Lalokau Bona Hahemaoro Maoromaoro—Kristen Kongrigeisin Lalonai (Kaha 2)

1. Ededia point rua ta dibamu?

IEHOVA DIRAVA ese ia e tomadiho heniamu taudia na e lalokau henidiamu. Danu, ia ese hahemaoro maoromaoro e ura heniamu. (Sal. 33:5) Una hereva amo ini point rua ta dibamu: (1) Haida ese Iehova ena hesiai taudia se kara namo henidiamu neganai, Ia kudouna na e hisihisimu. (2) Ia na e gwauhamata ena taunimanima na haida ese ma basie hahisidia lou, bona e hahisidiamu taudia na baine panisidia. Gima Kohorona stadi atikol 9 ai,b ta dibaia ḡauna na, Dirava ese Mose amo Israel taudia e henidia Taravatu badidia na lalokau. Una taravatu ese taunimanima e haḡanidia hahemaoro ḡoevaḡoevana bae badinaia, bona vabu bona ihareha bae haerodia. (Deu. 10:18) Una Taravatu ese e hahedinaraia Iehova na ia e tomadiho heniamu taudia e lalokau henidia badamu.

2. Ededia henanadai baita haerelaimu?

² Laḡani 33 C.E. ai Kristen kongrigeisin e matama neganai, Mose ena Taravatu na e doko. Kristen taudia na vada dia una Taravatu​—lalokau bona hahemaoro maoromaoro ai e haginia ḡauna​—henunai dainai, anina be hahenamo basie abimu, a? Lasi, to idia na taravatu matamatana ma ta henunai. Ina atikol ai, una taravatu anina baita herevalaia gunamu. Bena ini henanadai baita haerelaimu: Dahaka dainai baita gwaumu una taravatu badina na lalokau? Dahaka dainai baita gwaumu taravatu ese hahemaoro maoromaoro e hahedinaraiamu? Una taravatu henunai, mai edia dagi taudia ese haida be ede bae kara henidia toma?

“KERISO ENA TARAVATU” BE DAHAKA?

3. Galatia 6:2 ai, “Keriso ena haheḡani” o taravatu be dahaka?

³ Galatia 6:2 ba duahia. Kristen taudia na “Keriso ena haheḡani” o taravatu henunai. Iesu ese ia murinai e rakamu taudia na taravatu momo herea se henidia, to hahediba herevadia, haheḡani, bona hahekau herevadia e henidia. “Keriso ena taravatu” na Iesu ese e hahedibalai ḡaudia iboudiai e herevalaiamu. Paragraf gabedia ese be durudamu, una taravatu baita lalopararalaia namonamo totona.

4-5. Iesu be ededia dala ai taunimanima e hadibadiava, bona edena nega ai?

⁴ Iesu be ededia dala ai taunimanima e hadibadia? Dala ta na, iena hereva amo. Iena hereva na mai siahudia badina ia ese Dirava sivaraina momokanina e hadibadiava, mauri anina korikori e herevalaiava, bona e hahedinaraia Dirava ena Basileia sibona ese taunimanima edia hisihisi iboudiai baine haoredia vaitani. (Luk. 24:19) Dala ma ta be, iena kara amo. Ia ese ena mauri dalana amo e hahedinaraia, ia murinai e rakava taudia ese ia bae tohotohoa na namo.​—Ioa. 13:15.

⁵ Iesu be edena nega ai taunimanima e hadibadia? Tanobada ai ena hesiai ḡaukara e karaiava negana ai. (Mat. 4:23) Danu e toreisi lou murinai iena hahediba e hadibadia. Heḡereḡere, hahediba taudia 500 mai kahana ediai e hedinarai bena e haḡanidia eto, “bese iboudiai hahediba ai ba halaodia.” (Mat. 28:19, 20; 1 Ko. 15:6) Iesu na kongrigeisin kwarana dainai, guba e lou lao negana amo ema bona hari ia na dounu ena hahediba taudia e hadibadiamu. Heḡereḡere, laḡani 96 C.E. ai, Keriso ese matahanai ta amo aposetolo Ioane e hamaoroa, horoa Kristen taudia baine hagoadadia bona baine sisiba henidia.​—Kol. 1:18; Apok. 1:1.

6-7. (a) Iesu ena hahediba herevadia be edeseni ai hehetore? (b) Edena dala ai Keriso ena taravatu baita badinaia?

⁶ Iesu ena hahediba herevadia be edeseni ai hehetore? Evanelia bukadia foa lalodiai, Iesu ese tanobada ai e gwaurai herevadia bona e kara karadia sivaraidia momo e herevalai. Kristen Grik Revarevadia ma haida amo Iesu ena lalohadai ta lalopararalaiamu, badina unu revareva e tore taudia na lauma helaḡa amo e hasiahudia bona ‘Keriso darana vada e abia.’​—1 Ko. 2:16.

⁷ Ta dibamu ḡaudia: Eda mauri lalonai Iesu ena hahediba herevadia na mai anidia bada. Una dainai, ruma ai, ḡaukara o sikuli gabudia ai, bona kongrigeisin ai ta karamu ḡaudia iboudiai lalodiai Keriso ena taravatu baita badinaia. Kristen Grik Revarevadia baita duahimu bona baita lalodia dobumu neganai, una taravatu baita dibaiamu. Unu revareva lalodiai Iesu ena hahediba herevadia, haheḡani bona hahekau herevadia baita badinamu neganai, ita na Keriso ena taravatu ta badinaiamu. Unu baita kara tomamu neganai, ita na lalokau Diravana Iehova ta kamonai heniamu, badina Iesu e hahedibalai ḡaudia iboudiai na Ia amo.​—Ioa. 8:28.

TARAVATU BADINA NA LALOKAU

8. Keriso ena taravatu badina be dahaka?

⁸ Badi aukanai e haginia rumana ai e nohomu taudia na asie garimu bona e noho namonamomu. Una heḡereḡerena, badi aukanai e haginia taravatuna e badinaiamu taudia na asie garimu bona e noho namonamomu. Keriso ena taravatu badina na lalokau. Dahaka dainai unu ta gwau tomamu?

9-10. Dahaka ese e hahedinaraia Iesu na taunimanima e lalokau henidiava, bona edena dala ai baita tohotohoa?

⁹ Ginigunana na, Iesu ese ḡau iboudiai na mai lalokauna ida e kara. Hebogahisi na lalokau ihahedinaraina karana ta. Iesu ese hutuma e bogadia hisi dainai e hadibadia, gorere taudia e hanamodia, hitolo taudia e ubudia, bona mase taudia e hatoredia isi lou. (Mat. 14:14; 15:32-38; Mar. 6:34; Luk. 7:11-15) Ena be unu iboudiai ikaradia totona ena nega bona goada e ḡaukaralai, to mai ena ura ida haida edia namo e lalo bada. Iena lalokau e hahedinaraia dalana hereadaena na, ena mauri e atoa diho haida daidiai.​—Ioa. 15:13.

¹⁰ Ta dibamu ḡaudia: Iesu baita tohotohoa dalana ta na, haida edia namo baita lalo bada. Danu, eda teritori ai e nohomu taudia ediai hebogahisi karana baita hahedinaraia. Taunimanima ta bogadia hisimu dainai, sivarai namona ta harorolaiamu bona ta hahedibalaiamu neganai, ita na Keriso ena taravatu ta badinaiamu.

11-12. (a) Ede ta diba tomamu Iehova ese ita na e laloda badamu? (b) Edena dala ai Iehova ena lalokau baita tohotohoa?

¹¹ Iharuana na, Iesu ese Tamana ena lalokau e hahedinaraia. Iesu na ena hesiai ḡaukara lalonai e hahedinaraia, Iehova ese ia e tomadiho heniamu taudia na e lalodia badamu. Iesu ese e hadibada ḡauna ma ta na ina: Tamada guba ai e nohomu vairanai ita ta ta na vaitani dava bada ḡaudia na heheto. (Mat. 10:31) Iehova na e ura dikadikamu e helalo-kerehaimu bona kongrigeisin e lou heniamu tauna baine abia dae. (Luk. 15:7, 10) Iehova ese ena lalokau e hahedinaraia dalana na, Natuna e heni ita daidai ena mauri baine bouboulaia.​—Ioa. 3:16.

¹² Ta dibamu ḡaudia: Edena dala ai Iehova ena lalokau baita tohotohoa? (Efe. 5:1, 2) Iseda tadikaka bona taihu baita lalodia bada dava bada ḡaudia na heto, bona Iehova e lou heniamu “dobi mamoena” na mai moaleda ida baita abia dae. (Sal. 119:176) Eda tadikaka bona taihu na hekwakwanai e davarimu negadiai, eda nega bona goada baita ḡaukaralai baita durudia, unu amo baita hahedinaraia idia na ta lalokau henidiamu. (1 Ioa. 3:17) Haida ediai lalokau baita hahedinaraiamu neganai, ita na Keriso ena taravatu ta badinaiamu.

13-14. (a) Ioane 13:34, 35 ai, Iesu ese ena hahediba e haḡanidia dahaka bae kara, bona dahaka dainai una na taravatu matamatana? (b) Taravatu matamatana be ede baita badinaia toma?

¹³ Ihatoina be, Iesu ese ena hahediba e haḡanidia, sibodia edia ura idadaraina lalokauna bae hahedinaraia. (Ioane 13:34, 35 ba duahi.) Iesu ena haheḡani na matamata badina una haheḡani lalonai tadikakada baita lalokau henidia dalana e gwauraia, bona Dirava ese Israel e henidia Taravatuna ai una na se gwauraia: Iesu na e gwa tadikakada baita lalokau henidia ia ese e lalokau henida heḡereḡerena. Anina na siboda eda ura idadaraina lalokauna baita hahedinaraia.c Oibe, tadikaka bona taihu baita lalokau henidia bada. Una lalokau dainai, mai eda ura ida eda mauri baita atoa diho idia daidiai, Iesu ese ita daidai ena mauri e atoa diho heḡereḡerena.

¹⁴ Ta dibamu ḡaudia: Taravatu matamatana be ede baita badinaia toma? Iseda tadikaka bona taihu daidiai ḡau haida baita dadarai. Idia ta lalokau henidiamu dainai, kara badadia baita karamu, heḡereḡere idia daidiai eda mauri baita atoa dihomu. To dia una mo, ḡau maraḡidia amo danu eda lalokau baita hahedinaraia. Heḡereḡere, eda motuka amo tadikaka o taihu burukana ta hebou baita laohaia, o eda lalokau tauna ta ihamoalena totona siboda eda ura ḡaudia baita dadarai, o eda ḡaukara amo baita holidei bena disasta gabudiai baita heduru diba. Unu baita kara tomamu neganai, ita na Keriso ena taravatu ta badinaiamu. Bona unu amo kongrigeisin taudia ta ta na be moalemu.

HAHEMAORO MAOROMAORO E HAHEDINARAIAMU TARAVATUNA

15-17. (a) Edena dala ai Iesu ese hahemaoro maoromaoro e hahedinaraia? (b) Iesu be ede baita tohotohoa toma?

¹⁵ Baibul ai ina hereva “hahemaoro maoromaoro,” anina na Dirava ese e gwauraimu kara maorodia baita badina bona baita ura henidia. Dahaka dainai baita gwau dibamu Keriso ena taravatu ese hahemaoro maoromaoro e hahedinaraiamu?

¹⁶ Iesu ese ena kara amo hahemaoro maoromaoro e hahedinaraia dalana mani aita laloa guna. Iena negai, Iuda tomadiho igunalaina taudia ese idau bese taudia bona se skuli namonamo Iuda taudia na e inai henidiava, bona hahine na se matauraidiava. To, Iesu ese taunimanima iboudiai na e kara henidia heḡereḡereva. Ia e abidadama heniava Idau Bese taudia na e abidia daeva. (Mat. 8:5-10, 13) Bona taunimanima toadia na se lalova, to ogoḡami taudia bona taḡa taudia e haroro henidiava. (Mat. 11:5; Luk. 19:2, 9) Hahine na se kara auka henidiava eiava se gwau henidiava. Ia ese hahine iboudiai, haida ese asie lalodia badava hahinedia danu, e matauraidiava bona e bogadia hisiva.​—Luk. 7:37-39, 44-50.

¹⁷ Ta dibamu ḡaudia: Iesu baita tohotohoa dalana na, taunimanima toadia basita lalo bona e uramu bae kamonai taudia iboudiai baita haroro henidia​—herevana edia tomadiho na idau eiava idia na taḡa o ogoḡami taudia. Kristen tataudia ese Iesu bae tohotohoa dalana ta na, hahine bae matauraidia. Unu baita kara tomamu neganai, ita na Keriso ena taravatu ta badinaiamu.

18-19. Iesu ese hahemaoro maoromaoro be ede e hahedibalaia toma, bona iena hahediba dalana amo dahaka ta dibamu?

¹⁸ Iesu ese hahemaoro maoromaoro e hahedibalaia dalana mani aita laloa. Ia ese hahekau herevadia amo ia murinai e raka taudia e hadibadia, haida bae kara namo henidia. Heḡereḡere, Iesu na eto bema ta uramu haida ese bae kara namo henida, namona na ita ese idia baita kara namo henidia. Bema unu baita kara tomamu, idia ese ita danu be kara namo henidamu. (Mat. 7:12) To bema haida ese bae kara auka henida be ede bamona? Iesu na ena hahediba ma e hadibadia, namona na bae abia dae Iehova ese ia “e tai henia boi e tai henia rani taudia, inaidia davadia” baine heni. (Luk. 18:6, 7) Una na iena gwauhamata. Kara maoromaoro Diravana na mai dibana ita na ini dina gabedia ai hisihisi ta davarimu, bona nega korikori ai baine hamaoromaorodia.​—2 Te. 1:6.

¹⁹ Ta dibamu ḡaudia: Iesu ena hahekau herevadia baita badinamu neganai, haida baita kara namo henidiamu. Bona bema Satana ena tanobada ai haida ese e hahisidamu, namona na baita diba Iehova na ita daidai idia baine hahemaoro henidia.

MAI EDIA DAGI TAUDIA ESE HAIDA BE EDE BAE KARA HENIDIA TOMA?

20-21. (a) Mai edia dagi taudia ese haida be ede bae kara henidia toma? (b) Tau ese sibona ena ura idadaraina lalokauna be ede baine hahedinaraia toma? Tama ese natuna be ede baine kara henidia toma?

²⁰ Keriso ena taravatu henunai, mai edia dagi taudia ese haida be ede bae kara henidia toma? Una taravatu badina na lalokau dainai, idia ese henudiai e nohomu taudia na mai lalokaudia ida bae naridia bona bae matauraidia. Namona na bae helalotao Keriso na e uramu ḡau iboudiai na mai lalokaudia ida bae kara.

²¹ Ruma bese lalonai. Tau ese adavana baine lalokau henia, “Keriso ese ekalesia e ubuamu bona e dosiamu heḡereḡerena.” (Efe. 5:25, 28, 29) Namona na tau ese Keriso ena lalokau karana baine tohotohoa bona adavana ena dabu ḡaudia bona ura ḡaudia baine lalo bada. Tatau haida ese lalokau bae hahedinaraia na auka, badina reana maraḡidiai tamadia sinadia ese se lalodia badava bona se matauraidiava. Reana e manadalai kara kereredia bae haidau na auka, to unu kara bae haidau na namo, unu amo Keriso ena taravatu bae badinaia. Sibona ena ura idadaraina lalokauna e hahedinaraiamu tauna na adavana ese e matauraiamu. Bona natuna e lalokau henidiamu tama ese natuna na se hahisidiamu ena hereva o kara amo. (Efe. 4:31) To, e lalokau henidiamu bona e lalonamo henidiamu, unu amo natuna na basie garimu bona be moalemu. Bona natuna ese ia danu be lalokau heniamu bona be abidadama heniamu.

22. 1 Petro 5:1-3 ai, “mamoe” be daika ena, bona ede bae naridia toma?

²² Kongrigeisin lalonai. Namona na elda taudia na bae helalotao “mamoe” na dia idia edia. (Ioa. 10:16; 1 Petro 5:1-3 ba duahi.) Ini hereva “Dirava ena mamoe serina,” bona “Dirava ena ura heḡereḡerena” ai bae itadia tao, ese elda taudia e hadibadiamu mamoe na Iehova ena. Ia na e uramu mai edia lalokau bona hebogahisi ida iena mamoe bae naridia. (1 Te. 2:7, 8) Elda taudia na mai lalokaudia ida edia maduna be huamu neganai, Iehova ese be lalonamo henidiamu. Danu, tadikaka bona taihu ese elda taudia be lalokau henidiamu bona be matauraidiamu.

23-24. (a) Kerere badadia e varamu neganai elda taudia edia maduna be dahaka? (b) Unu kerere e hamaoromaoromu neganai, elda taudia ese dahaka bae laloa be namo?

²³ Elda taudia ese kerere badadia e hamaoromaoromu neganai, edia maduna be dahaka? Edia maduna na Mose ena Taravatu henunai e nohova elda tataudia edia amo idau. Mose ena Taravatu henunai, elda tataudia na dia Dirava ena kongrigeisin lalonai e varava kereredia mo, to danu, heatu, ala-ala, daḡedaḡe bona henaohenao karadia e hamaoromaorova. A Keriso ena Taravatu henunai, elda taudia na Dirava ena kongrigeisin lalonai baine vara kererena mo bae hamaoromaoroa. Badina e lalopararamu Dirava ese gavamani na gwaumaoro e henia heatu, ala-ala, daḡedaḡe bona henaohenao karadia baine hamaoromaoro totona. Bona gavamani na mai ena maoro una kerere tauna amo faini monina baine noia o baine hadiburaia.​—Rom. 13:1-4.

²⁴ Kongrigeisin lalonai bema ta na kerere badana ta baine karaia, elda taudia be dahaka bae kara? Idia ese Baibul amo ḡau iboudiai bae haero namonamo bena abi hidi bae kara. Namona na bae helalotao Keriso ena taravatu na lalokau latanai e haginia. Elda taudia mai edia lalokau ese ina henanadai bae laloa: Dahaka bae kara diba kerere tauna ese e hahisia taudia (o victim) bae durudia? Elda taudia mai edia lalokau ese kerere tauna bae durua totona, ini henanadai bae lalo: Ia be e helalo-kerehai, a? Baita durua diba lauma dalanai baine goada lou totona, a?

25. Atikol gabena ese dahaka be herevalaiamu?

²⁵ Ita na Keriso ena taravatu henunai dainai ta moalemu! Bema baita hekwarahimu una taravatu baita badinaiamu, eda kongrigeisin lalonai baita helalokau hehenimu, haida edia namo baita lalo badamu, bona baita noho namonamomu. To, ina tanobada ai “kara dika taudia” ese edia kara dikadia na doini e habadamu. (2 Ti. 3:13) Una dainai hanaihanai baita gima na namo. Edena dala ai Kristen kongrigeisin ese Dirava ena hahemaoro maoromaoro baine badinaia, bema child sexual abuse karana baine vara? Atikol gabena ese una henanadai be haerelaiamu.