Emu Kristen Helarona Ba Hagoadaia

1. Iehova ese ita be edena helaro e henida?

IEHOVA ese ita na mauri hanaihanai helarona e henida. Haida edia helaro be guba ai basie mase diba maurina bae abia. (1 Kor. 15:50, 53) To, momo edia helaro be tanobada ai mauri hanaihanai bae abia, basie goreremu bona be moalemu. (Apok. 21:3, 4) Ena be guba ai eiava tanobada ai baita mauri hanaihanaimu, to eda helaro na baita laloa bada.

2. Iseda helaro badina korikori be dahaka, bona dahaka dainai unu ta gwau tomamu?

² Baibul ai ina hereva “helaro,” anina na “asita daradaramu to ta dibamu ta narimu ḡau namodia na bae vara.” Ta diba momokanimu eda vaira nega helarona na baine vara momokani, badina una na Iehova ena gwauhamata. (Roma 15:13) Mai dibada ia be dahaka e gwauhamatalai, bona ta dibamu ia na hanaihanai ena hereva na e haḡuḡurumu. (Num. 23:19) Ta abia dae momokanimu Iehova na mai ena siahu bona e uramu baine kara ḡaudia iboudiai na baine haḡuḡurudia. Una dainai, eda helaro na dia lalohadai mo eiava nihi ta; lasi, to hahemomokani ḡaudia daidiai ia na helaro momokanina.

3. Ina atikol ai dahaka baita herevalaimu? (Salamo 71:5)

³ Tamada gubai e nohomu ese ita na e lalokau henidamu, bona e uramu baita abidadama henia. (Salamo 71:5 ba duahia.) Iehova enai eda helaro be goadamu neganai, hahetoho na baita haheaukalaimu bona mai eda goada bona moale ida vaira negana baita nariamu. Mani eda helaro ese e gimadamu dalana aita herevalaia. Baita itaiamu ededia dala ai eda helaro na dogo ta bona kwara ḡauna ta heḡereḡeredia. Bena eda helaro baita hagoadaia dalana baita herevalaiamu.

EDA HELARO NA DOGO TA HEḠEREḠERENA

4. Edena dalai helaro na dogo ta heḡereḡerena? (Heberu 6:19)

⁴ Heberu taudia e tore henidia revarevana ai, aposetolo Paulo ese eda helaro na dogo ta ida e haheḡereḡerea. (Heberu 6:19 ba duahia.) Paulo na nega momo bouti amo e laolaova dainai, mai dibana dogo ese bouti na e dogoatao aukamu basine hure oho totona. Nega ta, ia na bouti ta ai e gui kau bena e laova lalonai lai badana ta e toa. Una lai gubana lalonai, ia na e itaia bouti e tariva taudia ese dogo e nege dobi davara ai, unu amo bouti bae dogoatao auka, nadi ai basine tata kau helaoreana. (Apos. 27:29, 39-41) Dogo ese bouti e dogoatao aukamu heḡereḡerena, eda helaro ese ita e hagoadadamu, lai gubadia na heto hekwakwanaidia bae vara neganai, Iehova ena amo basita hure oho. Eda helaro goadana ese be durudamu hahetoho badadia baita haheaukalaidia, badina mai dibada ḡau iboudiai na be namomu. Ba helalotao, Iesu na e gwa ita na daḡedaḡe baita davari. (Ioa. 15:20) Una dainai Iehova ena gwauhamata ilalo dobuna karana ese be durudamu dounu Iehova baita hesiai henia.

5. Edena dala ai Iesu na helaro ese e hagoadaia ena be dibana baine mase?

⁵ Iesu na dibana ia na baine hisihisi ela bona baine mase, to helaro ese ena abidadama e hagoadaia dalana mani a laloa. Pentekoste 33 C.E. ai, aposetolo Petro na Salamo bukana amo peroveta herevana ta e gwauraia bona una na Iesu ena lalogoada karana e herevalaia, eto: “Hidiogu na helaro ai baine taruha; Badina be laumagu na mase taudia edia gabu ai basio rakatania, Bona emu Helaḡa Tauna na basine pata. . . . Oi vairamu itana ai egu moale baine ḡuḡuru.” (Apos. 2:25-28; Sal. 16:8-11) Ena be Iesu na mai dibana ia na baine mase, to e abia dae momokani Dirava ese baine hatorea isi lou bona mai moalena ida guba ai Tamana ida bae hedavari lou.​—Heb. 12:2, 3.

6. Tadikaka ta ese helaro be ede e herevalaia toma?

⁶ Helaro ese eda tadikaka bona taihu momo e durudia bae haheauka. England ai e nohova tadikakana ladana, Leonard Chinn, ena haheitalai aita laloa. Tanobada Tuarina Ginigunana lalonai, ia na e hadiburaia badina se ura tuari lalonai baine vareai. Hua rua bamona dibura rumana ta ai sibona e nohova, una murinai e doria ḡaukara aukadia e karava. Ia na e gwa: “Egu ai e vara ḡauna amo na laloparara, baita haheauka totona eda helaro baita hagoadaia na ḡau badana. Baibul lalonai Iesu, aposetolo taudia, bona peroveta taudia edia haheitalai e sivarailai bona gwauhamata namodia momo mimia. Unu iboudiai ese vaira nega helarona e henidamu bona e hagoadadamu baita haheauka.” Leonard enai helaro na dogo ta heḡereḡerena, bona ita edai danu.

7. Edena dalai hekwakwanai ese eda helaro e hagoadaiamu? (Roma 5:3-5; Iakobo 1:12)

⁷ Hekwakwanai ta haheaukalaimu bona Iehova ena heduru ta mamiamu neganai, ta lalopararamu ia ese ita na e lalonamo henidamu. Una ese eda helaro na e hagoadaiamu. (Roma 5:3-5; Iakobo 1:12 ba duahi.) Una dainai, hari eda helaro na goada, dia sivarai namona ta abia dae matama negana heḡereḡerena. Satana na e uramu hekwakwanai ese bae hamanokada, to Iehova ena heduru amo hekwakwanai na baita hanaidia dibamu.

EDA HELARO NA KWARA ḠAUNA TA HEḠEREḠERENA

8. Edena dalai helaro na kwara ḡauna heḡereḡerena? (1 Tesalonika 5:8)

⁸ Baibul ese danu eda helaro na kwara ḡauna ida e haheḡereḡerea. (1 Tesalonika 5:8 ba duahia.) Soldia ta na kwara ḡauna amo kwarana e gimaiamu inaina ese basie haberoa totona. Eda lauma tuarina ai, namona na laloda baita gimaia unu amo Satana ese basine hadikaia. Ia ese hedibaḡani bona lalohadai idauidau e ḡaukaralaimu eda lalohadai baine hadikaia totona. Kwara ḡauna ese soldia kwarana e gimaiamu heḡereḡerena, eda helaro ese eda lalohadai e gimaiamu, unu amo Iehova na dounu baita badinaia.

9. Dahaka be varamu bema ta na asi ena helaro?

⁹ Mauri hanaihanai helarona ese be durudamu mai eda aonega bona laloparara ida abi hidi maorodia baita karamu. To danu, bema eda helaro be manokamu bona siboda eda ura baita lalo badamu, mauri hanaihanai helarona na baita laloaboio dibamu. Idaunegai Korinto ai e nohova Kristen taudia haida ediai e vara ḡauna mani a laloa. Idia ese Dirava ena gwauhamata badana ta​—toreisi lou helarona​—na asie abidadama henia. (1 Kor. 15:12) Paulo na e gwa toreisi lou helarona asie abia daemu taudia na hari ina nega maurina mo e laloa badamu. (1 Kor. 15:32) Hari Dirava ena gwauhamata asie abidadama heniamu taudia momo danu unu bamona, idia na ina negai edia mauri bae moalelaia daladia mo e lalo badamu. To, ita na Dirava ese e gwauhamatalaia vaira negana ta laloa badamu. Eda helaro na kwara ḡauna heḡereḡerena, eda lalohadai e gimaiamu, bona e durudamu siboda basita helalo, badina una ese eda hetura karana Iehova ida na baine hadikaia diba.​—1 Kor. 15:33, 34.

10. Edena dalai helaro ese lalohadai koikoidia amo baine gimada diba?

¹⁰ Eda helaro ese danu be gimada dibamu bena basita laloamu ita na dia heḡereḡere Iehova baita hamoalea. Heḡereḡere, haida na be lalomu: ‘Lau na mauri hanaihanai bae abia taudia padadiai na basina nohomu. Lau na dia heḡereḡere. Dirava ena taravatu iboudiai na basina badina dibamu.’ Idaunegai Iobu e hagoadaia koikoi tauna Elifasa na unu bamona lalohadai kererena e ḡaukaralaia. Elifasa na e gwa: “Taunimanima be dahaka, bena baine ḡoevaḡoeva diba?” Bena, Dirava e herevalaia, eto: “A itaia, Dirava ese ena helaḡa taudia se abidadama henidiamu, bona guba na dia ḡoevaḡoeva ia vairanai.” (Iobu 15:14, 15) Unu na hereva koikoidia! Ba helalotao Satana na e uramu oi na unu ba lalo toma. Ia na mai dibana bema unu lalohadai bo abimu neganai, emu helaro na metairametaira bo haboioamu. Una dainai, unu lalohadai koikoidia na ba dadarai, bona Iehova ena gwauhamata ba lalodia bada. Ba diba momokani Dirava na e uramu oi na ba mauri hanaihanai bona ia ese oi na be durumumu.​—1 Tim. 2:3, 4.

EMU HELARO BA HAGOADAIA

11. Eda helaro baine ḡuḡuru negana ta nariamu lalonai dahaka dainai baita haheauka na ḡau badana?

¹¹ Eda helaro baita hagoadaia na mai hekwarahina. Dirava ena gwauhamata baine haḡuḡurudia negana ta nariamu lalonai, reana nega haida baita hesikumu. To, Iehova na e noho hanaihanaimu dainai, ia ese nega e laloamu dalana na idau ita eda amo. (2 Pet. 3:8, 9) Ia ese e gwauhamatalai ḡaudia na be haḡuḡurudiamu, to dia ita ta laloamu negana ai be karaiamu. Dirava ese ena gwauhamata baine haḡuḡurudia negana ta nariamu lalonai, dahaka ese baine duruda diba eda helaro baita hagoadaia totona?​—Iak. 5:7, 8.

12. Heberu 11:1, 6 heḡereḡerena, edena dalai helaro na abidadama ida e herevalaidia hebou?

¹² Eda helaro na baita hagoadaiamu bema Iehova, helaro e henida Diravana, dekedekenai baita nohomu. Baibul na e gwa eda helaro baita hagoadaia totona, namona na baita abidadama Iehova na e maurimu bona “ia e tahuamu taudia davadia namodia baine henidia.” (Heberu 11:1, 6 ba duahi.) Bema baita abia daemu Iehova na e nohomu, baita diba momokanimu ia ese ena gwauhamata iboudiai na be haḡuḡurudiamu. Mani eda hetura karana Iehova ida baita hagoadaia daladia haida aita herevalai unu ese eda helaro bae hagoadaia diba.

13. Edena dalai Dirava baita raka henia kahi diba?

¹³ Iehova ba ḡuriḡuri henia, bona ena Hereva ba duahia. Ena be Iehova na asita itaiamu, to ia na baita raka henia kahi diba. Eda ḡuriḡuri ai ia baita hereva henia diba, dibada ia ese ita na be kamonai henidamu. (Ier. 29:11, 12) Dirava baita kamonai henia dalana na, iena Hereva baita duahia bona baita laloa dobu. Iehova ese ia e badinaia taudia e naridia daladia baita duahimu neganai, eda helaro na be goadamu. Dirava ena Hereva lalonai e tore ḡaudia iboudiai na “ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.”​—Roma 15:4.

14. Dahaka dainai Iehova ese haida daidiai e kara ḡaudia na baita lalodia?

¹⁴ Iehova ese ena gwauhamata e hamomokani daladia ba lalo dobu. Dirava ese Abraham bona Sara dainai e kara ḡaudia mani aita lalo. Idia na natudia na basie havara diba badina buburuka heherea. To, Dirava ese e gwauhamata henidia natudia ta bae havaraia. (Gen. 18:10) Abraham be dahaka e kara? Baibul na e gwa: “Abidadama dainai e helarova; taunabunai ia na bese loḡora tamadia ai ela.” (Roma 4:18) Ena be taunimanima edia rohoroha ai Abrahama na asi dibana Dirava ena gwauhamata be ede baine hamomokani toma, to ia na e abia dae vaitani Iehova ese ena gwauhamata na baine haḡuḡurudia. Una abidadama tauna na se lalohisihisi. (Roma 4:19-21) Sivarai unu bamodia ese e hadibadamu Iehova na hanaihanai ena gwauhamata na e haḡuḡurumu, ena be taunimanima edia roharoha ai una na basine vara diba.

15. Dahaka dainai Dirava ese ita daidai e kara ḡaudia baita lalodia na namo?

¹⁵ Iehova ese oi daimu ai e kara ḡaudia ba lalodia. Dirava ena Hereva ai e tore gwauhamatadia, vada e ḡuḡuru ḡaudia amo namo o abi dalana mani ba laloa. Heḡereḡere, Iesu na e gwauhamata ia Tamana ese eda dabu ḡaudia na baine henida. (Mat. 6:32, 33) Danu Iesu na e gwa Iehova ena amo lauma helaḡa bo noiamu neganai be henimumu. (Luka 11:13) Iehova ese unu gwauhamata na e haḡuḡuru. Ia ese oi daimu ai e haḡuḡuru gwauhamata ma haida danu ba lalodia diba. Heḡereḡere, ia na e gwauhamata emu dika baine gwauatao, baine hagoadamu, bona lauma dalanai baine ubumu. (Mat. 6:14; 24:45; 2 Kor. 1:3) Dirava ese oi daimu ai vada e kara ḡaudia bo lalodia dobumu neganai, una ese emu helaro, vaira negai oi daimu ai baine kara ḡaudia ai, na be hagoadaiamu.

HELARO AI BA MOALE

16. Dahaka dainai helaro na harihari ḡauna namona ta?

¹⁶ Eda mauri hanaihanai helarona na harihari ḡauna Dirava amo. Ta moalemu badina vaira nega namo hereana ta nariamu​—dibada vaitani una na be vara momokanimu. Una helaro na dogo heḡereḡerena, ena be hahetoho bona daḡedaḡe baita davari, eiava bae hamaseda diba to una ese e durudamu baita haheauka. Danu helaro na kwara ḡauna heḡereḡerena, laloda e gimaiamu unu amo lalohadai kereredia baita dadarai diba bona lalohadai maorodia baita abi. Baibul amo ta dibaia helarona ese e durudamu Dirava baita dibaia namonamo bona e hahedinaraiamu Ia ese ita na e lalokau henida badamu. Eda helaro baita hagoadaiamu neganai, namo bada baita davarimu.

17. Dahaka dainai eda helaro ese moale e havaraiamu?

¹⁷ Aposetolo Paulo ese Roma taudia e tore henidia neganai, e gwa: “Helaro ai ba moale.” (Roma 12:12) Paulo na e moale badina e diba bema ena abidadama ai baine gini goada, ia na guba ai baine mauri hanaihanai diba. Ita danu eda helaro ai baita moale badina dibada Iehova ese ena gwauhamata na be haḡuḡurumu. Salamo itorena tauna na e gwa: “Dirava ese e kahaiamu tauna na e moalemu; ena helaro be Iehova, ena Dirava . . . ena heabidadama na e hesiriu hanaihanaimu.”​—Sal. 146:5, 6.