi na auka.

Hebogahisi tauna ese ma haida edia dabu ḡaudia bona hekwakwanai na e lalopararalaimu, e bogadia hisimu, bona e uramu baine durudia. To, bema haroro ḡaukara ai ta davaridiamu taudia basita bogadia hisimu, eda hesiai ḡaukara urana be maraḡimu bona ma haida na basita durudia dibamu. To, hebogahisi karana baita hahedinaraiamu neganai, una na vaitani au momo ta rakumu lahi baine hururu helaoreana​—eda hesiai ḡaukara urana baita habadaiamu!​—1 Tes. 5:19.

Edena dala ai hebogahisi karana baita hahedinaraia, ena be una na mai hekwarahina? Mani edia haheitalai baita tohotohodia diba taudia toi, Iehova, Iesu bona aposetolo Paulo aita herevalaidia.

IEHOVA ENA HEBOGAHISI KARANA BAITA TOHOTOHOA

Laḡani momo lalodiai, Iehova na taunimanima ese ia ladana e hadikaiamu karana e haheaukalaia. To, Ia ese “asie hanamoamu taudia bona kara havara taudia na e hanamodiamu.” (Luka 6:35) Ia ese ena haheauka karana amo kara namodia e hahedinaraimu. Iehova na e uramu “taunimanima iboudiai” bae mauri. (1 Tim. 2:3, 4) Ena be Dirava ese kara dikadia na e inai henidiamu, to taunimanima na e lalodia badamu bona se uramu ta baine mase.​—2 Pet. 3:9.

Iehova na mai dibana Satana na mai aonegana ida asi edia abidadama taudia lalodia e hadiburamu. (2 Kor. 4:3, 4) Momo na maraḡidia negana amo hahediba hereva kereredia bona kara kereredia e hadibadiava, una dainai hereva momokani bae abia dae na auka. Iehova na e ura dikadikamu baine durudia. Ede ta diba tomamu?

Iehova ese Nineve taudia e lalodia dalana mani aita laloa. Ena be daḡedaḡe karadia e karava, to Iehova ese Iona e hamaoroa: “Lau ese hanua badana Nineve, lalonai imadia idibadia be ededia bona lauridia be ededia asi dibadia taudia domaga-ta gerebu-rua, . . . basina bogaia hisi a?” (Iona 4:11) Iehova na e itaia Nineve taudia na Ia sivaraina momokanina na asi dibadia, bona mai ena hebogahisi ida Iona e haḡania baine hadibadia.

Iehova heḡereḡerena, taunimanima baita lalodia bada. Iehova baita tohotohoa bona mai eda ura ida kamonai taudia iboudiai baita durudia, ena be toadia na asie uramu bae kamonai.

IESU ENA HEBOGAHISI KARANA BAITA TOHOTOHOA

Iesu na Tamana heḡereḡerena, taunimanima e bogadia hisiva badina Dirava ena hereva momokani na asi dibadia. “Aru taudia e itadia, e bogadia hisi, badina be taudia e boera, bona e karoho, mamoe asi ireḡudia na heheto.” (Mat. 9:36) Iesu ese edia mauri e lalopararalaia; mai dibana ena hereva ikamonaina totona ela taudia na edia tomadiho igunalaina taudia ese hahediba hereva koikoidia e hadibadiava bona e kara auka henidiava. Iesu na mai dibana ena be idia momo na ḡau idauidau daidiai ena hereva basie abi dae, to dounu ḡau momo e “hadibadia.”​—Mar. 4:1-9.

Taunimanima ese eda haroro herevana basie kamonai neganai, namona na edia mauri baita lalopararalaia bona siboda baita henanadai dahaka dainai unu e kara tomamu. Reana haida ese Baibul na basie abia daemu, eiava sibodia e hegwauraimu Kristen taudia edia kara na didika dainai Kristen korikoridia na be lalodia kereremu. Ma haida be reana e sivarailaida koikoimu herevadia e kamonaimu. To, ma haida na e garimu badina e laloamu bema bae abida dae, edia kominiti eiava ruma bese taudia ese be kirikirilaidiamu.

Haroro ḡaukara ai ta davaridiamu taudia haida na asie uramu bae kamonai, badina ediai hekwakwanai ta e vara dainai e lalohisihisimu. Misinari taihuna ta ladana Kim na eto: “Emai teritori ta ai, taunimanima momo na tuari dainai edia ḡau iboudiai e haboio. E laloava idia na asi edia helaro. E lalohisihisiva bona ta asie abidadama heniava. Ina gabu ai, nega momo taunimanima na asie urava eda haroro herevana bae kamonaia. Nega ta, na harorova lalonai haida ese e dadabagu.”

Edena dala ai Kim na hebogahisi karana e hahedinaraia ena be haida ese e kara auka henia? Ia na eto: “Haida ese e kara auka heniguva neganai, Hereva Lada-isidia 19:11 ena hereva na laloataova, eto: ‘Lalo-maoromaoro dainai tau ta na badu ai baine halahe.’ Emai teritori taudia edia mauri dalana na laloava neganai, e duruguva hebogahisi karana baina hahedinaraia totona. Bona a davaridiava taudia momo ese se inai henimaiva. Una gabu tamona ai, lou henia namodia haida a davaridia.”

Siboda baita henanadai, ‘Bema lau na hereva momokani asi dibagu, Iehova ena Witnes ese bema haroro henigu neganai dahaka bama kara?’ Heḡereḡere, bema Iehova ena Witnes e sivarailaidia koikoimu herevadia baita kamonai loulou be ede bamona? Reana ita danu baita hereva kereremu bona baita uramu ma haida ese bae bogada hisi. Iesu ena haheḡani​—bema ta uramu haida ese bae kara henida heḡereḡerena baita kara henidia​—baita laloa loumu neganai, be hagoadadamu hebogahisi karana baita hahedinaraia, ena be una na mai hekwarahina.​—Mat. 7:12.

PAULO ENA HEBOGAHISI KARANA BAITA TOHOTOHOA

Aposetolo Paulo ese ia e daḡedaḡe heniava taudia na e bogadia hisiva. Dahaka dainai? Ia ese ena kara gunadia na se lalodia boio. Ia na eto: “Gunaguna na ere dikava, na daḡedaḡe heniava, ladana na hadikaiava, to e bogaguhisi; badina be mata-lahui ai na karava, asi egu kamonai dainai.” (1 Tim. 1:13) Ia na e laloparara Iehova bona Iesu ese ia na e bogaia hisi. Reana, ena kara gunadia na e haroro henidiava taudia haida ediai e itava.

Nega haida, Paulo ese hahediba hereva koikoidia e badinadia goadava taudia e davaridiava. Ia be dahaka e kara? Kara 17:16 na eto, Atena ai “lalona e hekwarahiva, badina be una hanua na e itaia, kaivakuku ai e honuhonu dae.” To, Paulo ese lalona e hahekwarahia ḡauna e ḡaukaralaia idia e haroro henidia. (Kara 17:22, 23) Taunimanima edia mauri daladia heḡereḡeredia ai ena haroro herevadia e haidauva, unu amo “taunimanima idau-idau iboudiai” baine veridia mauri.​—1 Kor. 9:20-23.

Lalohadai kereredia bona hahediba hereva kereredia e abi daemu taudia baita davaridia neganai, Paulo baita tohotohoa diba. Bona mai aonegada ida sivarai namona baita herevalaia. (Isa. 52:7) Taihu ta ladana Dorothy na eto: “Emai teritori ai, momo na e hadibadiamu Dirava na e kara aukamu bona e hahemaoro haraḡamu. Taunimanima unu bamodia na Dirava e abidadama heniamu dainai na hanamodiamu, bona Baibul amo Iehova ena kara namodia bona ena gwauhamata na idia ediai na herevalaimu.”

“EMUI KARA NAMO AMO DIKA BA HADAREREA”

“Dina gabedia” edia ore negana e kahikahimu dainai, baita haroro henidiamu taudia haida “edia kara dika bona edia koikoi” na be habadamu. (2 Tim. 3:1, 13) To, unu ese eda hebogahisi ihahedinaraina karana bona eda moale basie koua na namo. Iehova ese goada baine henida bena ‘eda kara namo amo dika baita hadarerea.’ (Roma 12:21) Painia taihuna ta ladana Jessica na eto: “Nega momo hekokoroku taudia bona eda haroro herevana asie abia daemu taudia na davaridiamu neganai, baina hereva henidia na auka. Egu hereva na hamatamaiamu neganai, lalogu ai na ḡuriḡurimu bona Iehova na noiamu baine durugu taunimanima na ia ese e lalodiamu dalana heḡereḡerena baina lalodia. Una ese e durugumu sibogu egu hemami basina laloa bada, to ta baina durua dalana hari baina laloa.”

Danu, tadikakada baita hagoadadia dalana baita laloa na namo. Jessica na eto: “Bema haroro ḡaukara ai hekwakwanai e varava, na hekwarahiva basina laloa momo totona. To, hereva namodia haida na gwauraiva, heḡereḡere emai haroro ḡaukara amo anina namona e varava ena be momo asie kamonaiva.”

Iehova ese haroro ḡaukara ai ta davarimu hekwakwanaidia na e itamu. Ena hebogahisi karana baita tohotohoamu neganai, be moalemu! (Luka 6:36) Momokani, Iehova ese ena hebogahisi karana na basine hahedinaraia hanaihanaimu. Ta diba momokanimu Ia na mai dibana nega korikori ai ina nega oromana baine haorea. Una do se vara lalonai, namona na eda haroro ḡaukara baita laloa bada. (2 Tim. 4:2) Namona na mai eda ura ida baita haroro bona “taunimanima iboudiai” baita bogadia hisi.