“Kara Maoromaoro Taudia ese Iehova Bae Moalelaia”

DIANA laḡanina na 80 e hanaia. Adavana na Alzheimer gorerena e abia bona do se mase neganai, burukadia inaridia rumana ta ai e nohova. A dia una mo, natuna memerodia rarua e mase bona ia na ratana ai kensa gorerena e haheaukalaia daudau. To, kongrigeisen taudia ese Kingdom Hall ai eiava haroro ḡaukara ai e itaiava ia na e moaleva.

John na laḡani 43 lalodiai seket ḡaukarana e karaia. Una hesiai ḡaukarana na e ura henia bada! To, varavarana ta e gorerea dainai inarina totona una ḡaukara e rakatania, bona hari ia na ena kongrigeisen e bamoamu. Guna John e dibaia taudia na hebouhebou ai ia e hedavari heniamu neganai, e itaiamu ena kara na se idau. Ia na doini e moalemu.

Dahaka dainai Diana bona John na e moalemu? Lalometau eiava hisihisi e haheaukalaimu tauna be ede baine moale toma? Bema ta na e ura heniamu ḡaukarana na vada se karaiamu, edena dala ai baine moale? Baibul ese haere e henidamu, etomu: “Kara maoromaoro taudia ese Iehova bae moalelaia.” (Sal. 64:10) Moale e havaraiamu bona e hadikaiamu ḡaudia baita dibamu neganai, una siri anina baita lalopararalaiamu.

SE MIA DAUDAUMU MOALENA

Ta dibamu ḡau haida na moale e havaraiamu. E helalokau hehenimu merona bona kekenina be headavamu, eiava tama sina ta natudia be varamu, eiava ta na tiokratik hesiai ḡaukarana ta e abiamu neganai, edia hemami be ede bamona? Unu iboudiai ese moale e havaraiamu, badina unu na Iehova ena amo e maimu ḡaudia. Ia ese headava e hamatamaia, unu amo tau bona hahine ese natudia bae havara diba, danu Kristen kongrigeisen amo hesiai ḡaukara idauidau e henidamu.​—Gen. 2:18, 22; Sal. 127:3; 1 Tim. 3:1.

To moale e havaraiamu ḡaudia haida na se mia daudaumu. Reana ta adavana baine heudahanai eiava baine mase. (Esek. 24:18; Hos. 3:1) Natu haida ese tamadia sinadia bona Dirava e gwau-edeede henidiamu; reana haida na kongrigeisen murimuri ai vada e atodia. Samuel natuna memerodia ese Iehova ena ura na se badinaia, bona David ena kara dainai ena ruma bese lalonai hekwakwanai e vara. (1 Sam. 8:1-3; 2 Sam. 12:11) Ḡau unu bamodia na dia moale e havaraiamu to lalometau bona lalohisihisi.

Danu, Dirava ena taunimanima haida na gorere, ruma bese maduna bona edia asainmen e idaumu dainai edia hesiai ḡaukara e rakatanimu. Edia mauri unu e idau toma tadikaka bona taihu momo na e gwaumu, guna e moalelaiva hesiai ḡaukaradia na e readiamu eiava se lalodiaboiomu.

Ta dibamu e hamoaledamu ḡaudia haida na se mia daudaumu. Eda mauri ai hekwakwanai e varamu neganai baita moale dibamu, a? Oibe. Badina Samuel, David, bona ma haida na hekwakwanai e davariva, to una ese se koudia bae moale totona.

E MIA HANAIHANAIMU MOALENA

Iesu na moale korikorina mai dibana. Baibul ese e hahedinaraiamu, tanobada do sema neganai, ia na Iehova ‘vairanai e moaleva nega idoinai.’ (Her. 8:30) Tanobada ema neganai haida ese e hahisia bada. To, Tamana ena ura na dounu mai moalena ida e karaiava. (Ioa. 4:34) Ena hisihisi horadia gabedia be edeheto? Baibul na e gwaumu: “Vairanai e hure moalena dainai satauro e haheaukalaia.” (Heb. 12:2) Una dainai, Iesu ese moale korikorina e herevalaia neganai, badi rua e hahedinarai, mani aita lalodia.

Nega ta, Iesu ena hahediba 70 na haroro ḡaukara amo e lou neganai, e moale dikadika badina hoa karadia e kara, bona demoni danu e luludia. To Iesu ese e hamaorodia: “Lauma dikadia ese e kamonai henimuimu na basio moalelaia; a ina hari ba moalelaia: ladamui na guba ai vada e torea.” (Luka 10:1-9, 17, 20) Oibe, ḡau badana na Iehova na idia daidiai e moale, una ese edia hesiai ḡaukara ai e abia moalena e hereaia. Ia ese unu abidadama hahediba taudia na e lalodiatao​—una na moale bada ḡauna.

Nega ma ta ai, Iesu na hutuma e haroro henidia. Iuda hahinena ta na Iesu ena hahediba dalana e moalelaia dainai, ia ese Iesu sinana e hanamoa. To Iesu ese ena lalohadai e hamaoromaoroa, eto: “Dirava ena hereva e kamonaimu bona e badinamu taudia hari nanamo heherea.” (Luka 11:27, 28) Momokani, tama sina na natudia daidiai bae moale na namo; to baita moale badina badana na Iehova baita kamonai henia bona turana ai baitala.

Momokani, Iehova ena lalonamo ta abiamu neganai ta moalemu. Ena be ta davarimu hekwakwanaidia na asita moalelaimu, to una ese Iehova ena lalonamo dainai ta mamiamu moalena na basine koua o haidaua diba. To baita haheaukamu neganai, hekwakwanai na baita hanaidiamu bona baita moalemu. (Roma 5:3-5) Danu, Iehova ese ena lauma na ia e abidadama heniamu taudia e henidiamu; bona moale na lauma huahuana ta. (Gal. 5:22) Una ese e durudamu Salamo 64:10 anina ta laloparalaiamu, etomu: “Kara maoromaoro taudia ese Iehova bae moalelaia.”

Una ese e hadibadamu dahaka dainai Diana bona John, matamanai tame herevalaidia taudia, na hekwakwanai negadia ai dounu e moaleva. Diana eto: “Iehova na abidadama henia, natu ese tamana o sinana e abidadama heniamu heḡereḡerena.” Ede e diba toma Dirava na ia dainai e moale? Diana ma eto: “Na mamiamu Dirava ese e hanamogumu dainai doini mai moalegu ida na haroromu.” Ena be John na seket ḡaukara e rakatania to dounu e harorova. Ia e durua ḡauna na ini e herevalaia toma: “Laḡani 1998 amo e abigu hidi Hesiai Ḡaukara Hahediba Sikulina baina hahedibalaia negana ai, egu stadi karana na habadaia, dia guna bamona.” Ia bona adavana edia lalohadai na ini e gwauraia toma: “Laḡani momo lalodiai, herevana Iehova ese dahaka hesiai ḡaukara e henimai, to ai na mai moalemai ida a abia dae. Bona asia lalo hisihisi.”

Tadikaka momo na Salamo 64:10 ena hereva e hamomokaniamu. Haheitalai ta binai: Tadikaka ta na adavana ida United States Betele ai laḡani 30 mai kahana e ḡaukara. Gabeai e siaidia spesol painia ḡaukarana bae karaia. Idia na ini e gwau toma: “O ura heniamu ḡaukarana ta bo rakataniamu neganai bo lalohisihisimu,” to ma eto: “Dia namo ba lalohisihisi ela bona hanaihanai.” Idia na maoromaoro kongrigeisen ida e haroro. Ma eto: “A lalova ḡaudia haida na a ḡuriḡurilaiva. Haere a abiva neganai, una ese e hagoadamaiva bona a moaleva. E siaimai gabuna ai a kau bena se daudau, kongrigeisen taudia haida na painia ḡaukara e hamatamaia, bona a stadi henidia taudia rarua na e goada.”

“BA MOALE HANAIHANAI”

Momokani, nega haida na auka baita moale hanaihanai totona; nega haida baita moalemu, ma nega haida baita lalohisihisimu. To, Iehova ese ihagoadada herevana na Salamo 64:10 ai e torea. Ta lalomanokamu negadiai danu, herevana eda mauri ai ḡau haida bae idau, to ta dibamu abidadama baita hahedinaraiamu neganai ‘Iehova baita moalelaia’ dibamu. Dia una mo, Iehova ese e gwauhamatalaia “guba matamatana bona tanobada matamatana” ihaḡuḡuruna negana baita naria. Una nega ai taunimanima iboudiai na do bae ḡoevadae. Dirava ese baine kara ḡaudia bona baine henida ḡaudia daidiai baita ‘moale hanaihanaimu’​—Isa. 65:17, 18.

Mani a laloa: Basita goreremu bona dina ta ta ḡaukaradia na mai goadada ida baita karamu. Guna ta lalohisihisilaiva ḡaudia iboudiai na be oremu. Dirava e gwauhamata eto, “ḡau gunadia na basie lalodia tao bona basie lalodia une.” Toreisi lou negana ai lalokau taudia ma bae hedavari lou. Milion momo edia hemami na Iesu ese e hatorea isi lou kekenina, laḡanina 12, tamana sinana heḡereḡeredia, idia na be moale dikadikamu. (Mar. 5:42) Dokonai, tanobada ai bae noho taudia iboudiai na “kara maoromaoro” taudia ai baela bona “Iehova bae moalelaia” ela bona hanaihanai.