1921 Laḡani 100 Gunanai

WATCH TOWER January 1, 1921 ḡauna ai, ina henanadai na Bible Student e henidia: “Edena ḡaukara ina laḡani ai be vairadai ta itaiamu?” Una henanadai ihaerelaina totona, una Watch Tower ai Isaia 61:1, 2 e torea, e gwa: “Iehova ese vada e horogu, hisi e animu taudia dekediai hari namodia baina mailai totona. . . . Iehova ena hahemaoro laḡanina, bona dika idavalaina dinana, eda Dirava ena, baina gwaurai.” Una ese Bible Student na e hadibadia lou, edia ḡaukara na bae haroro.

ASIE GARI HARORO TAUDIA

Bible Student ese edia haroro ḡaukara bae haḡuḡurua totona, basie gari na namo. Idia ese “hari namodia” na manau taudia ediai bae harorolai, bona kara dika taudia ediai “dika idavalaina dinana” bae harorolaia.

Tadikaka J. H. Hoskin, Canada ai e nohova, na asi ena gari ida e harorova, ena be daḡedaḡe e davari. Laḡani 1921 matamana kahanai, ia ese Methodist haroro tauna ta e davaria. Edia herevahereva e hamatamaia neganai, Tadikaka Hoskin na e gwa: “Baibul baita herevalaia neganai basita badu, ena be ta abi daemu ḡaudia haida na i’idau. Bema ḡau haida ai asita lalotamonamu, eda herevahereva ta hadokoamu neganai basita hebadu heheni.” To unu na se vara toma. Tadikaka Hoskin na e gwa: “Miniti haida mo a herevahereva murinai, ia ese iduara e kwadia lalodika, una dainai na tomava iduara galasina na be morumu floa ai.”

Una haroro tauna na e lolo, e gwa: “Aola Baibul asi dibadia taudia ba hereva henidia!” Tadikaka Hoskin na hereva ta se gwauraia, to e raka e laova lalonai, ini e vasi lalo toma, ‘Lau be na tomu unu bamona tauna ta nala na hereva heniamu!’

Gabeai una haroro tauna na ena dubu ai e haroro neganai, tadikaka Hoskin e gwau henia. Tadikaka Hoskin na e gwa: “Ia ese ena dubu taudia e hamaorodia una taoni ai lau na koikoi tauna dika hereana bona bae pidigu na namo.” Tadikaka na se gari to dounu e harorova bona anina namona e vara. Ia na e gwa: “Una taoni ai egu haroro ḡaukara na na moalelaiava. Taunimanima haida ese e hamaoroguva, ‘Mai dibamai oi na Dirava ena hesiai tauna!’ bona e urava bae durugu unu amo ḡau ta ai basina dabu.”

SIBODIA BONA EDIA RUMA BESE STADI

Bible Student ese kudou maoro taudia bae durudia, bae goada totona, The Golden Agea magasin lalonai Baibul istadilaina program ta e halasia. Juvenile Bible Study program kahanai tama sina na natudia ida bae herevalai henanadaidia e ato. Tama sina na “unu henanadai natudia ida bae herevalai bona bae durudia Baibul ai haeredia bae tahu.” Unu henanadai haida na henanadai haraḡadia, heḡereḡere “Baibul bukadia be hida?” A henanadai haida be matamata taudia bae haheḡaeḡaedia haroro ai basie gari totona, heḡereḡere “Kristen taudia momokanidia be dala idauidau ai daḡedaḡe do bae davari, a?”

Advanced Studies in the Divine Plan of the Ages kahanai, Studies in the Scriptures ena volume ginigunana amo, badadia ese bae lalohadailai henanadaidia haida e ato. Una magasin e duahia taudia tausen momo na unu program amo namo bada herea e davari, to The Golden Age December 21, 1921 ai e gwa, unu program ruaosi na da basie halasimu. Dahaka dainai karaharaḡa una senisi e karaia?

BUKA MATAMATANA!

*The Harp of God* bukana

Duahiduahi asainmen kadina

Henanadai e tore kadidia

Orea e gunalaiava taudia na e laloparara taunimanima ese Baibul ena hahediba hereva badadia bae diba totona, Baibul bae stadilaia hanaihanai dalana namona ta bae karaia na namo. Una dainai, buka ladana The Harp of God na November 1921 ai e halasia. Una buka e abia dae kamonai taudia danu The Harp Bible Study Course ai e vareai. Una sibodia bae stadi diba program-na ese e durudia “Dirava ese taunimanima baine hanamodia hanaihanai palanina” bae dibaia. Una stadi dalana be ede e karaia toma?

Ta ese una buka ta e abiava neganai, kadikadi ta danu e heniava, una kadi ese e hadibaiava una buka ai edena kaha baine duahia. Murina purana ai, kadi ma ta e siai heniava, una kadi ai ia ese e duahia kahana ai baine ḡaukaralai henanadaidia e toredia. Bona kadi dokonai, pura vairai una buka ai baine duahi kahadia e toreva.

Kongrigeisin ese pura 12 lalodiai, pura ta ta ai kadi matamatana ta na stiuden e siai heniava. Nega momo unu kadi na kongrigeisin ai burukadia eiava gorere dainai basie haroro diba taudia ese e siaiva. Heḡereḡere, Millvale, Pennsylvania, U.S.A. ai e nohova taihuna, Anna K. Gardner, na e gwa: “Lau kakagu Thayle, ia na se rakamu, na una buka The Harp of God e lasi neganai, una buka totona e tore henanadai kadidia na wiki ta ta ai e siaiva, una ese ena haroro ḡaukara na e habadaia.” Stiuden ese una buka e stadilaia oreva neganai, kongrigeisin amo ta ese e vadivadiava, ena diba Baibul ai baine habadaia totona.

VAIRA NEGANA ḠAUKARANA

Laḡani dokonai, Tadikaka J. F. Rutherford ese revareva ta na kongrigeisin iboudiai e siai henidia. Ia na e gwa: “Ina laḡani ai Basileia iharorolaina ḡaukarana na gabu momo ai tame karaia bona taunimanima momo herea tame durudia, dia laḡani gunadia ena haroro ḡaukara heḡereḡerena.” Vaira negana e laloa neganai, ia na ma e gwa: “Ḡaukara bada herea na do mia. Ma haida ba durudia ina ḡaukara namona bae karaia.” Bible Student ese iena haheḡani na e badinaia. Laḡani 1922 amo idia na mai edia goada ida Basileia sivaraina e harorolaia, asie gari.

Asie Gari Turadia

Bible Student na tadikakadia e lalokau henidiava dainai e heduru heheniva. Ina sivarai ese be hahedinaraiamu idia na “dika negana ai” asie gari turadia.—Her. 17:17.

Tuesday, May 31, 1921 ai, kopi korema tauna ta ese kopi kuro hahinena ta e haberoa dainai dibura ruma ela murinai, Tulsa, Oklahoma, U.S.A. ai ala-ala badana (Tulsa Race Massacre) e vara. Kopi kuro tataudia 1,000 mai kahana na kopi korema tataudia haida ida e heatu, edia heatu na e laohaia Greenwood, kopi korema e nohova gabuna, bena unuseniai noho rumadia, stoa bona ofesi 1,400 mai kahana e hadikadia, kohudia e henao bona e gabudia. Ripoti ai na e gwa una heatu ai e mase taudia edia namba na 36, to namba korikorina reana 300 bamona.

Tadikaka Richard J. Hill, kopi korema Bible Student ta, Greenwood ai e nohova, ese e vara ḡauna e herevalaia, e gwa: “Una heatu e vara hanuaboina ai, ai na vaevae emai kongrigeisin heboudia a abiva. Hebou e ore murinai, ipidi reḡedia taoni ai a kamonai. Ipidi na dounu e hapouva ela bona malo.” June 1, Wednesday dabai heatu na e bada herea. “Taunimanima haida na ema bena e hamaoromai dika basia davari totona, namona na karaharaḡa Convention Hall baiala.” Una dainai, Tadikaka Hill, adavana bona natuna 5 na Convention Hall ela. Unuseniai kopi korema tatau bona hahine 3,000 heḡereḡerena, na gavamani ese e siaidia amidia ese e gimadiava, bona unu ami edia ḡaukara ta na heatu bae hadokoa.

Una negai, kopi kuro tadikakana Arthur Claus na asi ena gari ida abi hidi ta e karaia. Ia na e gwa: “Na kamonai Greenwood ibounai lalonai heatu, henaohenao, bona ruma igabudia karana na e dika herea neganai, turagu namona, Tadikaka Hill na haitaia.”

Arthur Claus ese study class ta ai The Harp of God bukana amo maraḡidia 14 e hadibadia

Tadikaka Hill ena ruma ai e kau neganai, kopi kuro tauna ta e itaia imana mai ipidina ida gini. Una tau na Tadikaka Hill turana ta bona e laloava Arthur na e heatuva tauna ta. Arthur e lolo henia eto: “Oi be dahaka dainai ina tau ena gabu oma?”

Arthur na e gwa: “Bema nala badina basinama gwauraia namonamo reana bema pidigu. Na hamaoroa, lau na Tadikaka Hill turana bona nega momo ena ruma na laova.” Arthur bona una tau ese Tadikaka Hill ena ruma e gimaia dainai ḡau ta se henaoa.

Gabeai, Arthur na e diba Tadikaka Hill bona ena ruma bese na Convention Hall ai. Arthur na e hamaoroa kopi korema taudia ese una gabu na basie rakatania ela bona General Barrett, una gabu e itaia taova tauna, ese gwaumaoro pepana baine sainia. Arthur na e gwa: “Una general baina hahereva henia na auka. Egu plen na hamaorolaia neganai, ia ese e nanadaigu: ‘Oi ese ina ruma bese bo naria dibamu, a?’ Bona mai moalegu ida na gwa, ‘Oibe.’”

Arthur ese gwaumaoro pepana e abia neganai, maoromaoro ela Convention Hall. Ia ese una pepa na ami ofesa ma ta e haheitalaia neganai, ia na eto: “Ina pepa na general ese e sainia! Oi mai dibamu, oi na hari dina ai taunimanima ginigunana, ina gabu amo ta bo lasilaiamu?” Gabeai, Tadikaka Hill bona ena ruma bese na e davaridia. Iboudiai Arthur ena motuka ai e gui bena ruma ela.

Tadikaka Claus ese Tadikaka Hill bona ruma bese na e gimadia. Tadikaka Claus na tadikakana idurudia karana ai se gari bona una ese haida na e durudia. Arthur na e gwa: “Tadikaka Hill ena ruma e gimaia tauna ese Iehova ena Witnes taudia na e matauraidiamu, dia guna heḡereḡerena. Bona taunimanima haida ese Basileia sivaraina na e abia dae, badina e itaia ita ese taunimanima kopidia kaladia na asita lalomu, bona Dirava ena taunimanima padadiai ita iboudai na he’heḡereḡere.”

a Laḡani 1937 ai The Golden Age ladana e haidaua Consolation bona laḡani 1946 ai e gwauraia Awake!