Iehova Ihesiai Henina ai mai Moaleda ida Baita Kara Diba Ḡaudia Baita Kara

1. Dahaka ese moale bada baine henida diba?

IEHOVA na e uramu baita moale. Una na ta dibamu badina moale na iena lauma helaḡa ena huahua ta. (Gal. 5:22) Ḡau ihenina ena moale na bada, to ḡau iabina ena moale na maraḡi dainai, bema mai kudouda idoinai ida eda Kristen hesiai ḡaukara baita karaiamu bona dala idauidau ai tadikakada baita durudiamu, baita moalemu.​—Apos. 20:35.

2-3. (a) Galatia 6:4 ena hereva heḡereḡerena, dahaka ḡau rua ese baine duruda diba Iehova ena hesiai ḡaukara lalonai eda moale basita haboioa? (b) Ina atikol ai dahaka baita herevalaimu?

² Galatia 6:4 ai e torea heḡereḡerena, aposetolo Paulo ese eda moale basita haboioa daladia rua e herevalai. (Ba Duahia.) Ginigunana na, Iehova ihesiai henina ai baita kara diba ḡaudia baita kara na ḡau badana. Bema unu baita kara tomamu, namona na baita moale. (Mat. 22:36-38) Iharuana na, ta karamu ḡaudia na ma haida e karamu ḡaudia ida basita haheḡereḡere. Eda goada, eda treinin, eiava eda diba heḡereḡerenai ta karamu ḡaudia ta haḡuḡurumu neganai, namona na Iehova baita tenkiu henia. Badina ḡau iboudiai na iena amo ta abi. Danu, bema haida na hesiai ḡaukara ena kaha haida ai e kwalimumu, namona na idia daidiai baita moale badina edia diba na e ḡaukaralaiamu Iehova e hanamoamu, dia ladadia e abi isimu eiava edia ura ḡaudia e karamu. Una dainai namona na dia idia ida baita kara helulu, to idia amo diba baita abi.

³ Ina atikol ai, baita itaiamu, bema ta hemamimu eda hesiai ḡaukara ai ḡau haida na basita kara diba hemamina baita haheaukalaia dalana baita herevalaiamu. Danu Iehova ese e henida dibana, herevana ia be dahaka, baita ḡaukaralaia namonamo diba daladia bona ma haida edia haheitalai amo diba baita abi daladia baita herevalaimu.

TA HEMAMIMU ḠAU HAIDA NA BASITA KARA DIBA NEGANAI

4. Dahaka ese laloda baine hamanokaia diba? Haheitalai ta a gwauraia.

⁴ Iehova ena hesiai taudia haida na laḡanidia e badamu bona e gorerediamu dainai ḡau haida na da basie kara dibamu. Carol enai una na e vara. Guna ia na pablisa na dia momo gabunai hesiai ḡaukara e karava. Una nega ai, ia na Baibul stadi 35 e karadiava bona idia haida na e durudia ela bona edia mauri e gwauhamatalai bona e bapatiso. Carol ena hesiai ḡaukara ese anina e havaraia! Bena gabeai ia na e gorerea, bona ena gorere dainai hanaihanai ruma ai e nohova. Carol na e gwa, “Dibagu egu gorere dainai haida ese e kara dibamu ḡaudia na basina kara dibamu, to na mamiamu, egu abidadama na dia idia edia abidadama heḡereḡerena. Na uramu baina kara ḡaudia na basina kara dibamu dainai na lalohekwarahimu, una ihaheaukalaina egu ai na auka.” Carol na e uramu ena goada heḡereḡerena Iehova baine hesiai henia. Momokani, ena kara dainai hahenamo baine abi na namo! Ta diba momokanimu eda Dirava, hebogahisi bada Diravana ese iena kara na e laloa badamu.

5. (a) Bema ta lalometaumu badina ḡau haida na da basita kara dibamu, dahaka baita laloatao na namo? (b) Laulau heḡereḡeredia, edena dalai ena be tadikaka ta ena mauri dalana na e idau to hanaihanai Iehova ena hesiai ḡaukara ai baine kara diba ḡaudia mo e kara?

⁵ Bema nega haida oi na basio karaia diba ḡauna ta dainai o lalomanokamu, sibomu ba henanadai, ‘Iehova be e uramu lau be dahaka baina kara?’ Hari ba karaia diba ḡauna mo ba karaia​—herevana una be dahaka. Mani ina haheitalai a laloa: Taihu ta laḡanina 80 na e lalomanoka badina hesiai ḡaukara ai guna laḡanina 40 ai e karava ḡaudia na da basine kara diba. E laloamu ena be baine kara diba ḡaudia e karamu, to una ese Iehova na se hamoalea. To una be momokani, a? Mani a laloa. Bema taihu na laḡanina 40 ai bona laḡanina 80 ai baine kara diba ḡaudia mo e kara, Iehova ese unu iboudiai na e abi daemu. Bema ta hemamimu eda hesiai ḡaukara ese Iehova na se hamoaleamu, namona na baita helalotao Iehova sibona ese baine abia hidi, dahaka be ia baine hamoalea eiava dahaka be lasi. Bema baita kara diba ḡaudia baita karamu, Iehova na be gwaumu: “Namo herea!”​—Mataio 25:20-23 ida ba haheḡereḡerea.

6. Maria ena haheitalai amo dahaka ta dibamu?

⁶ Baita moale dibamu bema baita kara diba ḡaudia baita lalomu, to basita kara diba ḡaudia basita lalomu. Taihu ta ladana Maria mani a laloa, ena gorere dainai hesiai ḡaukara ai ḡau haida na basine kara diba. Matamanai, e lalohekwarahi bona e lalo ia na asi anina. To gabeai ena kongrigeisin ai taihu ta e laloa, ia na ena gorere dainai bedi ai mo e hekureva, bona Maria na e laloa baine durua na namo. Maria na gwa, “Dala na kara ia ida telefon bona revareva amo baia haroro. Nega iboudiai a ḡaukara heboumu muridiai ruma na laomu neganai, na moalemu badina lau ese bamogu na na durua.” Ita danu baita moale dibamu bema baita kara diba ḡaudia mo baita lalomu dia basita kara ḡaudia. To bema Iehova ena hesiai ḡaukara ma haida ai ḡau momo baita kara diba eiava baita karadia namonamo diba, be ede bamona?

BEMA MAI EMU DIBA ḠAU TA AI ​—“BA ḠAUKARALAIA”!

7. Edena sisiba namona be Petro ese Kristen taudia e henidia?

⁷ Aposetolo Petro na ena revareva ginigunanai, tadikaka e sisiba henidia edia diba bona bae kara diba ḡaudia amo tadikakadia bae hagoadadia. Petro na e gwa: “E ahulaimui ḡaudia na ba hariharilai [eiava ba ḡaukaralai, NWT], Dirava ena harihari-bada ireḡuna taudia ai baola.” (1 Pet. 4:10) Dia namo haida bae mama eiava bae lalomanoka dainai eda diba na basita ḡaukaralaia. Bema unu baita kara tomamu, ita ese baita kara diba ḡaudia iboudiai Iehova na asita heniamu.

8. Korinto Ginigunana 4:6, 7 ena hereva heḡereḡerena, dahaka dainai Iehova ese e henida harihari ḡauna na basita heaḡilaia?

⁸ Iehova ese e henida harihari ḡaudia na baita ḡaukaralai, to baita henari namonamo basita heaḡilaidia na namo. (1 Korinto 4:6, 7 ba duahi.) Heḡereḡere, reana Baibul stadi ihamatamadiai oi na mai emu diba. Una harihari ḡauna ba ḡaukaralaia na namo! To una harihari ḡauna ba ḡaukaralaia be ḡau ta bona ba heaḡilaia be ma ḡau ta. Bema vanegai hesiai ḡaukara lalonai stadi matamatana ta o hamatamaia. Bo ura dikadikamu haroro grup ai una ba herevalaia. To haroro grup ola neganai, taihu ta na magasin ta e hariharilaia sivaraina e gwauraiamu. Ia be magasin ta e hariharilaia; oi be stadi ta o hamatamaia. Dahaka bo karamu? Mai dibamu emu ai e vara ḡauna ese grup na be hagoadaiamu, to namona na ba nari ma nega maorona ta ai una sivarai ba gwauraia, unu amo magasin e hariharilaia taihuna ena moale basio koua. Una na hebogahisi karana. To namona na Baibul stadi ihamatamadia karana na basio hadokoa. Una na Iehova ese oi e henimu harihari ḡauna​—ba ḡaukaralaia!

9. Eda harihari ḡaudia be ede baita ḡaukaralai toma na namo?

⁹ Namona na baita helalotao baita kara diba ḡaudia na Dirava ena harihari ḡaudia. Unu harihari ḡaudia na baita ḡaukaralai kongrigeisin baita durua, dia siboda ladada iabi-isidia totona. (Fili. 2:3) Bema eda goada bona diba baita ḡaukaralaimu Dirava ena ura baita karaiamu, baita moalemu​—dia haida baita kara-tanidia eiava baita hereadia dainai, to ta uramu unu harihari ḡaudia na baita ḡaukaralai Iehova baita hanamoa.

10. Dahaka dainai baita kara diba ḡaudia na ma haida e karamu ḡaudia ida baita haheḡereḡere na asi anina?

¹⁰ Ta na basine henari namonamomu bema baine kara diba ḡauna na ma ta basine karaia diba ḡauna ida baine haheḡereḡeredia neganai. Heḡereḡere, reana tadikaka ta na pablik tok na be heni namonamomu. Una na ia baine karaia diba ḡauna. To reana kudouna ai, ia ese tok se heni namonamomu tadikakana na baine laloa maraḡi. To reana una tadikaka na heabi-dae tauna, natuna na e hadibadiamu, bona haroro ḡaukarana na e goadalaiamu. Ta moale dikadikamu badina mai edia diba tadikaka taihu momo na Iehova ese e henidia harihari ḡaudia e ḡaukaralaimu Ia e hesiai henia bona ma haida bae durudia!

HAIDA EDIA HAHEITALAI AMO DIBA BAVABI

11. Dahaka dainai baita hekwarahi Iesu ena haheitalai baita tohotohoa na namo?

¹¹ Ena be ta karamu ḡaudia na, haida e karamu ḡaudia ida basita haheḡereḡere na namo, to abidadama taudia edia haheitalai amo namo baita abi diba. Una baita diba totona, mani Iesu aita laloa. Ena be ia na ḡoevadae, to ena kara bona e kara ḡaudia amo diba baita abi diba. (1 Pet. 2:21) Bema baita hekwarahi ena haheitalai baita tohotohoa, Iehova ihesiai henina taudia namodia ai baita laomu bona eda hesiai ḡaukara na baita karaia namonamomu.

12-13. King David ena amo dahaka ta dibamu?

¹² Baibul ai, abidadama tatau bona hahine momo edia haheitalai baita davarimu, ena be idia na dia ḡoḡoevadae to baita tohotohodia diba. (Heb. 6:12) Mani King David a laloa, Iehova ese e gwauraia “egu lalokau tauna” eiava, Baibul ma ta ese ini e gwauraia toma, “lau e hamoalegu badamu tauna.” (Apos. 13:22) To, David na dia ḡoevadae. Ia na kara dika badadia haida e kara. Ena be enai unu e vara toma, to ita edai ia na dounu haheitalai namona. Dahaka dainai? Badina ena kerere dainai sisiba e abi neganai, ena kerere baine laoahu totona sibona ena maoro na se gwaurai. To ia ese sisiba auka na e abia dae bona mai kudouna idoinai ida e karaia kererena amo e helalo-kerehai. Una dainai, Iehova ese ena dika na e gwauatao.​—Sal. 51:3, 4, 10-12.

¹³ David ena amo diba baita abi diba bema siboda baita henanadai: ‘Lau ese sisiba herevadia be ede na lalo tomamu? Egu kerere be na gwaurai hedinarai haraḡamu, eiava egu kerere baina laoahu totona, egu maoro na gwauraimu? Lau ese gwau be haida na henidiamu, a? Lau na hekwarahimu egu kererena ma basina karaia lou, a?’ Abidadama tatau bona hahine ma haida sivaraidia Baibul ai o duahimu neganai, henanadai unu bamodia ba heni diba. Edia hekwakwanai be oiemu hekwakwanai heḡereḡerena, a? Idia be ededia kara namodia e hahedinarai? Unu sivarai ta ta o duahimu neganai, ba henanadai: ‘Dahaka baina kara diba, ina Iehova e badinaia tauna ena haheitalai baina tohotohoa?’

14. Edena dala ai tadikaka taihu edia haheitalai baita haeromu karana amo namo baita abimu?

¹⁴ Tadikaka taihu eregabedia bona iahudia edia haheitalai baita haeromu neganai, namo baita abi dibamu danu. Heḡereḡere, emu kongrigeisin ai mai ena abidadama ida turana ena hedibaḡani karana, ruma bese edia daḡedaḡe karana, eiava gorere e haheaukalaiamu tadikakana ta o taihuna ta o laloamu, a? Una tadikaka o taihu ese e hahedinarai karadia o itamu bona o uramu ba tohotoho, a? Una tadikaka o taihu ena haheitalai namona bo haeroamu neganai, o davariamu hahetohona ba haheaukalaia daladia haida bo dibamu. Ta moale dikadikamu badina unu tadikaka edia haheitalai na ta itamu bona baita tohotoho diba​—momokani unu ese e hamoaleda badamu!​—Heb. 13:7; Iak. 1:2, 3.

EMU HESIAI ḠAUKARA IEHOVA ENAI BA MOALELAIA

15. Aposetolo Paulo be edena sisiba e heni, una ese baine duruda dounu eda hesiai ḡaukara Iehova enai baita moalelaia diba?

¹⁵ Kongrigeisin ai maino bona lalotamona baita havaraia totona, ita ta ta na baita kara diba ḡaudia baita kara na ḡau badana. Mani Kristen ginigunadia aita lalodia. Iehova ese idia ta ta na harihari ḡaudia idauidau bona ḡaukara idauidau e henidia. (1 Kor. 12:4, 7-11) To unu ese idia na se hakara heluludia bona se hapararadia. To, Paulo ese e hagoadadia edia harihari ḡaudia na bae ḡaukaralai ‘Keriso tau-anina o kongrigeisin bae hagoadaia totona.’ Paulo ese Efeso taudia e tore henidia neganai, e gwa: “Rege ta ta ena ḡaukara ena ḡaukara e karamu; unu amo tau-anina e bada oho bada ohomu, bona lalokau ai e tubumu.” (Efe. 4:1-3, 11, 12, 16) Paulo ena sisiba e badinaia taudia ese maino bona lalotamona e havaraia​—unu na hari ina nega ai eda kongrigeisin ai ta itamu karadia.

16. Laloda baita hadai dahaka baita kara na namo? (Heberu 6:10)

¹⁶ Namona na laloda baita hadai ta karamu ḡaudia na ma haida e karamu ḡaudia ida basita haheḡereḡeredia. To, namona na Iesu ena amo diba baita abi, bona baita hekwarahi ena kara baita tohotohoa. Baibul ese e herevalai taudia bona hari ina negai abidadama taudia edia haheitalai amo namo baita abi. Baita kara diba ḡaudia ta karamu lalonai, namona na baita abia dae momokani Iehova “na asi ena kara gageva-gageva” una dainai eda ḡaukara na basine lalodia boiomu. (Heberu 6:10 ba duahia.) Hanaihanai Iehova ihesiai henina ai baita moale, badina ta dibamu mai kudouda idoinai ida Ia ta hesiai heniamu karana na e moalelaiamu.