Baita Laloparara Ita Na Ḡau Momo Do Asi Dibada

1. Edena dala ai Iehova ese ita na hoa dalanai e karada? Dahaka dainai Dirava ese ita na unu e karada toma?

IEHOVA ese ita na hoa dalanai e karada, badina ita na baita lalohadaimu, ḡau matamatadia baita dibamu, bona hereva matamatadia ibadinadia daladia baita lalopararalaimu. Dahaka dainai Dirava ese ita na unu e karada toma? Iehova na e uramu ita ese ‘Dirava idibana baita davaria’ bona mai aonegada ida ia isiaina baita lao heni.—Prov. 2:​1-5; Rom. 12:​1, NWT.

2. (a) Ita ese dahaka baita lalopararalaia na namo? (Job 37:​23, 24) (Laulau danu ba itaia.) (b) Ita na ta lalopararamu ḡau momo na do asi dibada. Una ese ita be dahaka e hadibadamu?

² Ena be ita na ḡau momo herea baita dibamu, to eda diba na mai hetoana. (Job 37:​23, 24 ba duahidia.) Iobu mani aita laloa. Iehova ese henanadai momo herea e heni neganai, Iobu na e laloparara ia na ḡau momo do asi dibana. Una dainai, Iobu na e manau bona ena lalohadai e hamaoromaoroa. (Job 42:​3-6) Ita danu baita laloparara ita na ḡau momo do asi dibada. Una dainai, ita na Iehova enai baita tabekau, badina ia na nega iboudiai ita e durudamu abi hidi maorodia baita kara totona.—Prov. 2:6.

3. Ina atikol ai ita be dahaka baita herevalaimu?

³ Ina atikol ai, ita na asi dibada ḡaudia haida bona una ese baine havara diba hekwakwanaidia baita herevalaimu. Danu baita itaiamu dahaka dainai ḡau haida basita diba na namo. Unu point ese ita be durudamu “aonega herea-dae Diravana,” Iehova, enai baita tabekau totona, badina ia ese hereva maorodia na ita be hadibalaidamu.—Job 37:16.

NEGA DOKONA BAINE KAU DINANA BONA HORANA NA ASI DIBADA

4. Metiu 24:36 ai eto ita be dahaka asi dibada?

⁴ Metiu 24:36 ba duahia. Nega dokona baine kau dinana bona horana na asi dibada. Iesu na tanobada ai e nohova neganai, ia danu “dina” bona “hora” na asi dibana.a Gabeai, ia ese aposetolo e hamaorodia, Iehova mo mai ena “siahu” ḡau haida bae vara negadia baine abidia hidi totona. (Apos. 1:​6, 7; NWT) Nega dokona baine kau dinana bona horana na Iehova ese idaunegai vada e abia hidi, to ita na asi eda maoro una dina bona hora baita dibaia.

5. Nega dokona baine kau dinana bona horana na asi dibada dainai, una ese ita edai be dahaka be havaraia dibamu?

⁵ Nega dokona baine kau dinana bona horana na asi dibada bona Iehova ena dina doini ta nariamu dainai, una ese hesiku o lalomanoka baine havaraia diba. Eiava readia eda ruma taudia bona ma haida edia hekirikirilai baita haheaukalai na auka. (2 Pi. 3:​3, 4) Reana ina lalohadai kererena na baita abiamu: ‘Nega dokona baine kau dinana bona horana baina diba na namo, unu amo lau na baina nari diba bona haida edia hekirikirilai karana na baina haheaukalaia diba.’

6. Dahaka dainai ina nega dokona ena ore negana asita dibaia na mai ena namo?

⁶ To, Iehova ese nega dokona baine kau ena deit se gwauraia badina be ina: Ia na e uramu ita ese baita hahedinaraia, ita na ia ta lalokau heniamu bona ta abidadama heniamu dainai, ia isiaina ta lao henimu. Una dainai, ita na ta uramu Iehova baita hesiai henia ela bona hanaihanai. Namona na ‘Iehova ena dina’ baine kau dinana o horana basita laloa momo, to una dina ai bae vara ḡau namodia hari baita lalodia. Una ese be durudamu, nega iboudiai Iehova dekedekenai baita nohomu, ia baita abidadama heniamu, bona ia ihamoalena karadia baita karamu.—2 Pet. 3:​11, 12; NWT.

7. Ita be dahaka mai dibada?

⁷ Ita mai dibada ḡauna na, nega dokona na 1914 ai e matama. Iehova na peroveta herevadia amo dia una laḡani mo e herevalaia, to una laḡani murinai bae vara ḡaudia iboudiai danu e gwauraidia. Una dainai, ta abia dae momokanimu “Iehova ena dina badana vada . . . kahikahi.” (Sef. 1:14) Danu ita dibada, Iehova na e uramu ḡaukara ta baita karaia, una na, ena “Gavamani sivaraina namona” na taunimanima momo herea ediai baita harorolaia. (Met. 24:14) Ita ese una sivarai namona na dia tano iboudiai 240 mo, to gado 1,000 ai ta harorolaiamu. Herevana ita ese “dina” bona “hora” baita diba o lasi, to ḡau badana na haroro ḡaukara hari baita karaia goadagoada.

IEHOVA DAHAKA BE KARAMU NA ASI DIBADA

8. Dahaka dainai Baibul eto: ‘Dirava ena ḡaukara danu asi dibada’? (Hahediba Tauna 11:5)

⁸ Iehova na ena ura baine haḡuḡurua totona, ia na ḡau ta be karaiamu eiava ḡau ta be varamu na ia ese basine kouamu. To dahaka dainai Baibul na eto: ‘Dirava ena ḡaukara danu asi dibada.’ (Hahediba Tauna 11:5 ba duahia.) Mani aita laloa: Ema bona hari, saiens taudia na doini asi dibadia rogorogo hahinena bogana lalonai beibi be ede e vara tomamu. Una heḡereḡerena, nega haida ai ita na basita dibamu dahaka dainai ḡau ta e vara na Iehova ese se koua eiava ia ese ita be ede be duruda tomamu.—Sal. 37:5.

9. Iehova be karamu ḡaudia na ita asi dibada dainai, una ese ita edai be dahaka baine havaraia diba?

⁹ Iehova ese ita ede be duruda tomamu na asi dibada dainai, reana abi hidi haida ikaradia ai na baita daradaramu. Heḡereḡere, readia ita na baita daradaramu dahaka baita kara, unu amo eda hesiai ḡaukara baita habadaia o pablisa dia momo gabudia baitala. Eiava reana ita na baita laloamu Iehova ese ita na se durudamu, badina ta ḡaukara goadamu to hahenamo ta asita abiamu, o haroro ta goadalaiamu to Baibul stadi ta asi ta davariamu, o orea ena project ta ai ta ḡaukara goadamu to hekou ḡaudia na momo.

10. Iehova ese ita ede be duruda tomamu na asi dibada dainai, ededia kara baita hahedinarai na mai anina bada?

¹⁰ Iehova ese ita ede be duruda tomamu na asi dibada dainai, baita manau na ḡau badana. Manau taudia na e lalopararamu, Iehova ena lalohadai bona dala ese idia edia na e hereadia. (Isa. 55:​8, 9) Danu, manau taudia na e abia dae vaitanimu, Iehova na dala maorona ai ḡau iboudiai na be hamaoromaorodiamu. Haroro ḡaukara o orea ena project ai ḡau namodia e varamu neganai, ita ese Iehova baita hanamoa. (Sal. 127:1; 1 Kor. 3:7) Bema ḡau haida na eda plen heḡereḡerena ai se varamu, namona na baita helalotao: Iehova ese ḡau iboudiai na e itamu. (Isa. 26:12) Ita na eda kaha mo baita karaia, bona nega iboudiai baita abia dae Iehova danu ena kaha be karaiamu. Ita dibada Dirava na dala momo ai ita be hakaudamu, badina gunaguna ia na hoa dalanai haida e durudiava.—Apos. 16:​6-10.

11. Ita mai dibada ḡaudia be dahaka?

¹¹ Ita dibada, nega iboudiai Iehova na lalokau, kara maoromaoro, bona aonega. Ita dibada, Iehova na ia ladana dainai ta karamu ḡaudia bona ena taunimanima ta durudiamu daladia na e lalo badamu. Bona ita dibada, Iehova ese ia e badinaiamu taudia davadia namodia na nega iboudiai e henidiamu.—Heb. 11:6.

ITA NA ASI DIBADA KERUKERU BE DAHAKA BE VARAMU

12. Jeims 4:​13, 14 ai eto ita be dahaka asi dibada?

¹² Jeims 4:​13, 14 ba duahidia. Hereva momokanina ta be ina: Ita na asi dibada kerukeru ita edai be dahaka be varamu. Ina tanobada ai, ita edai “dika na nega idauidau ai e vara kavamu.” (Koh. 9:​11, NWT) Una dainai, ita na asi dibada eda plen anidia be be varamu eiava eda plen anidia be ḡuḡurumu be matada ai baita itamu o lasi.

13. Ita na asi dibada gabeai be dahaka be varamu dainai, una ese ita edai be dahaka be havaraia dibamu?

¹³ Nega haida ai mase o metau badadia na ita edai e vara kavamu eiava ita e hahoadamu. Dika idauidau ese eda noho daladia na bae haidau taku, bona daradoko bona badu bae havara diba. Eda plan o ura ḡaudia se ḡuḡurumu negadiai, ita na ta lalohisihisimu bona ta lalomanokamu. (Prov. 13:12) Ḡau unu bamodia daidiai, nega momo ita na gabeai bae vara ḡaudia baita lalodia momomu. Una ese eda haheauka karana be tohoamu bona basita moalemu.

14. Edena dala ai ita na moale ai baita nohomu? (Laulau danu ba itadia.)

¹⁴ Herevana eda mauri ai dahaka baine vara, to ita ese Iehova baita hesiai henia badina ia na ta lalokau heniamu. Ita na Baibul sivaraidia amo ta dibamu dika idauidau lalodiai Iehova ese ita na basine gimadamu, bona ita edai gabeai dahaka baine vara ena plen na ia ese se karaiamu danu. Dirava dibana ita na baita moale dibamu, herevana asi dibada gabeai ita edai be dahaka be varamu. Momokani, bema ita ese Dirava baita noiamu eda mauri lalonai ita baine hakauda bona baine duruda ia baita badinaia neganai, ita na baita moalemu. (Jer. 10:23) Bema abi hidi ikaradia ai Iehova enai baita tabekaumu, ita na vaitani ta gwaumu: “Bema Iehova baine ura, ita na baita mauri, ini unu baita kara toma.”—Iak. 4:15; NWT.

15. Ita na mai dibada gabeai be dahaka be varamu?

¹⁵ Vaia ita na asi dibada dina ta ta ai be dahaka be varamu, to ita mai dibada Iehova na e gwauhamata mauri hanaihanai—guba ai o tanobada ai—na ita baine henida. Ita dibada Dirava na basine koikoimu bona ena gwauhamata iboudiai na be haḡuḡurudiamu. (Tito 1:2) Iehova sibona ese mo “bae vara ḡaudia bona do asie vara ḡaudia na gunaguna” vada e gwaurai. Peroveta herevadia iboudiai na Baibul negadia ai e ḡuḡuru bona vaira negai danu be ḡuḡurumu. (Isa. 46:​10, NWT) Ita dibada, Iehova ena lalokau ita edai na ḡau ta ese basine koua diba. (Rom. 8:​35-39) Ḡau iboudiai lalodiai baita haheauka totona, Dirava ese aonega, tauhalo, bona goada na ita e henidamu. Ita dibada, Iehova ese ita na be durudamu bona be hanamodamu.—Jer. 17:​7, 8.

IEHOVA ESE ITA E DIBADA NAMONAMO DALANA ILALOPARARALAINA NA AUKA

16. Salamo 139:​1-6 etomu Iehova ese ita na e dibada namonamo. Dahaka dainai una ilalopararalaina na auka?

¹⁶ Salamo 139:​1-6 ba duahidia. Ḡau iboudiai e havara Diravana na mai dibana ita be ede ta vara toma. Ia na mai dibana ita be dahaka ta lalohadailaimu bona dahaka hemami ta abimu. Ia dibana ita be dahaka baita gwauraimu bona kudoudai be dahaka mimia. Ia dibana ita be dahaka baita karamu bona badidia be dahaka. King David eto Iehova na nega iboudiai e noho heḡaeḡaemu bona ita na baine duruda diba. Oi be o moale dikadikamu badina oi e lalomu badamu Tauna na Siahu idoinai Diravana, Lohiabada, King, bona guba bona tanobada bona ḡau iboudiai e havara, a? David na eto: “Aonega enehetomana na hoalaia badamu; ia na atai ai, idavarina na asi dibagu.”—Sal. 139:6.

17. Dahaka dainai Iehova ese ita e dibada namonamo karana na nega haida ai ita ese baita daradaralaiamu?

¹⁷ Readia eda bese ai e vara ḡaudia, eda kastom, eiava dubu gunana ai ta badinava ḡaudia daidiai, Iehova ese ita e laloda badamu karana na baita daradaralaiamu. Eiava readia eda kerere gunadia daidiai baita lalomu Iehova na se uramu ita baine dibada, bona ita eda amo ia na daudau herea. Nega haida David na unu e lalo tomava. (Sal. 38:​18, 21) Eiava ta na e ḡaukara goadamu ena mauri dikana baine rakatania bona Dirava ena taravatu baine badina, to readia ia na ini be lalo tomamu, ‘Bema Dirava ese lau na e dibagu namonamo, dahaka dainai ia na e uramu lau ese na manadalaia mauri dalana baina dadaraia?’

18. Namona na baita abia dae Iehova ese ita na e dibada namonamo. Una ena namo be dahaka? (Laulau danu ba itadia.)

¹⁸ Namona na baita abia dae Iehova ese ita na e dibada namonamo bona ia ese ita edai na ḡau namodia haida e itamu. Ena be ia ese eda kerere na e itamu, to danu, ia ese eda lalohadai bona kara badidia na e lalopararalaimu dainai, ita na e lalokau henidamu. (Rom. 7:15) Namona na baita abia dae Iehova ese ḡau namodia haida na ita edai e itamu, una amo ita mai moaleda ida Iehova baita abidadama heniamu bona baita hesiai heniamu.

19. Iehova enai be dahaka mai dibada?

¹⁹ Ita na mai dibada Iehova na lalokau Diravana. (1 Jo. 4:8) Ita dibada ia na ita e lalokau henidamu bona e uramu ita na mauri namona baita moalelaia dainai, baita kara bona basita kara ḡaudia na e hadibadamu. Ita dibada Iehova na e uramu ita ese mauri hanaihanai baita abia. Una dainai, ia ese mauri idavalaina boubouna e heni. Momokani, Iesu na ita daidai e mase dainai, herevana ita na dia ḡoevadae, to eda hesiai ḡaukara amo Iehova lalona na baita hamoalea diba. (Rom. 7:​24, 25) Bona ita dibada, “Dirava ese ita laloda e hereadiamu, bona ia na ḡau iboudiai dibana.” (1 Jo. 3:​19, 20) Iehova ese ita na e dibada namonamo, bona ia dibana ita ese ia ena ura na baita karaia namonamo dibamu.

20. Dahaka dainai ita ese asi dibada ḡaudia na basita lalohekwarahilaidia?

²⁰ Iehova ese ḡau iboudiai na ita be hadibadamu. Una dainai, ita asi dibada ḡaudia na basita lalohekwarahilai, to mai anina bada ḡaudia mo baita lalo bada. Una dala amo ita ese baita hahedinaraiamu, ita na ta manaumu bona Iehova enai ta tabekaumu, badina ia na ḡau iboudiai “e diba ḡoeva-daemu tauna.” (Job 36:4) Ena be hari ina negai ita ese ḡau haida na asita lalopararalai namonamomu, to ita dibada Iehova ese ḡau matamatadia iboudiai na be hadibadamu ela bona hanaihanai.—Had. 3:11.