Dirava Ena Lalokau na E Mia Hanaihanaimu

1-2. Kristen taudia momo ese ededia hahetoho e davarimu?

MANI a laloa lai goadana ta lalonai bouti ta na hure. Una bouti na hurehure ese be hodoa laomu be hodoa maimu, ela bona ta ese dogo be negeamu, bena una dogo ese bouti na be dogoatao aukamu bona basine odaiamu.

² Bema oi na hahetoho badana ta o haheaukalaiamu, emu lalohadai na be idauidaumu, vaitani hurehure ese bouti e hodoa laomu e hodoa maimu heḡereḡerena. Dina ta be bo abia daemu Iehova ese oi na e lalokau henimumu bona e durumumu, a dina ta be bo daradaramu Ia ese oi o davarimu ḡaudia e itamu eiava. (Sal. 10:1; 13:1) Bona reana turamu ese be hagoadamumu bena una nega sisina ai emu hemami na be namomu. (Prov. 17:17; 25:11) To, gabeai Iehova ese oi e durumumu, e lalomu badamu eiava e lalokau henimumu karana na ma bo daradaralaiamu. Lalohadai unu bamodia o abimu negadiai, edena dala ai bavabia dae momokani Iehova ese oi na e lalokau henimumu bona e durumumu?

3. (a) Salamo 31:7 bona 136:1 ai, ina hereva “mia hanaihanai lalokauna” anina be dahaka? (b) Dahaka dainai Iehova na una kara ai haheitalai hereadaena? (Laulau danu ba itaia.)

³ Hahetoho lalodiai bema Iehova ena mia hanaihanai lalokauna baita laloa taomu, una ese ita na dogo ta heḡereḡerena be dogodataomu. (Salamo 31:7; 136:1 ba duahidia.) Ina hereva mia hanaihanai lalokauna anina na ta ese ma ta na e badinaia hanaihanaimu bona se rakataniamu. Mia hanaihanai lalokauna ai Iehova na haheitalai hereadaena. Oibe, Baibul ese Iehova na e gwauraiamu ‘ena lalokau na bada herea.’ (Eso. 34:​6, 7, NWT) Danu, Baibul ese Iehova na ini e herevalaia toma, eto: “Oi e tai henimumu taudia ediai, emu lalokau na bada herea.” (Sal. 86:​5, NWT) Unu siri anidia mani a lalodia: Iehova ese iena abidadama hesiai taudia na se rakatanidiamu! Oibe, hahetoho badana ta lalonai Iehova ese dala idauidau ai e durumumu dalana bo laloamu neganai, una na vaitani dogo ta na heto oi be dogomutaomu.—Sal. 23:4.

IEHOVA ENA LALOKAU NA BAIBUL ENA HAHEDIBA HEREVA BADANA TA HEḠEREḠERENA BA LALOA

4. Baibul ena hahediba hereva badadia be dahaka bona dahaka dainai ita ese unu na ta abi dae momokanimu?

⁴ Hahetoho negadia ai ba haheauka dalana ma ta na, Iehova ena lalokau na Baibul ena hahediba hereva badana ta heḡereḡerena ba laloa. Oi ese ina hereva “Baibul ena hahediba hereva badana” o kamonaiamu neganai, dahaka o lalomu? Reana Baibul ai o diba hahediba herevadia o lalomu. Heḡereḡere, o diba Dirava ladana na Iehova, Iesu na Dirava Natuna vara edeana, mase taudia na asi dibadia ḡau ta, bona tanobada na Paradaiso ai be laomu bona taunimanima ese be noholaia hanaihanaimu. (Sal. 83:18; Had. 9:5; Jon 3:16; Rev. 21:​3, 4) Unu hahediba herevadia o abi dae murinai, ta ese basine hadaradaramu diba. Dahaka dainai? Badina oi na o diba unu hahediba herevadia na mai edia hahemomokani ḡaudia. Mani aita itaia edena dala ai ita ese Iehova ena lalokau na Baibul ena hahediba hereva badana ta heḡereḡerena baita laloa, una ese baine duruda nega aukadia ai Iehova ena henari karana na basita daradaralaia.

5. Ta ese hahediba koikoidia baine dadarai dalana mani a herevalaia.

⁵ Oi ese Baibul o stadilaia matama neganai, oi be dahaka ese e durumu hahediba koikoidia o dadarai? Reana oi na emu tomadiho ai o diba ḡaudia bona Baibul ena hahediba herevadia edia idau o lalopararalaidia. Ina haheitalai mani a laloa, reana matamanai oi na o abia daeva Iesu na Dirava. To, Baibul o stadilaia neganai, reana sibomu o henanadai: ‘Una hahediba herevana be maoro, eiava?’ Baibul amo una kaha o stadilaia murinai, oi na o laloparara Iesu na dia Dirava. Bena oi ese hahediba koikoi o dadaraia bona Baibul ai ina hereva momokanina o abia dae matama: Iesu na “e vara ḡaudia iboudiai roboadia,” bona ia na “Dirava Natuna vara-edeana.” (Kol. 1:15; Jon 3:18) Oibe, hahediba koikoidia na “goada momokani,” bona irakatanidia na auka. (2 Ko. 10:​4, 5, NWT) To, hereva momokani o dibaia murinai, oi ese unu hahediba koikoidia na o rakatanidia.—Flp. 3:13.

6. Dahaka dainai oi ese bavabia dae momokani Iehova ena lalokau na e mia hanaihanaimu?

⁶ Namona na bavabia dae Baibul ai Iehova ena lalokau e hahedibalaiamu herevana na momokani. Hahetoho ta o davariamu dainai Iehova ena lalokau o daradaralaiamu neganai, sibomu ba henanadai, ‘Lau be na lalohadai maoromu, eiava?’ Bema Iehova ena lalokau o daradaralaiamu, emu daradara na ina atikol ena siri badana Salamo 136:1 ida ba haheḡereḡerea. Dahaka dainai Iehova ena lalokau na e gwauraia mia hanaihanai lalokauna? Dahaka dainai Iehova ese Salamo itorena tauna e ḡaukaralaia Iena lalokau na unu e gwauraia toma? Tame herevalaia heḡereḡerena, Iehova ena mia hanaihanai lalokauna na Baibul ena hahediba herevana ta. Bona bema ita ese una na Baibul ena hahediba herevadia ma haida heḡereḡeredia baita laloamu, una ese ita na be durudamu iena mia hanaihanai lalokauna na baita abia dae momokanimu. Una dainai basioto Iehova ese oi na se lalomu badamu eiava se lalokau henimumu. Oi ese una lalohadai koikoina ba dadaraia na ḡau badana, hahediba koikoi ma haida o dadarai heḡereḡerena!

7. Ededia Baibul siridia haida ese e hahedinaraiamu Iehova ese oi na e lalokau henimumu?

⁷ Baibul ese e hahedinaraiamu Iehova ese oi na e lalokau henimumu. Heḡereḡere, Iesu na ena hahediba taudia e hamaorodia, eto: “Umui ese bisini diaḡau o hereadiamu.” (Met. 10:31) Bona Iehova ese ena taunimanima e hamaorodia, eto: “Baina hagoadamu, baina durumu, imagu idibana mai kwalimuna ida amo baina imudamu tao.” (Isa. 41:10) Una ese e hahedinaraia ḡoevaḡoevamu Iesu na se eto, ‘Reana umui ese bisini diaḡau o hereadiamu,’ bona Iehova na se eto, ‘Reana lau ese baina durumui.’ To, idia na ini e gwau toma, ‘Umui ese bisini diaḡau o hereadiamu’ bona ‘lau ese baina durumui.’ Hahetoho ta o davariamu dainai Iehova ena lalokau o daradaralaiamu, Baibul siri unu bamodia ese oi be durumumu bo abia dae momokanimu Iehova ese oi na e lalokau henimumu. Unu siri ai e gwaurai herevadia na momokani. Oi ese emu daradara ḡaudia na ḡuriḡuri amo Iehova ba hamaorolaia bona unu siri ba lalodia dobu neganai, oi na 1 Jon 4:16 heḡereḡerena bo gwaumu: “Dirava ese e ura henidamu vada dibada, bona ta abia daemu.”a

8. Bema nega haida oi ese Iehova ena lalokau o daradaralaiamu be ede bamona?

⁸ Bema nega haida oi ese Iehova ena lalokau o daradaralaiamu be ede bamona? Una daradara lalohadaina na Iehova ese oi e lalokau henimumu karana o dibaia lalohadaina ida ba haheḡereḡerea. Emu hemami ese oi na baine koimu diba. To, Baibul ese e hadibadamu Iehova ena lalokau na momokani bona se idaumu. Bema Iehova ena lalokau asi ta abia daemu, ita ese Iena kara badana, lalokau, na ta dadaraiamu.—1 Jon 4:8.

IEHOVA ESE ITA E URA HENIDAMU KARANA AITA LALOA

9-10. Iesu ena hereva Jon 16:​26, 27 ai, “Tamada ese e ura henimuimu” anina be dahaka? (Laulau danu ba ita.)

⁹ Ita na Iehova ena lalokau amo ḡau momo baita dibamu bema Iesu ese ia murinai e rakava taudia ediai e gwauraia herevana baita laloamu neganai, eto: “Tamada ese e ura henimuimu.” (Jon 16:​26, 27 ba duahidia.) Iesu na dia ena hahediba baine hamoaledia dainai unu hereva e gwaurai. Una karoa badina siridia baita duahimu neganai, be hadibadamu Iesu na dia iena hahediba edia hemami e herevalai, to ia na ḡau idauna ma ta e herevalaia, una na ḡuriḡuri.

¹⁰ Iesu na ena hahediba e hamaorodia ia ladana ai bae ḡuriḡuri, to dia ia bae ḡuriḡuri henia. (Jon 16:​23, 24) Ena hahediba ese una bae dibaia na mai anina bada. Iesu na idia turadia dainai, ia e toreisi lou murinai ena hahediba na e urava ia bae ḡuriḡuri henia. Idia na e laloava Iesu ese idia na e lalokau henidia badava dainai, ia ese edia noinoi na be kamonaimu bona Tamana be noiamu idia baine durudia. To, Iesu ese idia e hamaorodia unu na basie lalo toma. Dahaka dainai? Badina ia ese idia na ini e hamaorodia toma, eto: “Tamada ese e ura henimuimu.” Iesu ese unu hereva amo ḡuriḡuri dalana e hahedibalaia. Oi ese una ba badinaia dalana mani a laloa: Baibul o stadilaia neganai, Iesu o dibaia bona o lalokau henia. (Jon 14:21) To Iesu ena hahediba taudia heḡereḡeredia, oi na Dirava o ḡuriḡuri heniamu badina dibamu Ia ese ‘oi na e ura henimumu.’ Dina ta ta ai oi ese Iehova o ḡuriḡuri heniamu neganai, oi na o abia daemu unu hereva na momokani.—1 Jon 5:14.

DARADARA E HAVARAMU ḠAUDIA BA LALOPARARALAIDIA

11. Dahaka dainai Satana na be moalemu bema ita ese Iehova ena lalokau baita daradaralaiamu?

¹¹ Dahaka ese Iehova ena lalokau idaradaralaina karana e havaraiamu? Reana una na Satana ese e havaraiamu lalohadaina bona una na taina momokani. Diabolo na e uramu ita baine anida ore, bona ia na e uramu ita ese Iehova ena lalokau baita daradaralaia. (1 Pi. 5:8) Badina Iehova na ena lalokau dainai boubou ḡauna e heḡaeḡaelai, to Satana na e uramu baita laloa ita na kara dika tauda dainai una boubou ḡauna amo namo na basita davarimu. (Heb. 2:9) Daika be moalemu bema ita ese Iehova ena lalokau baita daradaralaiamu? Bona daika be moalemu bema ita na baita lalomanokamu bona Iehova ihesiai henina baita hadokoamu? Satana be moalemu. Satana na e uramu baita laloa Iehova ese ita na se lalokau henidamu, to una lalohadai na koikoi. Satana ese Iehova ena lalokau na e haboioa. Una dainai, hari ia na e ḡaukara goadamu ita baine koida bena baita laloa Iehova ese ita na se lalokau henidamu bona e dadaraidamu. (Efe. 6:11) Oibe, bema ita ese inaida e uramu baine kara ḡaudia baita lalopararalaimu, ita ese laloda baita hadaimu ‘Diabolo baita ginia ahumu.’—Jei. 4:7.

12-13. Edena badi ma ta dainai ita ese Iehova ena lalokau ta daradaralaiamu?

¹² Edena badi ma ta dainai ita ese Iehova ena lalokau ta daradaralaiamu? Ita na Adam ena amo ta abia kara dikana dainai unu ta lalo tomamu. (Sal. 51:5; Rom. 5:12) Una kara dika ese taunimanima edia hetura karana Dirava ida e hadikaia. Danu una kara dika ese eda lalohadai, kudouda, bona ita tauanida e hadika.

¹³ Ita na dia ḡoevadae dainai, ita na ta lalometaumu, ta lalohisihisimu, ta daradaramu, bona ta hemaraimu. Ita na unu ta hemami tomamu bema kara dikana ta ta karaiamu. Danu, unu lalohadai na be dae dibamu bema nega iboudiai baita lalomu ita na dia ḡoevadae tauda. Una na dia Dirava ese taunimanima e karadia dalana. (Rom. 8:​20, 21) Haheitalai na ina, motuka ta na basine heau namonamomu bema taeana na flati. Una heḡereḡerena, ita na dia ḡoevadae tauda dainai, nega haida Iehova ese ita e lalokau henidamu karana na baita daradaralaiamu. Bema edai unu e vara tomamu, namona na baita helalotao Iehova na “Dirava badana bona mai garina, e ura heniamu bona ena haheḡani e badinamu taudia . . . e bogadia hisimu Diravana.”—Neh. 1:5.

14. Edena dala ai boubou ḡauna baita laloa dobumu karana ese be durudamu Iehova ena lalokau basita daradaralaia? (Roma 5:8) (Maua ladana, “‘Kara Dika Ena Koikoi’ Siahuna amo Sibomu Ba Hegima” danu ba itaia.)

¹⁴ Ita na siboda ḡau ta basita karaia dibamu Iehova ena lalokau baita abia totona. Una dainai nega haida ta lalomu ita na dia heḡereḡere Iehova ese baine lalokau henida, bona una na momokani. To dounu Iehova ese e hamomokania ita na e lalokau henidamu, badina boubou ḡauna e heni unu amo eda dika baine gwautao. (1 Jon 4:10) Bona baita helalotao, Iesu ema badina na kara dika taudia baine hamauridia, dia ḡoevadae taudia. (Roma 5:8 ba duahia.) Ita ta na dia heḡereḡere baita kara maoromaoro, bona Iehova ese ita na se doridamu unu baita kara toma. Danu ita na dia ḡoevadae tauda dainai nega haida Iehova ena lalokau na ta daradaralaiamu, to bema baita hekwarahimu neganai una lalohadai kererena na baita dadaraiamu.—Rom. 7:​24, 25.

DIRAVA IBADINANA KARANA BAVABIA HIDI

15-16. Bema hanaihanai Iehova ta badinaiamu, ita be dahaka baita abia dae momokani, bona dahaka dainai? (2 Samuel 22:26)

¹⁵ Iehova na e uramu ita ese ia baita “badinaia tarika-tarika,” una na abi hidi maorona. (Deut. 30:​19, 20) Bema unu baita kara tomamu, baita abia dae momokanimu Ia ese ita na basine rakatanidamu. (2 Samuel 22:26 ba duahia.) Ita na Iehova ta badinaiamu dainai, ta abia dae momokanimu Ia ese ita na be durudamu eda mauri ai hekwakwanai idauidau baita haheaukalaimu.

¹⁶ Ina atikol ai ḡau haida tame herevalai ese be durudamu bema hari bona vaira negai metau idauidau baita davarimu, ita na dounu baita gini goadamu. Ita na dibada Iehova ese e lalokau henidamu bona be durudamu, una na Baibul ena hahediba herevana. Bema ita ese Iehova ena lalokau ta daradaralaiamu, namona na Iehova ese ita e lalokau henidamu karana baita laloatao, dia hari ta abimu hemamidia baita lalodia bada. Oibe, ita na ta uramu baita abia dae momokani Iehova ena mia hanaihanai lalokauna na e hesiriu hanaihanaimu, una na Baibul ena hereva heḡereḡerena.