1924​—Laḡani 100 Gunanai

RADIO STATION AMO E HAROROVA

Laḡani ta mai kahana lalodiai Betele tadikakadia na WBBR radio station e haginiava Staten Island, New York City ai. Tano e lailaia murinai, idia ese unuseniai bae ḡaukara taudia edia ruma badana ta e haginia bona badinai kohu bae ato gabuna ta e haginia. Una ḡaukara e haorea neganai, tadikaka ese radio ai bae halasi ḡaudia e heḡaeḡaelai. To problem haida e davari.

Tadikaka na e hekwarahiva radio station ena antena badana bae haginia. Una antena ena lata na 91 mita, bona idia na e urava au latadia rua, 61 mita heḡereḡerena padadia ai, bae tauadae. Matamanai na asie heḡereḡere. To, Iehova ena heduru dainai, gabe ḡauna ai e kwalimu. Una projek ai e heduru tauna ta na Calvin Prosser, ia na ini e gwa toma: “Bema matamana ai una antena itaudaena ai baiama kwalimu, reana sibomai baiama heimodai!’” Tadikaka ese na Iehova e hanamoa. To hekwakwanai ma ta e vara.

Radio broadcasting da dounu dala matamata dainai, una projek ai bae ḡaukaralai kohudia bae hoi na auka. Una dainai tadikaka na tau ta sibona ese e karaia transmitter ta (500-watt) e ḡaukaralaia. Bona microphone ta se hoia, to telefon ta e ḡaukaralaia. February huana lalonai hanuaboi ta, tadikaka na e urava unu kohu iboudiai bae tohodia, bona program ta bae broadcast dainai, Kingdom anedia e abiva. Tadikaka Ernest Lowe ese una dina ai e vara ḡauna na ini e herevalaia toma. Ia na e gwa, tadikaka na ane e abiva lalonai, Judge Rutherfordb ese e rini henidia bona e gwa, Brooklyn ai tadikaka ese e abiva anedia na radio amo e kamonaiva, ena daudau na 25 kilomita heḡereḡerena.

Tadikaka Rutherford ese unu tadikaka e vasi hamaorodia: “Ena reḡe dikana na a hadokoa. Umui na e kara o lolomu na heto!” Tadikaka na mai hemaraidia ida kara-haraḡa transmitter e vasi koua. To, una nega amo idia na e laloparara edia broadcast ginigunana vada bae halasia diba.

Laḡani 1924 February lalonai, broadcast ginigunana ai, Tadikaka Rutherford na e gwa, una radio station na bae ḡaukaralaia Keriso eda King ese e henidia ḡaukarana bae karaia. Danu ma e gwa, una radio station na baine he-ḡaukaralai “taunimanima iboudiai bae durudia Baibul ena hereva bae lalopararalaia bona ina nega oromana anina bae dibaia.”

Una broadcast ginigunana na momo ese e kamonaia. Una radio station (WBBR) na laḡani 33 lalonai e ḡaukaralaia Iehova ena taunimanima edia program bae halasi totona.

ASI GARIDIA IDA TOMADIHO IGUNALAIDIA TAUDIA EDIA KOIKOI KARADIA E GWAURAI HEDINARAI

Laḡani 1924 July lalonai, Bible Student taudia na hebou badana ta totona ela Columbus, Ohio. Bible Student na tanobada ena kaha ta ta amo ela, bona idia ese tok iboudiai na Arabic, English, French, German, Greek, Hungary, Italy, Lithuania, Polish, Russia, Scandinavia, bona Ukraine gado ai e kamonai. Una program kahana haida na radio amo e halasia, bona Ohio State Journal e noidia una hebou ena dina ta ta ai e vara ḡaudia na niuspepa ai bae toredia.

Thursday, July 24 ai, tadikaka taihu 5,000 mai kahana na hebou baine heabi gabuna ai e harorova. Idia ese buka iboudiai 30,000 mai kahana e hariharilai bona Baibul stadi tausen momo e hamatama. The Watch Tower ese una dina e herevalaia neganai, eto: “Una na hebou ai e moalelaia bada herea negana.”

Friday, July 25 ai, Tadikaka Rutherford na ena tok ta ai pepa ta e duahia lasi, una pepa ai tomadiho igunalaidia taudia edia koikoi karadia e gwaurai hedinarai. Ia na e gwa, politikol oreadia, tomadiho, bona bisnes biagudia ese “taunimanima e koudiamu Dirava ena Gavamani ena hereva momokani bae dibaia totona, asie dibamu Dirava ese una Gavamani amo taunimanima be hanamodiamu.” Danu, e hahedinaraia unu tatau na kekerere badina “League of Nations e duruamu bona e gwaumu ‘Dirava ese una gavamani amo tanobada e lohiaiamu.’” Bible Student taudia ese una sivarai na mai edia boga-auka ida bae harorolaia.

Gabeai The Watch Tower magasin ese una hebou badana na ini e herevalaia toma, eto: “Columbus Hebouhebouna ai ela taudia iboudiai na abidadama goadana ida una hebou gabuna e rakatania . . . , herevana daḡedaḡe bae davari, to una hebou ese idia na goada e henidia asi garidia ida bae haroro.” Leo Claus, una hebou ela tadikakana ta, na ini e gwau toma: “Una hebou murinai ai na mai moalemai ida ala emai teritori ai una sivarai baia harorolaia.

October lalonai, Bible Student taudia ese pepapepa ta ladana, Ecclesiastics Indicted e printia bona kope milion momo e hariharilai. Una pepapepa lalonai na Tadikaka Rutherford ese ena tok ai e duahia herevadia e tore. Taoni maraḡina ta Cleveland, Oklahoma ai, Tadikaka Frank Johnson na ena pepapepa e hariharilaidia ore dainai, e nariva tadikaka bona taihu ese bae udaia, to ia na miniti 20 bamona do baine nari. Bona gabu lahia-lahiana ai baine nari na dia namo badina una taoni ai, ena haroro ḡaukara asie moalelaia tataudia na ia e tahuava. Bena Tadikaka Johnson na dubu ta ai e komu. Una dubu na asi tauna dainai, ia ese Ecclesiastics Indicted pepapepana na haroro tauna ena Baibul lalonai bona sea ta ta latadia ai e ato. Una murinai kara-haraḡa una dubu amo e raka lasi. To ena taim na dounu bada dainai, ma dubu rua lalodiai e vareai bona una pepapepa e rakatania.

Frank na e heau ela ia bae udaia gabuna. Bena fuel station ta murinai e komu, unu amo ia e tahuava taudia baine itadia. Unu tatau na motuka amo e heau hanai, to Frank na se itaia. Se daudau una taoni badinai e harorova tadikaka bona taihu haida na motuka amo ela Frank dekena, e udaia bena una gabu e rakatania.

Tadikaka ta na e gwa: “Una taoni a rakataniava lalonai, unu dubu toi a heaudia hanai. Kahirakahira taunimanima 50 mai kahana a itadia unu dubu ta ta vairadiai gigini. Taunimanima haida na una pepapepa e duahiava, ma haida be haroro tauna e haheitalaiava. Namo be hekwakwanai ta do se vara ai, una gabu a rakatania! To eda Dirava, Iehova a tenkiu henia badina ia ese ai e gimamai bona aonega e heni inaimai edia amo baia heau mauri.”

ASI GARIDIA IDA TANO MA HAIDA AI E HAROROVA

Bible Student taudia na asi garidia ida tano ma haida ai e harorova. France ena not kahana ai, Józef Krett ese mine ai e ḡaukarava taudia (Poland amo ema taudia) e haroro henidiava. Nega ta tadikaka ese e boiria unuseniai tok ta baine heni, sinadona na “The Resurrection of the Dead Soon.” Tadikaka bona taihu ese invateisin pepadia na taunimanima e henidiava neganai, una gabu ai e nohova haroro tauna ta ese ena dubu taudia e hamaorodia, ta una hebou basinela. To, ena hereva anina na se vara. Taunimanima 5,000 mai kahana ela una tok bae hakala henia, una haroro tauna danu ela! Tadikaka Krett ese una haroro tauna e hamaoroa e abidaeva ḡaudia badidia baine herevalai, to una tau na se ura. Tadikaka Krett na ena tok murinai, dekenai mimia bukadia iboudiai na ela taudia e henidia, badina idia momo na e urava Dirava ena hereva amo diba ma haida bae abi.—Amos 8:11.

Africa ai, Claude Brown ese sivarai namona na Gold Coast—hari e gwauraiamu Ghana—ai e harorolaia. Unuseni ai momo ese hereva momokani e kamonai badina tok momo e heni bona pablikeisin momo herea e hariharilai. John Blankson, pharmacist ḡaukarana e stadilaiava tauna ta, ese Tadikaka Brown ena tok ta e kamonaia. Kara-haraḡa e laloparara hereva momokani vada e davaria. John na e gwa: “Hereva momokani dainai na moale bada herea, una dainai egu pharmacy skulina ai taunimanima momo ediai na diba ḡaudia na herevalaiva.”

Nega ta, John na Anglican edia duba ta ela bona edia priest enai Toi Tamona e henanadailaia, badina John na Baibul amo e diba una hahediba herevana na koikoi. Una priest ese e lulua bena eto: “Oi na dia Kristen tauna; oi na Diabolo natuna. Iniseni amo a siri!”

John na ruma ela neganai, una priest e tore henia, bona e boiria pablik gabuna ta ai, priest ese Toi Tamona hahediba herevana e abia daemu badina baine herevalaia. Una priest ese John e tore henia bona e hamaoroa, pharmacy skul edia teacher badana baine itaia. Una teacher ese John e nanadaia ia ese una priest e tore henia, eiava lasi.

John e haere eto: “Oibe sir.”

Teacher ese John e hamaoroa revareva amo una priest baine sori henia. Una dainai, John na ena revareva ai ini gwau toma:

“Sir, Egu teacher ese eme hamaorogu baina tore henimu bona oi baina sori henimu, bona na uramu unu baina kara toma, to guna namona na ba gwau hedinarai oi o hahedibalaiamu herevana na koikoi.”

Egu teacher na e hoa, bona lau e nanadaigu, “Blankson, oi ba torea ḡauna una?”

“Oibe, Sir. Lau na una mo ba toreamu.”

“Oi na ina skuli amo be kokimumu, bema gavamani ese e duruamu dubu ena priest na unu o hereva henia tomamu!”

“To, Sir, . . . bema oi ese lesen ta o hadibamaimu bona una lesen ena point haida na asia lalopararalai, ai na mai emai maoro oi baia nanadaimu, ani?”

“Oibe.”

“Una dainai, Sir, lau danu unu na kara toma. Una tau na Baibul ena hereva e hahedibalaiva dainai na henanadai. Bema ia na dia heḡereḡere egu henanadai baine haerelaidia, dahaka dainai lau o dorigumu revareva ta baina torea bena baina sori henia?”

Blankson na skuli amo se kokia. Bona sori revarevana ta se siaia.

VAIRA NEGANA E LALOA

The Watch Tower ese una laḡani ai e vara ḡaudia na ini e herevalai toma: “David ena hereva bamona, ita danu baita gwa diba: ‘Oi ese goada o hariolaigu, baina tuari totona.’ (Salamo 18:39) Ina laḡani lalonai eme vara ḡaudia ese ita na eme hagoadada, badina Iehova ese eme duruda iena hesiai ḡaukara baita karaia namonamo totona. Iena hesiai taudia na mai moaledia ida sivarai namona e harorolaia.”

Gabeai una laḡani tamona lalonai, tadikaka ese plen e kara radio station ma ta bae karaia. Una radio station na Chicago, U.S.A. ai e haginia. Una station matamatana ladana na e hatoa: HEREVA. Idia ese transmitter badana (5,000-watt) ta e ḡaukaralaia, unu amo gabu daudaudia—heḡereḡere Canada ena not kahadia—ai e nohova taudia ese Dirava ena Gavamani ena sivarai bae kamonai diba.

Laḡani 1925 ai, Iehova ese tadikaka e durudia Apokalupo karoa 12 anina e lalopararalaia namonamo. Una laloparara matamatana dainai haida ese Iehova ihesiai henina karana e hadokoa. To, momo na e moale badina guba ai e vara ḡaudia ese Dirava ena taunimanima tanobada ai bae durudia dalana e lalopararalaia.