Iehova Ilalokau Henina Karana Dainai Ba Bapatiso

1-2. Aposetolo Edia Kara 8:27-31, 35-38 ese e hahedinaraiamu, Etiopia eunuko tauna be dahaka ese e durua baine bapatiso totona?

OI BE o uramu ba bapatiso unu amo Keriso ena hahediba tauna ai baola, a? Taunimanima momo na lalokau dainai una abi hidi e karaia. Mani Etiopia edia kwini ena hesiai tauna ena haheitalai aita laloa.

² Etiopia eunuko tauna ese Toretore Helaḡadia e lalopararalai neganai, maoromaoro bapatiso e abi. (Apos. 8:27-31, 35-38 ba duahi.) Ia be dahaka ese e durua dainai unu e kara toma? Ia ese Dirava ena Hereva e laloa bada, badina ia na kariota amo e laova lalonai, Isaia peroveta tauna ena buka e duahiava. Filipi ida e herevaherevava lalonai, ia na Filipi e hamaoroa Iesu ese ia dainai e kara ḡaudia na e lalodia bada. To, dahaka dainai una Etiopia eunuko tauna na Ierusalem ela? Badina ia ese Iehova na e lalokau henia. Ede ta diba tomamu? Ia na Ierusalem ai Iehova eha toma diho henia. Una ese e hahedinaraiamu ia na ena tomadiho e haidaua bona Dirava momokanina e toma henia dihova besena e bamodiava. Iehova ilalokau henina karana ese e durua dainai ia na e ura mai anina bada karana ma ta baine karaia, una na bapatiso baine abi Keriso ena hahediba ta ai bainela totona.​—Mat. 28:19.

3. Dahaka ese ta ena bapatiso karana baine koua diba? (Maua ladana “Oi be Taunimanima Ede Bamomu?” ba itaia.)

³ Iehova ilalokau henina karana ese baine durumu bapatiso bavabi totona. To, lalokau ese danu emu bapatiso karana baine koumu diba. Edena dalai? Mani a laloa, reana emu ruma bese eiava turamu na o lalokau henidia badamu dainai bo lalohekwarahimu bona bo lalomu bema bo bapatisomu idia ese oi na basie ura henimumu. (Mat. 10:37) Eiava oi ese o manadalai karadia na Dirava ese e inai henimu karadia daidiai, oiemu ai na e aukamu unu kara ba dadarai totona. (Sal. 97:10) Eiava emu mauri lalonai tomadiho koikoi ese e moalelaimu ariadia bona kastom karadia na o manadalaidia. Reana unu moale karadia na dounu o lalodiamu. Una dainai emu ai na be aukamu, Iehova ese se moalelaimu kastom karadia ba rakatani totona. (1 Kor. 10:20, 21) To namona na sibomu ba henanadai: “Lau be dahaka o daika na lalokau henia badamu?”

BAITA LALOKAU HENIA TAUNA GINIGUNANA

4. Bapatiso bo abimu badina badana be dahaka?

⁴ Oi ese ḡau namodia momo ba ura heni bona ba lalo bada diba. Heḡereḡere, Iehova ena Witnes ida Baibul do so stadilaia neganai, oi ese Baibul na o laloa badava. Bona reana Iesu danu o lalokau heniava. Hari, oi na Iehova ena Witnes taudia na mai dibamu, una dainai o uramu idia ba bamodia. To, unu ese se hahedinaraimu oi na heḡereḡere Iehova enai emu mauri ba gwauhamatalaia bona ba bapatiso. Namona na bapatiso bavabi badina badana na Iehova Dirava o lalokau heniamu dainai. Emu lalokau Iehova enai na bada neganai, ḡau ta eiava tau ta ese oi na basine koumumu ia ba hesiai henia. Iehova ilalokau henina karana ese oi na be durumumu bapatiso bo abimu bona oi na dounu Dirava bo hesiai heniamu.

5. Ededia henanadai baita herevalaimu?

⁵ Iesu na e gwa namona na Iehova baita lalokau henia mai laloda, darada, bona mai goadada idoinai ida. (Mar. 12:30) Edena dalai Iehova ba lalokau henia bona ba matauraia? Bema Iehova ena lalokau ita edai baita laloa badamu, una ese ita na be durudamu ia baita lalokau henia totona. (1 Ioa. 4:19) Iehova bo lalokau heniamu neganai, bo karamu ḡaudia haida be dahaka?b

6. Roma 1:20 heḡereḡerena, Iehova ba dibaia dalana ta be dahaka?

⁶ Iehova e havara ḡaudia amo ia ba dibaia. (Roma 1:20 ba duahia; Apok. 4:1) Iehova ese e kara tubutubu ḡaudia bona animal ba lalodia, Iehova ese e karadia daladia amo e hahedinaraiamu iena aonega na bada herea. Bona hoa dalanai taunimanima e karadia dalana danu ba haeroa. (Sal. 139:14) Iehova ese dina e karaia neganai siahu e atoa ḡauna a haeroa, to ta lalopararamu dina na hisiu ta bona ma hisiu bilioni bilioni momo ese iena siahu e hahedinaraiamu.c (Isa. 40:26) Iehova e kara ḡaudia bo lalodia dobumu neganai, emu hemataurai ienai na be badamu. To, emu hetura karana Iehova ida baine goada totona, iena aonega bona siahu mo ba diba na dia heḡereḡere. Emu lalokau ienai baine bada bona ia turana ai baola totona, namona na emu diba ienai ba habadaia.

7. Dahaka ba diba na namo, emu lalokau Iehova enai ba habadaia totona?

⁷ Namona na ba diba momokani Iehova ese oi na e lalokau henimumu. Oiemu ai be e aukamu bavabia dae guba bona tanobada e Karaia Tauna ese oi na e lalomu badamu, a? Bema emu haere na oibe, ba helalotao, “ia [Iehova] bona ita ta ta padada na dia daudau.” (Apos. 17:26-28) Badina be “lalo-hata bona lalo-hadai iboudiai na dibana” bona oi e gwauhamata henimumu, ia ‘ba tahua, vada ba davaria.’ (1 Sis. 28:9) Hari, oi na Baibul o stadilaiamu badina Baibul na e gwaumu: “Tamagu . . . ese baine veria mai tauna mo sibona” na Ia dekena bainela. (Ioa. 6:44) Iehova ese oi daimuai e kara ḡaudia bo lalopararalaimu neganai, emu lalokau ienai na be badamu.

8. Emu lalokau Iehova enai be ede ba hahedinaraia toma?

⁸ Emu lalokau Iehova enai ba hahedinaraia dalana ta na, ḡuriḡuri amo ia ba hereva henia. Ienai emu lalohekwarahi ḡaudia bo gwauraimu bona oi daimuai e kara ḡaudia daidiai bo tenkiu heniamu neganai, emu lalokau Ienai na be badamu. Emu ḡuriḡuri be haerelaimu dalana ese emu hetura karana Iehova ida be hagoadaiamu. (Sal. 116:1) Oi na bo abia dae momokanimu Iehova ese oi na e lalopararalaimumu. To ia turana ai baola totona, namona na ia e uralaimu, se uralaimu, bona ḡau haida e karamu badidia ba lalopararalai. Bona iena ura oiemu ai be dahaka ba diba na namo. Unu baita diba dalana tamona na Iena Hereva, Baibul baita stadilaia.

9. Edena dalai ba hahedinaraia oi ese Baibul na o laloa badamu?

⁹ Baibul na ba laloa bada. Baibul sibona amo Iehova sivaraina momokanina bona iena ura oiemu ai bo dibamu. Baibul ba laloa bada dalana na, dina ta ta ai ba duahia, emu Baibul stadi dainai ba heḡaeḡae namonamo, bona o dibamu ḡaudia na emu mauri lalonai ba badina. (Sal. 119:97, 99; Ioa. 17:17) Mai emu Baibul duahiduahi sediual ta, a? Dina ta ta iboudiai una sediual o badinaiamu, a?

10. Baibul ai mai anina bada ḡauna ta be dahaka?

¹⁰ Baibul lalonai mai anina bada ḡauna ta na, Iesu e itaia taudia sivaraidia na e hetore. Baibul sibona ese e hahedinaraia ḡoevaḡoevamu oi daimuai Iesu be dahaka e kara. Iesu e gwaurai bona e kara ḡaudia bo dibamu neganai, bo ura badamu Iesu turana ai baola.

11. Dahaka ese oi be durumumu Iehova ba lalokau henia totona?

¹¹ Iesu ba lalokau henia bena emu lalokau Iehova enai na be badamu. Dahaka dainai? Badina Iesu ese Tamana ena kara na e hahedinarai ḡoevaḡoeva. (Ioa. 14:9) Una dainai Iesu bo dibaiamu neganai, una ese be durumumu Iehova bo lalopararalaiamu bona bo laloa badamu. Taunimanima ese asie lalodia badava taudia​—ogoḡami, gorere bona manoka taudia​—ediai Iesu ese e hahedinaraia hebogahisina mani a laloa. Bona dina ta ta ai emu mauri iduruna totona e henimu hahekau herevadia bona unu o badinamu dainai emu mauri e hanamoamu daladia mani a lalo.​—Mat. 5:1-11; 7:24-27.

12. Iesu bo dibaiamu neganai, una ese be durumumu dahaka bo karamu?

¹² Iesu ese ena mauri e bouboulaia emu kara dika bae hegwautao helaoreana, bona una bo laloa badamu neganai emu lalokau Iesu enai na be badamu. (Mat. 20:28) Bema bo lalopararamu Iesu na mai ena ura ida oi daimuai e mase, oi na bo uramu ba helalo-kerehai bona Iehova ese emu dika baine gwautao. (Apos. 3:19, 20; 1 Ioa. 1:9) Iesu bona Iehova ediai emu lalokau be badamu neganai, oi na bo uramu idia e lalokau henidiamu taudia ba bamodia.

13. Iehova be daidia baine ḡaukaralaidia diba oi bae durumu totona?

¹³ Iehova e lalokau heniamu taudia ba lalokau henidia. Emu ruma bese bona turamu na readia basie lalopararamu dahaka dainai oi na o uramu Iehova enai emu mauri ba gwauhamatalaia. Bona readia oi na basie ura henimumu. To, Iehova ese tadikaka taihu be ḡaukaralaidiamu oi bae durumu. Una dainai bema tadikaka taihu bo bamodiamu, bo itaiamu idia ese oi na be lalokau henimumu bona be durumumu. (Mar. 10:29, 30; Heb. 10:24, 25) Reana gabeai emu ruma bese danu Iehova be hesiai heniamu bona iena taravatu be badinamu.​—1 Pet. 2:12.

14. Ioane Ginigunana 5:3 heḡereḡerena, Iehova ena taravatu be ede o lalodia tomamu?

¹⁴ Iehova ena taravatu ba lalodia bada bona ba badina. Iehova do so dibaia neganai reana sibomu ese dahaka be maoro bona dahaka be kerere o abi hidi, to hari o itaiamu Iehova ena taravatu ese oi o abi hidi ḡaudia na e hereadia. (Sal. 1:1-3; 1 Ioane 5:3 ba duahia.) Baibul ai tatau, hahine, tama sina, bona natu totodia e tore sisibadia mani a lalodia. (Efe. 5:22–6:4) Unu sisiba o badina neganai, emu ruma bese maurina be e namo, a? Iehova ena hahekau daladia o badina bona tura namodia o abidia hidi neganai, una ese oi e durumu, a? Emu mauri o moalelaiamu, a? (Her. 13:20; 1 Kor. 15:33) Reana unu henanadai haeredia na, oibe.

15. Dahaka ba kara diba unu amo Baibul ena hahekau herevadia ba badina?

¹⁵ Nega haida Baibul amo o dibadia hahekau herevadia ibadinadia na be aukamu. Una dainai, Iehova na ena orea amo Baibul e herevalaiamu pablikeisin e halasimu, oi bae durumu maoro bona kerere ba dibadia totona. (Heb. 5:13, 14) Unu bo duahimu bona bo stadilaimu neganai, bo itaiamu oi na be durumumu bona bo uramu Iehova ena orea ba bamoa.

16. Iehova ese ena taunimanima be ede e naridia tomamu?

¹⁶ Iehova ena orea ba dibaia bona ba durua. Iehova ese ena taunimanima na kongrigeisin ta ta ai e atodia, ia Natuna Iesu na unu kongrigeisin iboudiai kwaradia. (Efe. 1:22; 5:23) Iesu ese horoa taudia bogaraḡidia amo tatau haida e abidia hidi hari ina negai orea bae hakaua totona. Bona idia na e gwauraidiamu “hesiai tauna mai ena kamonai bona mai ena kara maoromaoro,” bona edia maduna na lauma dalanai oi bae ubumu bona bae gimamu. (Mat. 24:45-47) Hesiai tauna mai ena kamonai edia heduru dalana ta na, lauma dalanai lo tadikaka haida e abidia hidimu elda taudia ai baela, oi bae narimu totona. (Isa. 32:1, 2; Heb. 13:17; 1 Pet. 5:2, 3) Elda taudia na e hekwarahimu oi bae hagoadamu, bona oi bae durumu Iehova ba hetura henia totona. To, idia ese bae karaia ḡauna badana ta na, oi bae durumu Iehova sivaraina na ma haida ba hadibalaidia.​—Efe. 4:11-13.

17. Roma 10:10, 13, 14 edia hereva heḡereḡerena, dahaka dainai haida ediai Iehova ta herevalaiamu?

¹⁷ Haida ba durudia Iehova bae lalokau henia. Iesu ese ia murinai e rakava taudia e hadibadia Iehova sivaraina na ma haida bae hadibalaidia. (Mat. 28:19, 20) Reana una na hahegani ta dainai oi ese na bo badinaiamu. To, emu lalokau Iehova enai be badamu neganai, emu hemami na aposetolo Petero bona Ioane edia ida be heḡereḡeremu, idia na eto: “Badina be a itava bona a kamonaiva ḡaudia na basia herevalai na dia heḡereḡere.” (Apos. 4:20) Baita moale badamu bema ta baita duruamu Iehova baine dibaia totona. Mani a laloa, evanelia ḡaukarana e karaia tauna Filipo na e moale bada badina Etiopia tauna na Toretore Helaḡadia amo hereva momokani e hadibaia, bena Etiopia tauna na e bapatiso. Bema oi na Filipi bo tohotohoamu bona Iesu ena haroro haheḡanina bo badinaiamu, sibomu ese o hamomokaniamu oi na o uramu Iehova ena Witnes tauna ta ai baola. (Roma 10:10, 13, 14 ba duahi.) Una neganai, oi na readia sibomu bo henanadaimu bo tomu: “Dahaka ese ibapatisogu e laoa ahumu?”​—Apos. 8:36.

18. Atikol 11 ai dahaka baita herevalaimu?

¹⁸ Bema oi na lalomu o hadaia ba bapatiso, emu mauri ibounai lalonai una na abi hidi badana. Una na abi hidi badana dainai, namona na bapatiso anina na do ba lalohadailaia namonamo. Oiemu ai bapatiso anina be dahaka? Do so bapatiso neganai bona bapatiso murinai dahaka ba kara? Unu henanadai na atikol 11 ese be haerelaimu.