Eregabe Memeromui E, Edena Dalai Ma Haida ese Bae Abidadama Henimui?

1. Eda eregabe tadikakadia be dahaka bae kara diba?

EREGABE tadikakamui e, kongrigeisin ai ḡau momo ba kara diba. Umui momo na mai goadamui. (Her. 20:29) Umui na ḡaukara momo o karamu tadikaka bona taihu ba durudia totona. Reana oi na o uramu hesiai tauna ta ai baola. To reana bo hemamimu haida na e laloamu, oi na do matamata dainai dia heḡereḡere mai anina bada ḡaukaradia ba kara. Ena be oi na do matamata, to hari ḡau haida ba kara diba kongrigeisin taudia ese bae abidadama henimu bona bae matauraimu totona.

2. Ina atikol ai dahaka baita herevalaimu?

² Ina atikol ai, ita ese King David ena mauri baita herevalaiamu. Danu Iuda edia king rarua, Asa bona Iehosafet edia mauri ai e vara ḡaudia baita herevalaimu. Ini tatau tatoiosi ese e davari hekwakwanai idauidau bona ede e kara toma baita herevalaidiamu, bona edia haheitalai amo eregabe tadikakadia be dahaka be dibamu.

KING DAVID ENA AMO DIBA BAVABI

3. Eregabe ese kongrigeisin lalonai badadia bae durudia dalana ta be dahaka?

³ David meronai, taunimanima ese e moalelaiva ḡaudia na e manadalai. Ia na lauma ḡaudia e lalo badava, miusik ai ena diba na e habadaia bona una na e ḡaukaralaia Dirava ese e abia hidi king, Saulo, ihamoalena totona. (1 Sam. 16:16, 23) Umui eregabe tadikakamui, o diba ḡauna ta amo ma haida kongrigeisin ai ba durudia diba, a? Oibe, umui momo na mai emui diba. Heḡereḡere, bo itaiamu, badadia na e moalemu, stadi bona hebou totona edia tablet bona fon iḡaukaralaidia namonamo daladia o hadibadiamu neganai, emui diba ini ḡau ai na heduru bada herea idia ediai.

4. David heḡereḡerena, eregabe tadikakadia ese ededia kara bae manadalai na namo? (Rau 1 laulauna ba itaia.)

⁴ David na ena dina ta ta maurinai ai e hahedinaraiava, ena maduna na e lalodia badava bona ia na bae abidadama henia diba. Heḡereḡere, ia eregabenai mai goadana ida tamana ena mamoe e naridiava. Una ḡaukara dainai baine mase diba. Gabeai David ese King Saulo e hamaoroa: “Lau binai emu hesiai tauna na tamagu ena mamoe na reḡudiava; bena leona ta eiava bea ta ema, mamoe natuna ta seri amo e abia negadia ai na lau na ia murina amo nala, na botaia, mamoe natuna na ia uduna amo na hamauria.” (1 Sam. 17:34, 35) David na e mamia mamoe baine naridia na iena maduna, una dainai mai ena goada ida e gimadia. Eregabe tadikakadia ese David bae tohotohoa diba bema e henidia madunadia na bae kara namonamo bona bae haḡuḡuru.

5. Salamo 25:14 heḡereḡerena, eregabe tadikakadia ese bae karaia mai anina bada ḡauna be dahaka?

⁵ David na eregabena amo ena hetura karana Iehova ida e laloa bada. Una hetura karana ese David ena boga-auka karana eiava iena diba miusik ai e hereaia. David enai Iehova na ena Dirava bona turana namona. (Salamo 25:14 ba duahia.) Eregabe tadikakamui e, ba karaia mai anina bada ḡauna na, emu hetura karana Tamamui guba ai e nohomu ida ba hagoadaia, bona unu amo ma hahenamo haida bavabi diba.

6. Haida ese David be ede e laloa kerere tomava?

⁶ Haida ese David na e laloa kerereva. Heḡereḡere, David e ura Goliata baine tuari henia neganai, King Saulo na e gwa: “Oi na tauhau mo.” (1 Sam. 17:31-33) Una do se vara neganai, kakana eto ia ese ena maduna na se huaiava. (1 Sam. 17:26-30) To, Iehova na se lalo David na tauhau mo eiava ena maduna na se huaiava. Ia na David ena kara na mai dibana namonamo. Bona David na Turana, Iehova enai e tabekau, goada baine henia Goliata baine hadarerea.​—1 Sam. 17:45, 48-51.

7. David enai e vara ḡauna ta amo dahaka o dibamu?

⁷ David enai e vara ḡauna ta amo dahaka o dibamu? Ta dibamu ḡauna na baita haheauka. Reana nega be laomu lalonai, oi maraḡimu ai e dibamu taudia haida na be abia daemu oi na do bada. To, namona na ba diba, Iehova ese oi kudoumu na e itaiamu. Ia na mai dibana herea oi bona mai dibana oi be dahaka ba kara diba. (1 Sam. 16:7) Emu hetura karana Iehova ida ba hagoadaia. David na unu baine kara toma totona Iehova e kara ḡaudia e haerodia. David ese unu ḡau e haerodia namonamo karana amo ita e Havarada Diravana ena kara e dibaia. (Sal. 8:3, 4; 139:14; Roma 1:20) Oi ese ba karaia ḡauna ma ta na, Iehova ba noia goada baine henimu. Heḡereḡere, skuli ai turamu ese e hauramumu badina oi na Iehova ena Witnes, a? Bema oibe, Iehova ena heduru ba noia, una hekwakwanai ba hanaia totona. Ena Hereva bona ena orea ese e halasimu pablikeisen bona vidio amo o abimu heduru herevadia na ba badina. Iehova ese be durumumu daladia bo itamu neganai, emu abidadama ienai danu be goadamu. Bena, haida ese bae itaia oi na Iehova enai o tabekaumu neganai, idia ese oi danu be abidadama henimumu.

8-9. (a) Dahaka ese David e durua baine haheauka ela bona pavapava ai bainela? (b) Eregabe tadikakadia be iena haheitalai amo dahaka e dibamu?

⁸ David ese e abia hekwakwanai ma ta mani a laloa. Ena be David na e horoa pavapava ai bainela, to ia na e nari laḡani momo muridiai Iuda pavapavana ai ela. (1 Sam. 16:13; 2 Sam. 2:3, 4) E nariva lalonai, dahaka ese David e durua baine nari mai ena haheauka ida? Ia na se lalometau, to baine kara diba ḡaudia e kara. Heḡereḡere, Filistia edia gabu ai e noho loava neganai, David ese ena nega na e ḡaukaralaia, Israel inaidia e tuari henidia. Unu amo, ia ese Iuda ena tano hetoadia e gimadia.​—1 Sam. 27:1-12.

⁹ David ena haheitalai amo eregabe tadikakadia be dahaka e dibamu? Dala e hekehomu negadiai tadikakamui ba durudia. Mani tadikaka Ricardob ena haheitalai a laloa. Ia na maraḡinai, e urava baine regula painia. To elda taudia ese e hamaoroa ia na do dia heḡereḡere. Ia na se badu bona se lalomanoka, to ena hesiai ḡaukara e habadaia. Ia na e gwa: “Na lalo loumu neganai, na moalemu badina na diba lauma dalanai baina goada na namo. Na ḡaukara goadava kamonai taudia iboudiai baina lou henidia bona lou henia namodia baina kara. Baibul stadi ginigunana na hamatamaia danu. Egu ekspiriens e bada neganai, egu diba danu e bada.” Hari Ricardo na regula painia namona ta bona hesiai tauna ta.

10. Nega ta David ese mai anina bada abi hidina ta do se karaia neganai, ia be dahaka e kara?

¹⁰ David enai e vara ḡauna ma ta a laloa. Ia bona ena tatau na e noho loava neganai, edia ruma bese na e rakatanidia bena ela e hatuari. Idia lasihiadia ai, inaidia ema edia ruma e hadikadia bona edia bese e abidia mauri. David na bema lalo, ia na tuari tauna mai ena diba dainai dala ta bema karaia abi mauri taudia bema hamauridia. To unu na se kara toma, Iehova enai heduru e tahu. Hahelaḡa tauna Abiatara ena heduru amo David na Iehova e nanadaia: “Una orea na baina ḡavadia a?” Iehova ese e hamaoroa baine ḡavadia bona ia na baine kwalimu. (1 Sam. 30:7-10) Ina sivarai amo dahaka ome diba?

11. Abi hidi do so kara neganai, dahaka ba kara diba?

¹¹ Abi hidi do so kara neganai, heduru ba tahu guna. Tamamu sinamu ba hereva henidia. Danu mai edia ekspiriens eldadia bo hereva henidiamu neganai, heduru hereva namodia bo abi dibamu. Iehova ese idia na e abidadama henidiamu, bona oi ese danu bavabidadama henidia diba. Kongrigeisin ai Iehova ese idia na “herahia” ḡaudia bamona e lalodiamu. (Efe. 4:8) Edia abidadama ba tohotoho bona edia heduru hereva namodia ba kamonai neganai, hahenamo bavabi diba. Hari King Asa amo baita diba ḡaudia baita herevalaimu.

KING ASA AMO BA DIBA ḠAUDIA

12. King Asa e lohia matama neganai, dahaka kara namodia e hahedinarai?

¹² King Asa tauhaunai, ia na manau bona boga-auka tauna. Heḡereḡere, tamana, Abia, gabuna e abia neganai, ia ese kaivakuku iboudiai e haoredia. Danu, “Iuda taudia e haḡanidia, Iehova, senedia edia Dirava, bae tahua, bona taravatu bona haheḡani bae badinadia.” (2 Sis. 14:1-7) Sera, Etiopia tauna mai ena tuari taudia 1,000,000 ida ese Iuda e tuari henia neganai, Asa na mai aonegana ida Iehova e noia baine durua, e gwa: “Iehova e, asi ikahamai ta oi heḡereḡeremu, goada taudia bona manoka taudia padamai ai. Iehova e, emai Dirava, a kahamai; badina be emu ai a hetao kaumu.” Ini hereva namodia amo Asa ese e hahedinaraia ia na e abidadama, Iehova ese ia bona ena taunimanima na baine hamauridia diba. Asa ese Tamana guba ai e abidadama henia, bona “Iehova ese Etiopia taudia e hadareredia.”​—2 Sis. 14:8-12.

13. Gabeai, Asa enai be dahaka e vara, bona badina be dahaka?

¹³ Reana bo abia daemu, tuari taudia 1,000,000 ituari henidia na hekwakwanai badana, to Asa na e kwalimu. To madi, hekwakwanai maraḡina e abia neganai, Asa ese Iehova ena lalohadai na se tahua. Pavapava dikana Baasa ese e tuari henia neganai, Asa na Suria pavapavana enai heduru e tahu. Una dainai dika e vara! Iehova ese ena peroveta tauna Hanani ena amo Asa e hamaoroa: “Suria pavapavana enai o hetao kaumu a Iehova, emu Dirava, enai so hetao kaumu dainai, Suria pavapavana ena tuari oreana na oi imamu amo vada e roho mauri.” Bona momokani, una nega amo ela, Asa na hanaihanai e tuariva. (2 Sis. 16:7, 9; 1 Han. 15:32) Dahaka ta dibamu?

14. Edena dalai Iehova enai ba tabekau diba, bona Timoteo Ginigunana 4:12 heḡereḡerena, bema unu bo kara tomamu dahaka be varamu?

¹⁴ Hanaihanai ba manau bona Iehova enai ba tabekau. Oi o bapatiso neganai, emu abidadama na goada bona Iehova na o abidadama heniava. Bona Iehova na mai moalena ida ena ruma bese lalonai e abimu vareai. Ḡau badana na hanaihanai Iehova enai ba tabekau. Abi hidi badadia baita kara neganai Iehova enai baita tabekau dibamu, to ma nega haida ai be dahaka baita karamu? Namona na moale karadiai, moni ḡaukarai, bona mauri ai baita kara ḡaudia ta abi hidimu neganai, Iehova baita abidadama henia na mai anina bada! Sibomu emu aonega ai basio tabekau. To, namona na Baibul ai oi baine durumu hahekau herevadia ba tahu, bena unu heḡereḡeredia ba kara. (Her. 3:5, 6) Bema unu bo kara tomamu, Iehova bo hamoaleamu bona emu kongrigeisin taudia ese be abidadama henimumu.​—1 Timoteo 4:12 ba duahia.

KING IEHOSAFAT ENA AMO DIBA BAVABI

15. Sisiga Iharuana 18:1-3; 19:2 heḡereḡerena, King Iehosafat be dahaka kerere e kara?

¹⁵ Momokani, ita iboudai na dia ḡoevadae, bona nega haida baita kerere dibamu. To, una ese basine koumu Iehova ena hesiai ḡaukara ikaranai. Mani King Iehosafat ena haheitalai a laloa. Ia na mai ena kara namodia momo. Ia tauhaunai, “tamana ena Dirava e tahua, bona ena haheḡani ai e raka.” Bona ia ese lohia taudia e siaidia Iuda hanuadiai, Iehova sivaraina na taunimanima bae hadibalaidia. (2 Sis. 17:4, 7) Ena be Iehosafat na Iehova e lalokau heniava, to nega haida ia ese abi hidi kereredia e kara. Abi hidi kererena ta e karaia dainai, Iehova ena hesiai tauna ta ese e gwau henia. (2 Sisiḡa 18:1-3; 19:2 ba duahi.) Una sivarai amo dahaka o dibamu?

16. Rajeev enai e vara ḡauna amo dahaka o dibamu?

¹⁶ Sisiba herevadia ba kamonai bona ba badina. Uhau momo heḡereḡeredia, reana o hekwarahimu, mai anidia bada ḡaudia ba badina. Basio lalo-manoka. Mani eregabe tadikakana Rajeev enai e vara ḡauna a laloa. Iena matamata negana e herevalaia neganai, e gwa: “Unu laḡani lalodiai, nega haida asi dibagu dahaka baina kara. Matamata taudia ma haida heḡereḡeredia, na urava spot bona moale karadia baina kara, a hebou bona haroro ḡaukara be asina lalo badava.” Dahaka ese Rajeev e durua? Elda ta ese sisiba namona ta e henia. Rajeev na e gwa: “Ia ese e durugu Timoteo Ginigunana 4:8 ena hahekau herevana baina lalopararalaia.” Rajeev na mai manauna ida una sisiba e badinaia, bona ena mauri ai mai anidia ḡaudia e haerodia. Ia na e gwa: “Egu mauri ai lauma dalanai baina tahu ḡaudia na ato guna.” Bena dahaka e vara? Rajeev na e gwa: “Una sisiba na abia bena laḡani haida muridiai na heḡereḡere hesiai tauna ai nala.”

TAMAMU GUBA AI KUDOUNA BA HAMOALEA

17. Iahudia ese Iehova e hesiai heniamu eregabe taudia be ede e lalodia tomamu?

¹⁷ Iahudia ese “mai lalodia tamona ida” Iehova e hesiai heniamu eregabe taudia na e lalodia badamu! (Sef. 3:9) Idia ese e ura henimui badamu badina mai goadamui ida e henimu ḡaukaradia na o karamu. Idia ese umui na e lalonamo henimuimu.​—1 Ioa. 2:14.

18. Hereva Lada-isidia 27:11 ena hereva heḡereḡerena, Iehova ese ia e hesiai heniamu eregabe tadikakadia be ede e lalodia tomamu?

¹⁸ Eregabe tadikakamui e, basio helaloboio, Iehova ese umui na e lalokau henimuimu bona e abidadama henimuimu. Ia na e peroveta, dina gabediai, eregabe taudia na tuari oreana ta heḡereḡerena mai edia ura bada ida ia bae hesiai henia. (Sal. 110:1-3) Iehova na mai dibana umui ese ia o lalokau heniamu bona o uramu mai emu goada ibounai ida ba hesiai henia. Una dainai mai haheaukamui ida ma haida ba kara henidia bona basio haraḡaharaḡa. O kereremu neganai, o abimu treininidia bona sisibadia bavabi dae, ba lalo unu na Iehova ena amo. (Heb. 12:6) E henimui ḡaukaradia na ba karadia namonamo. Bona ḡau badana na, Tamamu guba ai kudouna ba hamoalea.​—Hereva Lada-isidia 27:11 ba duahia.