Hanaihanai “Iah Ena Lahi Hururu-hururuna” Ba Habadaia

1. Baibul ese lalokau korikori be ede e herevalaia toma?

LALOKAU ena “siahu na lahi hururu-hururuna siahuna na heto, Iah ena lahi hururu-hururuna. Abata ranudia ese lalokau na basie habodoa diba, sinavai ese basie huria oho diba.”b (Sol. 8:6, 7, NWT) Una na lalokau korikorina e herevalaiamu! Unu hereva ese headava taudia e hagoadadiamu. Emui headava lalonai lalokau korikorina ba hahedinaraia diba.

2. Headava taudia be dahaka bae kara edia lalokau basine keru totona?

² Headava lalonai tau bona hahine na bae hekwarahi bae helalokau heheni totona. Ini aita haheitalaia toma: Lahi ta baine ara hanaihanai totona, namona na au baita raku loulou. Bema unu basita kara tomamu, lahi na be bodomu. Una heḡereḡerena, tau bona hahine padadiai lalokau baine mia hanaihanai totona, namona na edia headava bae hagoadaia. Nega haida, headava taudia na moni hekwakwanaidia, gorere, eiava natu inaridia lalohekwarahidia ese e hametaudiamu dainai, e mamiamu edia lalokau na e kerumu. Bema oi na do headava, edena dala ai emu headava lalonai hanaihanai “Iah ena lahi hururu-hururuna” ba habadaia? Ina atikol ai, ita ese emu headava baine goada bona ba moalelaia daladia toi baita herevalaimu.c

HANAIHANAI EMU HETURA KARANA IEHOVA IDA BA HAGOADAIA

3. Edena dala ai headava taudia edia hetura karana Iehova ida bae hagoadaia karana ese edia lalokau baine habadaia diba? (Kohelete 4:12) (Laulau danu ba itaia.)

³ Headava taudia ese “Iah ena lahi hururu-hururuna” bae habadaia totona, namona na bae hekwarahi edia hetura karana Iehova ida bae hagoadaia. Edena dala ai una ese edia headava baine durua? Headava taudia ese Tamadia guba ai ihetura henina karana be laloa badamu neganai, be uramu iena sisiba bae badina, bona una ese be durudiamu edia lalokau baine hakerua hekwakwanaidia bae dadarai eiava bae hanaidia. (Kohelete 4:12 ba duahia.) Edia hetura karana Iehova ida e hagoadaiamu taudia na e hekwarahimu Iehova bae tohotohoa bona iena kara namodia, heḡereḡere hebogahisi, haheauka, bona dika igwautaona karadia e hahedinaraimu. (Efe. 4:32–5:1) Headava taudia ese unu kara be hahedinaraimu neganai, edia lalokau bae habadaia na dia auka. Taihu ta ladana Lena, ena headava laḡanidia na 25 mai kahana, na e gwa: “Iehova e laloa badamu tauna ba lalokau henia bona ba matauraia na dia auka.”  

4. Dahaka dainai Iehova ese Iosef bona Maria e abidia hidi Mesia tamana sinana ai baela?

⁴ Baibul sivaraina ta aita laloa. Iehova ese Mesia tamana bona sinana ai baela taudia e abidia hidi neganai, ia na David ena bese amo Iosef bona Maria e abidia hidi. Dahaka dainai? Idia ta ta sibodia edia hetura karana Iehova ida na goada, bona Iehova na mai dibana idia ese edia headava lalonai Ia be atoa gunamu. Headava taumui e, Iosef bona Maria edia amo dahaka o dibamu?

5. Tatau be Iosef ena amo dahaka e dibamu?

⁵ Iosef na mai ena ura ida Iehova ena hahekau dalana e badinaia, bona una ese e durua tau namona ai ela. Nega toi Iosef na ena ruma bese dainai Dirava ena amo hahediba herevadia e abi. Unu nega toiosi lalodiai, ia ese unu hereva na e badinadia haraḡa, ena be ia enai na auka. (Mat. 1:20, 24; 2:13-15, 19-21) Iosef na Dirava ena hahekau dalana e badinaia dainai, Maria e gimaia, e durua bona e naria namonamo. Mani a laloa, Iosef ena kara dainai Maria ese ena lalokau bona hemataurai Iosef enai na e habadaia! Tatau, Iosef ba tohotohoa, emui ruma bese ba naria namonamo totona Baibul ena sisiba ba tahu.d Ena be una na auka to Baibul ena sisiba bo badinamu neganai bo hahedinaraiamu adavamu na o lalokau heniamu bona emui headava na bo hagoadaiamu. Vanuatu ai taihu ta, ena headava laḡanidia 20 mai kahana na e gwa: “Adavagu na Iehova ena hahekau dalana e tahuamu bona e badinaiamu neganai, egu hemataurai ia enai na e badamu. Egu noho na e namomu, bona iena abi hidi na asina daradaralaimu.”

6. Ha’hine be Maria ena amo dahaka e dibamu?

⁶ Maria ese ena hetura karana Iehova ida na e hagoadaia; ia na sibona ena abidadama e hagoadaia, dia Iosef enai e tabekau. Ia na Dirava ena Hereva na mai dibana namonamao. (Luka 1:46) Bona nega e ato e lalodia dobu. (Luka 2:19, 51) Ena hetura karana Iehova ida na goada dainai, hahine namona ai ela. Hari ina negai, hahine momo na e hekwarahimu Maria e tohotohoamu. Heḡereḡere, taihu ta ladana Emiko na e gwa: “Lau do asina headava neganai, sibogu egu hetura karana Iehova ida na na goadalaiava. To na headava murinai, adavagu na ai daimai ai e ḡuriḡuriva bona emai ruma bese tomadihona e gunalaiava. Una dainai na laloparara lau na ia enai na tabekauva egu abidadama baine goada totona. Na diba namona na lau sibogu danu egu hetura karana Iehova ida baina hagoadaia. Una dainai hari lau na nega na atomu Dirava baina ḡuriḡuri henia, iena Hereva baina duahia, bona ena lalohadai baina lalodia dobu.” (Gal. 6:5) Ha’hine e, bema hanaihanai emui hetura karana Iehova ida bo hagoadaiamu neganai, adavamui ese be hanamomuimu bona be lalokau henimuimu.​—Her. 31:30.

7. Headava taudia be Iosef bona Maria amo dahaka e dibamu?

⁷ Danu, Iosef bona Maria na e ḡaukara hebou edia hetura karana Iehova ida bae hagoadaia totona. Idia na e laloparara edia ruma bese ibounai ese Iehova bae tomadiho henia hebou na mai anina bada. (Luka 2:22-24, 41; 4:16) Ena be edia ruma bese e badava dainai, unu bae kara toma na mai hekwarahina, to dounu edia tomadiho karadia na e kara hebouva. Idia na haheitalai namona hari ina negai headava taudia ediai! Bema umui na mai natumui, Iosef bona Maria heḡereḡeredia, reana o hekwarahimu hebou iboudiai baola bona nega bavato emui ruma bese tomadihona ba karaia. Danu reana auka nega bavato adavamu ida ba stadi bona ba ḡuriḡuri hebou. To ba helalotao, umui raruosi ese Iehova bo tomadiho henia heboumu neganai, emui hetura karana ia ida bona umui raruosi padamui ai na be goadamu. Una dainai Iehova itomadiho henina karana na bavatoa guna.

8. Edia headava lalonai hekwakwanai e davarimu taudia be dahaka bae kara diba?

⁸ Dahaka ba kara diba bema emu headava lalonai hekwakwanai o davarimu? Reana bo hesikumu ruma bese tomadihona ba karaia hebou. Bema unu o hemami tomamu, dala ta na raruosi ese o moalelaiamu bona o lalotamonalaiamu ḡauna ta ba herevalaia diba. Una ese emui lalokau be hagoadaiamu bona bo uramu Iehova ba tomadiho henia hebou.

BA HEBAMO HEHENI

9. Dahaka dainai headava taudia na nega bae ato bae hebamo heheni?

⁹ Umui headava taumui ese emui lalokau ba habadaia dalana ta na, nega bavato ba hebamo heheni. Unu bo kara tomamu neganai, adavamu ena hemami bona lalohadai na bo lalopararalaimu. (Gen. 2:24) Lilia bona Ruslan na edia headava laḡanidia 15 mai kahana murinai, e dibaia ḡauna mani a laloa. Lilia na e gwa: “Ai na a laloparara emai nega na dia heḡereḡere baia hebamo heheni, guna a lalova bamona. Emai moni ḡaukaradia, ruma ḡaukaradia bona natumai daidiai a bisiva. Ai na a diba bema raruosi nega basia atomu baia hebamo, padamai na be daudaumu.”

10. Headava taudia ese Efeso 5:15, 16 ena sisiba be ede bae badinaia toma?

¹⁰ Headava taudia be dahaka bae kara bae hebamo heheni totona? Namona na emui nega ba haria namonamo. (Efeso 5:15, 16 ba duahidia.) Nigeria ai, tadikaka ta ladana Uzondu na e gwaumu: “Egu sediual ai baina kara ḡaudia na torediamu neganai, adavagu ida baia hebamo heheni negana danu na toremu, bona una nega na, na laloa badamu.” (Fili. 1:10) Moldova ai, seket tauna ta adavana, Anastasia ese ena nega e ḡaukaralaia namonamo dalana mani a laloa. Ia na e gwa: “Adavagu na ena maduna ihuadia ai e bisimu negadiai, lau ese baina kara ḡaukaradia na karamu. Unu amo gabeai, ai raruosi na baia hebamo heheni diba.” To oi be dahaka ba kara bema emu ai na auka nega bavato adavamu ida ba hebamo heheni totona?   

11. Akula bona Priskila be ededia ḡaukara e karadia hebou?

¹¹ Headava taudia na Akula bona Priskila edia haheitalai amo diba bae abi diba, idia raruosi na Kristen ginigunadia momo ese e matauraidiava. (Roma 16:3, 4) Ena be Baibul ese edia headava maurina na se herevalaia momo, to e hahedinaraiamu idia raruosi na e ḡaukara hebouva, e haroro hebouva, bona ma haida idurudia karana ai e ḡaukara hebouva. (Apos. 18:2, 3, 24-26) Momokani, Baibul ese Akula bona Priskila e herevalaidia neganai, nega momo na idia raruosi e gwauraidia hebou.

12. Tau bona hahine be dahaka bae kara nega bada bae hebamo heheni totona? (Laulau danu ba itaia.)

¹² Headava taudia be edena dala ai Akula bona Priskila bae tohotohodia diba? Adavamu ida ba kara hebou ḡaudia momo ba lalodia. Ḡau haida na umui raruosi ese ba karadia hebou diba, dia ta ta sibomui. Heḡereḡere, Akula bona Priskila na e haroro hebou. Umui be hanaihanai nega o atomu unu ba kara toma, a? Danu, Akula bona Priskila na e ḡaukara hebou. Reana oi bona adavamu emui moni ḡaukaradia na i’idau, to ruma ḡaukaradia ba kara hebou diba, a? (Koh. 4:9) Ḡaukara ta ikarana ai bo heduru hehenimu neganai, bo mamiamu umui na tim ta bamona bona dala be hekehomu ba herevahereva. Robert bona Linda edia headava laḡanidia na 50 mai kahana. Robert na e gwaumu: “Ai emai nega na dia bada moale karadia baia kara hebou. To mereki na hurimu bona adavagu ese e hakaukaumu eiava emai uma-uma ai na ḡaukaramu bona adavagu ese e durugumu neganai, na moalemu. Ḡau a kara heboumu ese ai na e hatamonamaimu. Bona emai lalokau na e badamu.”

13. Tau bona hahine be dahaka bae kara bae lalotamona totona?

¹³ To ba helalotao, emui hebamo heheni lalonai lalotamona karana ba hagoadaia na namo. Brazil ai, hahine ta na e gwa: “Hari ina negai, eda mauri lalonai ta bisimu dainai, baita lalomu adavada ida ruma tamona ai ta nohomu na heḡereḡere baita hebamo heheni totona. To na diba una mo na dia heḡereḡere, namona na adavagu ena ura danu baina laloa.” Bruno bona adavana Tays na unu e kara toma dalana mani a laloa. Bruno na e gwa: “Asi emai ḡaukara negadia ai emai fon na ato tabemu, unu amo emai hebamo baia moalelaia hebou.”

14. Bema headava taudia na edia hebamo asie moalelaiamu, dahaka bae kara diba?

¹⁴ To, bema adavamu ida emui hebamo so moalelaiamu be ede bamona? Reana emui ura na i’idau, eiava reana ta ta emui kara amo o haheisi hehenimu. Dahaka ba kara diba? Mani matamanai tame herevalaia haheitalaina aita laloa. Lahi e ara matamamu neganai, ia na dia maoromaoro e hururumu, to au badadia taidia ruadia baita rakumu neganai, be hururumu. Una heḡereḡerena, dina ta ta ai nega bavato ba hebamo heheni. Namona na bae hamoalemui ḡauna ta ba karaia hebou, dia bae habadamui ḡauna. (Iak. 3:18) Unu bo kara tomamu neganai, emui lalokau na be badamu.  

BA HEMATAURAI HEHENI

15. Headava taudia edia lalokau baine goada totona, dahaka dainai hemataurai na mai anina bada?

¹⁵ Headava lalonai hemataurai na mai anina bada. Una na hodahoda (oxygen) ese lahi e ha hururuamu karana ida baita haheḡereḡerea. Bema hodahoda na lasi, lahi na be bodo haraḡamu. Una heḡereḡerena, hemataurai na lasi neganai, headava taudia edia lalokau na be keru haraḡamu. To tau bona hahine na e ḡaukara goadamu hemataurai karana e hahedinaraiamu neganai, edia lalokau na e goadamu. Namona na adavamu na baine mamia ia na o matauraiamu. Penny bona Aret edia headava laḡanidia na 25 mai kahana. Penny na e gwa: “A hemataurai hehenimu dainai lalokau ai a nohomu. Emai lalohadai na a gwaurai hedinaraimu, badina a dibamu ta ta ese baia lalodia badamu.” Una dainai, dahaka ba kara unu amo adavamu na baine mamia ia na o matauraiamu? Mani Abraham bona Sara edia haheitalai aita laloa.

16. Tatau be Abraham ena haheitalai amo dahaka e dibamu? (1 Petro 3:7) (Laulau danu ba itaia.)

¹⁶ Abraham ese Sara na e matauraiava. Ia ese Sara e kamonai henia bona ena hemami na e laloa bada. Nega ta, Sara na e lalohisihisi, bona ena hemami na Abraham e hamaorolaia, bona gwau na ia e henia. Abraham be e badu eiava e gwau dika, a? Lasi. Ia na mai dibana Sara ese ia na e matauraiava bona e duruava. Una dainai Abraham ese Sara ena hereva na e kamonai bona hekwakwanai e hamaoromaoroa. (Gen. 16:5, 6) Una ese dahaka e hadibadamu? Tatau e, ruma bese lalonai abi hidi ikarana na umui emui maduna. (1 Kor. 11:3) To, lalokau ba hahedinaraia dalana na, abi hidi do so karaia neganai, adavamu ena lalohadai ba haeroa guna, bema una abi hidi ese ia be hamoaleamu eiava lalonai be hahisiamu. (1 Kor. 13:4, 5) Nega haida ai, reana adavamu na e lalohekwarahimu bona e uramu ena hemami baine herevalaia. Oi be iena hemami o laloa badamu dainai o hakala namonamomu, a? (1 Petro 3:7 ba duahia.) Angela bona Dmitry na edia headava laḡanidia na 30 heḡereḡerena. Angela na adavana ese e matauraia dalana e herevalaia, eto: “Lalogu e hisihisimu o na uramu baina hereva negadiai, Dmitry na hanaihanai e uramu baine hakala. Mai taigu ida o mai badugu ida egu hemami na gwauraimu negadiai danu, ia na e haheaukamu.”

17. Ha’hine be Sara ena haheitalai amo dahaka e dibamu? (1 Petro 3:5, 6)

¹⁷ Sara ese Abraham e matauraia dalana na ia abi hidi e karava negadiai e duruava. (Gen. 12:5) Nega ta, Abraham na e ura vadivadi taudia haida bae abidia dae. Ia ese Sara e hamaoroa e kara ḡaudia do baine rakatani bona parao haida baine heḡaeḡaelai. (Gen. 18:6) Sara na haraḡa herea Abraham ese e hamaoroa ḡaudia e kara. Ha’hine e, Sara heḡereḡerena ba kara, adavamui na abi hidi e karamu neganai ba durudia. Unu bo kara tomamu neganai, emui headava maurina na be namomu. (1 Petro 3:5, 6 ba duahidia.) Dmitry, paragraf 16 ai tame herevalaia tauna, na adavana ese e matauraia dalana e herevalaia. Ia na eto: “Lau na, na moalemu badina abi hidi na karamu negadiai Angela na e hekwarahimu baine durugu, ena be emai lalohadai na i’idau. Bema egu abi hidi anidia na se varamu, ia ese na se gwau henigumu.” Momokani, oi e matauraimumu tauna bo lalokau heniamu na dia auka!

18. Headava taudia ese edia lalokau be habadaiamu ena namo be dahaka?

¹⁸ Hari ina negai, Satana na e uramu Kristen taudia edia headava lalonai e miamu lalokauna baine hadikaia. Ia na mai dibana bema headava taudia na basie helalokau hehenimu, Iehova ena amo na vada be daudau matamamu. To, lalokau korikorina na ta ese basine hadikaia diba! Una dainai, namona na Solomon Ena Ane lalonai e gwauraia lalokauna na emui headava lalonai ba hahedinaraia. Lalomui ba hadai emui headava lalonai Iehova bavatoa guna, nega bavato ba hebamo heheni, bona emui hemami bona ura ḡaudia na ba lalo bada. Unu bo kara tomamu neganai, emui headava amo Iehova, lalokau korikorina badina, bo hanamoamu bona emui lalokau na be badamu, lahi e hururu-hururumu na heto.