Iehova Ena Hesiai Ḡaukara Lalonai Na Moalelaia Maurina

EGU FAMILI

Tamagu bona sinagu na Swiss amo Canada ema, bena Ontario ai mining taonina ta ladana Timmins ai e nohova. Lau na laḡani 1934 ai na vara. Laḡani 1939 ai, sinagu na Watchtower magasin e duahi matama bona Iehova ena Witnes taudia edia hebou e laova. Lau bona a vara hebou taudia siks danu e laohaimaiva. Se daudau, ia na Iehova ena Witnes ta ai ela.

Tamagu ese iena abi hidi na se moalelaia, to sinagu ese hereva momokani na e ura heniava dainai lalona e hadaia baine badinaia. Ia na unu e kara toma, ena be laḡani 1940 ela 1945 lalodiai Canada ai Iehova ena Witnes taudia edia ḡaukara na e taravatua. Bona hanaihanai sinagu ese tamagu na e kara namo heniava bona e matauraiava, ena be Tamagu ese e kara auka heniava. Iena haheitalai namona dainai lau bona a vara hebou taudia na hereva momokani a abia dae.Tamagu ena kara e haidaua bona ai e kara namo henimaiva dainai, ai na a moale.

FUL-TAIM HESIAI ḠAUKARANA NA HAMATAMAIA

August 1950 ai, lau na Theocracy’s Increase hebouhebouna nala New York City ai. Tanobada heḡeḡemadai amo tadikaka taihu idauidau na hedavari henidia, bona Gilead Skuli amo e gradueit taudia edia ekspiriens na kamonai murinai, na ura Iehova ena hesiai ḡaukara ma haida baina kara! Una nega ai lalogu na hadaia ful-taim hesiai ḡaukara ai baina vareai. Emai gabu na lou lao neganai, maoromaoro regula painia aplikeisen na hahonua. Canada brens ofis ese revareva amo e hadibagu, namona na baina bapatiso guna. Bena October 1, 1950 ai na bapatiso. Hua ta murinai, regula painia ḡaukarana na hamatamaia bona egu asainmen ginigunana na nala Kapuskasing. Una gabu na daudau herea egu famili e nohova gabuna amo.

Laḡani 1951 ai brens ofis ese French gado mai dibadia tadikaka taihu e noidia French gado provinsna Quebec baela. Unuseni ai pablisa na dia momo dainai heduru e urava. Lau na tubu daeva neganai French bona English gado na herevalaiava, una dainai una noinoi na na abia dae bona e siaigu Rouyn nala. Unuseni ai ta asi dibagu to e henigu adresina mo, ina sivarai matamana ai name herevalaia heḡereḡerena. To ḡau iboudiai na e heau namonamo. Lau Marcel ida na tura namodia ai ala, bona laḡani foa lalodiai Quebec ai egu hesiai ḡaukara na na moalelaia, danu unuseniai spesol painia ḡaukarana na karaia.

GILEAD BONA EMAI URA ḠAUDIA

Lau na Quebec ai lalonai, e invaitigu South Lansing, New York ai, Gilead Skuli ena klas 26 bainala, una dainai na moale. Emai gradueisen dinana na February 12, 1956 ai, bona egu asainmen na hari e gwauraiamu gabuna Ghana,b West Africa ai. To do baina lou lao Canada “wiki haida” baina nari ela bona egu travel documents bae redi.

To lau na Toronto ai hua 7 na nari unu documents daidiai. Una nega ai Cripps famili ese e abigu dae idia ida na noho, bona natudia kekenina Sheila ida a manada. Bena raruosi a heura heheni. Na ura baina hamaoroa ia na na ura heniamu bona na uramu baina adavaia neganai, egu visa na abia. Lau Sheila ida na una a ḡuriḡurilaia murinai lalomai a hadai namona na lau na egu asainmen gabuna bainala. To ai na dounu a hetore heheniva unu amo baia diba bema ai na vaira nega ai baia headava diba. Una na disisin aukana, to e vara ḡaudia ese e hahedinaraia, ai na abi hidi maorona a karaia.

Lau na hua ta lalonai trein, kohu uda kadana, bona plein amo na travol murinai, Accra, Ghana ai na gini dae. Unuseni ai distrik inarina ḡaukarana e henigu. Una dainai, Ghana ibounai, Ivory Coast (hari e gwauraiamu Côte d’Ivoire) bona Togoland (hari na Togo) danu nala. Nega momo brens ese e heni motukana amo siboḡu na laova. Bona tadikaka ivadivadidia na moalelaia bada!

Wiken ai seket heboudia a abiva. Ai na asi emai Assembly Hall dainai, tadikaka ese baubau bona pamu raudia amo kalaga e karava, dina siahuna ikouna. Bona aniani gabuna na asi frisana dainai tadikaka ese animal mauridia haida danu e atodia unu amo hebou taudia totona bae ḡaukaralaidia diba.

Unu hebou badadia ai kiri ḡaudia haida danu e vara. Misinari tadikakana ta Herb Jenningsc ese tok ta e heniva lalonai boromakau ta na platfom bona helai taudia padadia amo e heau hanai. Herb ese ena tok na e hadokoa bona toana na boromakau na e daradara. To tadikaka goadadia foa ese e dogoatao bona e loulaia aniani gabuna, bona helai taudia na e moale.

Hebou wikidia lalodiai, lau ese iseda muvi: The New World Society in Action na badi hanuadia taudia ediai na haheitalaidiava. Au rua ai palai waitina ta na kwatuava una muvi baina halasia totona. Hanua taudia ese una muvi na e ura heniava! Momo ediai una na nega ginigunana muvi ta e itaia. Una muvi ai e itava taunimanima e bapatisova neganai, mai moaledia ida imadia e poupouva. Una muvi e itaia taudia na e durudia bona e laloparara tanobada heḡeḡemadai ai iseda orea na lalotamona oreana.

Laḡani rua Africa ai na noho murinai, New York City ai intanesinol hebouna nala, una na laḡani 1958 ai. Sheila na itaia dainai na moale, ia na Quebec amo ema, unuseniai ia na spesol painia ḡaukarana e karaiava. Ai na revareva amo a hetore heheniva ela bona una nega ai ma a hedavari lou, bona na nanadaia baia headava neganai, egu noinoi na e abia dae. Tadikaka Knorrd na tore henia bona na nanadaia bema Sheila na Gilead skul bainela bena murinai Africa bainema. Egu noinoi na e abia dae. Bena Sheila na ema Ghana. October 3, 1959 ai Accra ai a headava. A mamia Iehova ese ai na e hanamomai, badina emai mauri ai ia a atoa guna.

CAMEROON AI IEHOVA A HESIAI HENIA HEBOU

Laḡani 1961 ai, ai na e siaimai Cameroon ala. Tadikaka ese e noigu brens ofis matamatana baia haginia dainai, na bisi bada hereava. Bona brens matamatana inarina ḡaukarana dainai, ḡau momo baina diba na namo. Laḡani 1965 ai Sheila na e rogorogo. Oibe, emai lalohadai ai tama sina ai baiala na taina e auka. To emai maduna matamatana a moalelaiava bona plen a karava Canada baia loulao neganai, ḡau dikana ta e vara bona una ese kudoumai na e hamakohia.

Emai beibi na boga ai e mase. Bona dokta ese e hadibamai ia na mero. Una na laḡani 50 gunanai e vara, to asia laloa boiomu. Ena be kudoumai na e hisihisi bada, to idau tano ai emai asainmen na a ura henia dainai asia rakatania.

Cameroon ai, tadikaka na nega momo e daḡedaḡe henidiava, badina politikol lalodiai asie vareaiva. Vouti negadiai daḡedaḡe na e bada hereava. May 13, 1970 ai, asia urava baine vara ḡauna ta e vara, una neganai Iehova ena Witnes taudia na gavamani ese edia ḡaukara e taravatua. Hua faiv lalonai a noholaia brens matamatana bona hairaina na gavamani ese e abia. Wiki ta lalonai, misinari iboudiai—lau bona Sheila danu—e hamaoromai una tano baia rakatania. Emai ai na e auka tadikaka taihu baia rakatanidia badina a lalokau henidiava bona a lalo hekwarahva idia ediai be dahaka be varamu.

Ai na France brens ofis ai hua siks a noho. Unuseni ai Cameroon tadikakadia idurudia ḡaukaradia na karava. To December ai, ai na e siaimai Nigeria brens ala, bena unu amo Cameroon ḡaukarana a nariava. Tadikaka taihu ese mai edia lalokau ida e abimai dae bona ai na mai moalemai ida unuseni ai hesiai ḡaukarana a karaia.

DISISIN AUKANA

Laḡani 1973 ai, ai na disisin aukana ta a karaia. Sheila na gorere badana ta e haheaukalaiava. Hebou badana ta totona New York ala neganai, Sheila na e tai bona e hamaorogu: “Lau na da dia heḡereḡere! Nega momo e goreregumu dainai asi goadagu.” West Africa ai laḡani 14 mai kahana lalodiai ia na lau ida hesiai ḡaukara a karaia. Iena haheauka bona abidadama karadia dainai na moaleva, to namona na ḡau haida baia haidaudia. A herevehereva bona a ḡuriḡurilaia loulou murinai, disisin a kara Canada baia lou lao, unuseni ai iena helt dainai heduru baine abi helaoreana. Emai misinari asainmen bona ful-taim hesiai ḡaukara baia rakatanidia na disisin aukana.

Canada ai a kau murinai, ḡaukara ta na davaria turagu namona ta enai, ia na taoni ta ai Toronto ena not kahanai motuka e hoihoilaiva bisnesina e nariava. Ai na ruma ta a rentiava, dava maraḡi kohudia a hoiva, unu amo basia abitorehai. Asia urava kohu momo maurina baia manadalaia, badina a urava gabeai ful-taim hesiai ḡaukarana ma baia karaia lou. Se daudau una na e vara.

Norval Ontario ai, Assembly Hall matamatana e haginiava dainai, Saturday iboudiai nalaova konstraksen ḡaukarana iduruna. Gabeai tadikaka ese e noigu Assembly Hall inarina ḡaukarana baina karaia. Sheila ena helt na e namova dainai ai na a hemami, emai asainmen matamatana na baine karaia diba. Bena June 1974 ai, una Assembly Hall rumana ai a noho. Ful-taim hesiai ḡaukara ai ma a vareai lou dainai a moale!

Bona Sheila ena helt na e namo e laova dainai a moale. Laḡani rua muridiai emai ai na e heḡereḡere seket ḡaukarana baia karaia. Una seket ḡaukarana na Canada provinsna ta Manitoba ai, una gabu na paraka herea. To tadikaka taihu edia hebamo namona na a moalelaia, a dibaia ḡaunana ena be edeseniai ta nohomu to ḡau badana na dounu Iehova baita hesiai henia.

MAI ANINA BADA ḠAUNA TA NA DIBAIA

Laḡani haida seket ḡaukara a karaia murinai, 1978 ai tadikaka ese e boirimai Canada Betele ai baia ḡaukara. Se daudau e vara ḡauna ta amo mai anina ḡauna ta na dibaia, ena be mai hisihisina. Asainmen ta e henigu Montreal ena hebou ta ai hora ta mai kahana French gado ai tok ta baina heni. To egu tok na helai taudia ese asie lalopararalaia una dainai, Service Department amo tadikaka ta ese e sisiba henigu. Una negai nama diba, lau na tok na asina heni namonamo. Una tadikaka ena sisiba na asina moalelaia, emai herevehereva na se namo bona lau na na lalohisihisi badina na laloava ia na egu kerere mo e itadia, to hahenamo herevana ta se gwauraia. Egu kerere na, lau ese sisiba e heni tauna bona e sisiba henigu dalana na asina lalodia maoromaoro.

Dina haida muridiai Brens Komiti ta ese una ḡau dainai e hereva henigu. Bena na hamaoroa lau ese una sisiba na asina abia dae bona na gwa lau na na kerere. Una murinai e sisiba henigu tadikakana na sori henia neganai, ia ese egu sori herevana na e abia dae bona egu dika e gwau tao. Unu amo na diba manau karana na mai anina bada bona una na basina laloa boiomu. (Her. 16:18) Nega momo Iehova enai na ḡuriḡruilaia murinai bona lalogu na hadaia sisiba na baina abi.

Lau na Canada Betelena ai laḡani 40 mai kahana vada name noho, bona 1985 amo, na abia hahenamona na Brens Komiti ḡaukarana na karaia. February 2021 ai, adavagu lalokauna Sheila na e mase. Ia na namisia bada hereamu, bona lau danu egu helt na dia namo. To Iehova ena hesiai ḡaukara ai doini na bisimu bona na moalemu dainai unu hekwakwanai na ‘asina lalodia badamu.’ (Koh. 5:20) Ena be egu mauri lalonai hekwakwanai momo na davari, to na moalelai ḡaudia ese unu na e hereadia. Egu mauri lalonai Iehova na atoa guna bona laḡani 70 ful-taim hesiai ḡaukara na karaia na hahenamo badana. Matamata taudia daidiai na ḡuriḡurimu idia ese nega iboudiai Iehova bae atoa guna, badina na dibamu unu be kara tomamu neganai mauri namona be moalelaiamu. Una na Iehova ihesiai henina karana amo e varamu.