Tadikaka Bona Taihu Ida Baita Nohomu Na Namo!

1-2. Dahaka be mai anina bada Iehova enai bona ia be e uramu dahaka baita kara?

ITA ese ma haida ta kara henidiamu dalana na mai anina bada Iehova enai. Iesu na e gwa dekeda taudia baita lalokau henidia, siboda ta helalokau henimu na heto. (Mat. 22:​37-39) Una anina na Iehova asie hesiai heniamu taudia danu baita kara namo henidia. Bema unu baita kara tomamu, ita na Iehova Dirava ta tohotohoamu, ia ese “ena dina na kara dika taudia bona kara namo taudia latadiai e hatataia dae rohamu, medu danu kara maoromaoro taudia bona kara kerere-kerere taudia latadiai e hadihoamu.”—Mat. 5:45.

² Ena be Iehova ese taunimanima iboudiai na e lalokau henidiamu, to ia e badinaiamu taudia hari e lalokau henidia badamu. (Ioa. 14:21) Ia na e uramu ita ese ia baita tohotohoa. Tadikaka bona taihu ida baita “helalokau heheni” bona baita “hemataurai heheni.” (1 Pet. 4:8; Roma 12:10) Varavarada bona turada ediai lalokau ta hahedinaraiamu heḡereḡerena, tadikaka bona taihu ediai danu baita hahedinaraia.

3. Ma haida ilalokau henidia karana baita habadaia totona, dahaka baita kara be namo?

³ Flaoa ta na baine tubu namonamo totona, ḡau haida baita kara na namo. Una heḡereḡerena ai, lalokau na baita naria na namo. Aposetolo Paulo ese Kristen taudia e sisiba henidia, eto: “Nega iboudiai tadikakamui ba lalokau henidia.” (Heb. 13:​1, NWT) Iehova na e uramu nega iboudiai ma haida baita lalokau henidia. Ina atikol ai, baita herevalaimu ḡaudia na dahaka dainai eda tadikaka baita lalokau henidia bona edena dala amo hanaihanai una lalokau baita hahedinaraia.

TADIKAKA IDA BAITA HELALOKAU HEHENI BADINA

4. Salamo 133:1 ena hereva heḡereḡerena, edena dala ai eda tadikaka bona taihu ida maino ai baita noho hanaihanai? (Laulau danu ba itadia.)

⁴ Salamo 133:1 ba duahia. Salamo itorena tauna ena hereva na maoro, Iehova e lalokau heniamu taudia ida baita nohomu na “namo” bona “mai moalena.” Ta na au ta e itaiamu na mai hairaina, to dina ta ta ai una au e itaia louloumu dainai, be hesikulaiamu. Tadikaka na mai edia namo, to ta itadia louloumu dainai, ta hesikulaidiamu. Dahaka ese baine duruda unu amo tadikakada na hanaihanai baita lalodia badamu? Eda tadikaka taihu ilalokau henidia karana na be badamu bema baita lalomu idia na mai anidia bada kongrigeisin ai bona ita ta ta edai.

5. Ta enai be dahaka be vara diba bema tadikaka taihu edia lalokau karana be mamiamu neganai?

⁵ Edia nega ginigunana hebou ela taudia ese tadikaka bona taihu edia helalokau heheni karana e ita bona e mamia dainai, una ese lalodia e veri bena hereva momokani e abia dae. Iesu na e gwa: “Unu amo taunimanima iboudiai bae diba umui na lauegu hahediba: ba helalokau heheni dainai.” (Ioa. 13:35) Mani Chaithra ena ekspiriens aita itaia, ia na iunivesiti ai e skuliva bona Iehova ena Witnes taudia ida e stadiva. Ia ese rijinol hebouhebou ena inviteisin ta e abia dae bena ela e ha hebou. Ena hebou dinana ginigunana murinai, ia ese ena stadi kondakta e hamaoroa, eto: “Sinagu bona tamagu ese ini na se karagu tomamu. To ina dina tamona lalonai, taunimanima 52 ese mai moaledia ida eme rosigu! Iniseniai Iehova ena lalokau korikorina name mamia. Na uramu idia na egu femli ai baela.” Chaithra na ena stadi e goadalaia bona ena mauri ai ḡau haida e haidau bena 2024 ai e bapatiso. Oibe, kamonai taudia ese eda ḡaukara namodia bona tadikaka taihu edia helalokau heheni karadia e ita, unu ese lalodia e veri bena Iehova ena hesiai taudia ai ela.—Mat. 5:16.

6. Edena dala ai tadikaka bona taihu edia helalokau heheni karana ese baine gimada?

⁶ Tadikaka bona taihu edia helalokau heheni karana ese ita na baine gimada diba. Paulo ese Kristen taudia e hamaorodia, eto: “Daba daba idoidiai ba hahealo heheni, . . . kara dika ena koikoi ese lalomui baine ha-auka na garina.” (Heb. 3:13) Bema baita lalomanokamu bena kara maorona ikarana basita goadalaiamu, Iehova ese tadikaka o taihu ta be ḡaukaralaiamu ita be durumumu. (Sal. 73:​2, 17, 23) Heduru unu bamodia na mai edia namo ita edai.

7. Edena dala ai lalokau bona lalotamona e ḡaukara heboumu? (Kolose 3:​13, 14)

⁷ Ita na ta ḡaukara goadamu ta ta, ta helalokau hehenimu, una dainai hahenamo momo ta moalelaimu. (1 Ioa. 4:11) Heḡereḡere, lalokau amo ta ta, ta ‘haheauka hehenimu,’ bona lalotamona ai ta nohomu. (Kolose 3:​13, 14 ba duahidia; Efe. 4:​2-6) Una dainai, eda hebou ai, ta heduru hehenimu bona hebamo namona ta moalelaiamu. Ina tanobada ai, orea ta ese ini kara na se hahedinaraiamu.

TA TA BAITA HEMATAURAI HEHENI

8. Edena dala ai Iehova ese e durudamu eda tadikaka bona taihu ida lalotamona ai baita noho?

⁸ Iehova dainai tadikaka bona taihu na tanobada heḡeḡemadai ai lalotamona ai e nohomu, ena be idia na dia ḡoḡoevadae. (1 Kor. 12:25) Baibul ese ita na ini e gwauraida toma, “Dirava ese vada e hadibamui umui ta ta ba helalokau heheni.” (1 Tes. 4:9) Una na heḡereḡere, Iehova ese Baibul amo baita kara ḡaudia na e hadibadamu, bema ena hahediba herevadia baita stadilaimu bona baita badinamu neganai, ta ta na baita helalokau hehenimu. (Heb. 4:12; Iak. 1:25) Bona Iehova ena Witnes taudia na e ḡaukara goadamu unu bae kara toma.

9. Ta ta baita helalokau heheni karana ai Roma 12:​9-13 amo dahaka ta dibamu?

⁹ Baita helalokau heheni totona Dirava ena Hereva ese ita be ede e duruda tomamu? Paulo ese Roma 12:​9-13 ai e gwaurai ḡaudia mani aita ita. (Ba duahidia.) Ia na ina hereva e gwauraia, ita ese “hemataurai heheni karana na baita hahedinaraia guna.” Una hereva anina be dahaka? Namona na mai eda ura ida ma haida ediai “hemataurai heheni” karadia baita hahedinarai, heḡereḡere dika baita gwautao, ma haida baita abidia dae, bona dala idauidau ai harihari bada karana baita hahedinaraia. (Efe. 4:32) Basita nari to ita ese unu kara baita hahedinarai guna. Iesu na e gwa: “Ḡau ihenina be namo bada, ḡau iabina be namo maraḡi.”—Apos. 20:35.

10. Edena dala ai baita ḡaukara goada unu amo baita “hemataurai heheni”? (Laulau danu ba itaia.)

¹⁰ Paulo na e gwa, ita ese hemataurai heheni karana baita hahedinaraia guna, una murinai ma e hahegoada, eto “ḡaukara lalonai basio lahedo.” E ḡaukara goadamu tauna na mai kudouna idoinai ida asainmen e abimu ḡaudia na e haḡuḡurumu. Hereva Lada-isidia 3:​27, 28 ese ita na e hagoadada, eto: “Ihanamona na mai badina bae abia taudia edia amo basio rua, ba henidia diba negana ai.” Una heḡereḡerena, bema ta na heduru e uramu, kara haraḡa baita durua eda goada heḡereḡerena ai. Namona na ita na basita nari ia iduruna ai; eiava basita lalo ta ese ia na be duruamu.—1 Ioa. 3:​17, 18.

11. Dahaka ese baine duruda unu amo baita helalokau heheni?

¹¹ Ma haida ediai hemataurai karana baita hahedinaraia dalana ma ta na se kara namo henidamu neganai, edia dika baita gwautao. Efeso 4:26 na e gwa: “Dina do basine diho ai emu badu baine doko.” Dahaka dainai? Siri 27 na e gwa “lalomui iduaradia basio keho Diabolo ena.” Baibul ai, Iehova ese ita na e hamaoroda louloumu eda dika baita hegwautao heheni. Kolose 3:13 ai e hagoadada “emui dika ba hegwau tao heheni.” Haida edia kerere baita gwautaomu ese dala be kehoamu idia turadia namona ai baita laomu. Bema unu baita kara tomamu, ‘lauma ena lalo-tamona baita kahua taomu, bona maino ena iḡui ai baita nohomu.’ (Efe. 4:3) Momokani, dika igwautaona karana ese maino bona lalotamona e havaraiamu.

12. Edena dala ai Iehova ese be durudamu dika baita hegwautao hehenimu?

¹² Vaia, edai na be aukamu se kara namo henidamu o laloda e hahisimu taudia edia dika baita gwautao. To Dirava ena heduru amo ita ese edia dika na baita gwautao diba. Paulo na ini hahegoada herevadia e tore, “ba hemataurai heheni” bona ba “ḡaukara goada.” Una murinai, ma e gwa: “Lauma na lalomui ai baine hururu.” Una hereva anina na Dirava ena lauma helaḡa ena heduru dainai, ta ta baita hemataurai bona baita hegwautao hehenimu mai kudouda idoinai ida. (Roma 12:11) Una dainai ita na hanaihanai Iehova ta noiamu baine duruda.—Luka 11:13.

“HEIRIHEIRI NA BOGARAḠIMUI AI BASINE VARA”

13. Heiriheiri bogaraḡimui ai be dahaka ese e havaramu?

¹³ Kongrigeisin lalonai “taunimanima [na] idauidau” bona edia mauri daladia na idauidau. (1 Tim. 2:​3, 4, NWT) Una dainai, dabua ikaradia, toada ihanamodia daladia, eda helt, eiava moale karadia ai eda abi hidi danu idauidau. Bema basita henari namonamomu, unu ḡau ese bogaraḡidai heiriheiri be havaramu. (Roma 14:4; 1 Kor. 1:10) Dirava ese na vada e hadibada ta ta baita helalokau heheni, una dainai baita henahua toho, basitato eda abi hidi ese ma haida edia na e hereadia.—Fili. 2:3.

14. Nega iboudiai dahaka baita kara be namo, bona dahaka dainai?

¹⁴ Bema nega iboudiai baita heduru hehenimu bona baita hahegoada hehenimu kongrigeisin lalonai heiriheiri na basine varamu. (1 Tes. 5:11) E manoka taudia eiava kongrigeisin amo e atodia lasi taudia momo na orea e lou henia. Mai manauda ida ta abidia daemu! (2 Kor. 2:8) Mani e manoka taihuna enai e vara ḡauna a laloa, ia na laḡani ten muridiai Kingdom Hall e lou henia. Ia na e gwa, “Kingdom Hall ai momo ese e kiri heniguva bona e sekehaniguva.” (Apos. 3:19) Una ese ia be ede e durua toma? Ia na ma e gwa, “Na mamia Iehova ese lau na e duruguva moale korikorina ma baina abia lou.” Bema dala baita tahumu haida baita hagoadadia totona, Keriso ese ita na be ḡaukaralaidamu ‘tau boera taudia bona maduna metau taudia’ baita hagoadadiamu.—Mat. 11:​28, 29.

15. Edena dala ma ta ai kongrigeisin ai lalotamona baita havaraia diba? (Laulau danu ba itaia.)

¹⁵ Dala ma ta na ta gwauraimu herevadia ese lalotamona baine havaraia diba. Iobu 12:11 na e gwa: “Taia ese hereva e mamidia tohomu, udu ese aniani e mamidia tohomu na heto, ani?” Nanadu tauna ese aniani na e mamia toho gunamu bena gabeai e atoa lasimu haida ese bae ania. Una heḡereḡerena, do asita hereva neganai baita lalonamonamo guna bena gabeai baita hereva. (Sal. 141:3) Eda goal na hanaihanai baita diba momokani, baita gwauraiamu herevana ese ta baine durua, baine hagoadaia, bona e kamonaiamu taudia ese “harihari-bada bae abia.”—Efe. 4:29.

16. Daidia ese hahegoada herevadia bae gwaurai be namo?

¹⁶ Ḡau badana na headava tau bona tama sina ese edia hereva dalana amo ma haida bae hagoadadia. (Kol. 3:​19, 21; Tito 2:4) Elda taudia danu, Iehova ena mamoe oreana bae hagoadaia bona tauhalo bae henidia. (Isa. 32:​1, 2; Gal. 6:1) Baibul na e gwa: “Nega korikorina ai e gwauraiamu herevana be daka namo!”—Her. 15:23.

LALOKAU “KARA AI BONA MOMOKANI AI”

17. Edena dala amo baita diba ita na mai kudouda idoinai ida eda tadikaka bona taihu ta lalokau henidiamu?

¹⁷ Aposetolo Ioane ese ita na e hagoadada, namona na “eda lalokau na dia hereva amo, dia mala amo, a kara ai bona momokani ai baita hahedinaraia.” (1 Ioa. 3:18) Ita na ta uramu kudouda amo eda tadikaka bona taihu baita lalokau henidia. Edena dala ai una baita hahedinaraia? Bema tadikaka bona taihu baita bamodia momomu, eda helalokau heheni karana na be goadamu. Una dainai, nega baita ato hebou bona haroro negadia ai tadikaka bona taihu baita bamodia. Nega baita ato haida baita vadivadidia. Bema unu baita kara tomamu, ta hahedinaraiamu ita na ‘Dirava ese vada e hadibada ta ta baita helalokau heheni.’ (1 Tes. 4:9) Baibul ese e gwauraia herevana na momokani, “tadikaka bae noho hebou mai lalodia tamona, una na namo, bona mai moalena danu!”—Sal. 133:1.