Deteronom

1 Sa se bann parol ki Moiz ti dir tou lepep Izrael dan rezion Zourdin, dan dezer, dan bann laplenn ki ti kouma bann dezer anfas ar Souf, ant Parann, Tofel, Labann, Azerot, ek Dizaab. 2 Li pran 11 zour depi Oreb pou ariv Kades-Barnea kan pas par Montagn Seir. 3 Dan 40em lane, lor 11em mwa, lor premie zour sa mwa-la, Moiz ti koz ar bann Izraelit* ek ti dir zot tou seki Zeova ti’nn donn li lord pou dir zot. 4 Sa ti arive apre ki li ti gagn laviktwar lor Sihonn, lerwa bann Amorit, ki ti pe res dan Esbonn, ek lor Og, lerwa Basann, ki ti pe res dan Astarot, dan Edrei. 5 Dan rezion Zourdin, dan pei Moab, Moiz ti koumans explik lalwa ek ti dir:

6 “Zeova nou Bondie ti dir nou dan Oreb, ‘Zot inn res ase lontan dan sa rezion kot ena bann montagn la. 7 Al dan rezion bann Amorit kot ena bann montagn ek dan tou bann rezion ki ena akote: Araba, rezion kot ena bann montagn, Sefela, Negev, ek lakot. Al dan pei bann Kananeen. Al ziska Liban* ek gran larivier Lefrat. 8 Gete, mo met sa pei-la devan zot. Ale ek pran pei ki Zeova ti promet pou donn zot bann anset, Abraam, Izaak, ek Zakob, ek zot bann desandan apre zot.’

9 “Ek sa lepok-la mo ti dir zot, ‘Mo pa kapav diriz zot mo tousel. 10 Zeova zot Bondie inn fer zot vinn boukou, ek azordi zot inn vinn boukou parey kouma bann zetwal dan lesiel. 11 Ki Zeova, Bondie zot bann anset, fer zot vinn mil fwa pli boukou ki zot ete, ek ki li beni zot parey kouma li’nn promet zot. 12 Me kouma mo pou kapav sarye sa fardo ek responsabilite pou okip zot la, ek okip zot bann konplint mo tousel? 13 Swazir dan zot tribi bann zom ki saz, ki ena disernman, ek ki ena lexperyans, ek mo pou etabli bann-la kouma sef lor zot.’ 14 Zot ti reponn mwa, ‘Seki to’nn dir nou fer, li bon.’ 15 Alor mo ti pran bann sef dan zot bann tribi, bann zom ki saz ek ki ena lexperyans, ek ti etabli bann-la kouma bann sef lor zot: bann sef lor bann group 1,000 dimounn, bann sef lor bann group 100 dimounn, bann sef lor bann group 50 dimounn, bann sef lor bann group 10 dimounn, ek bann responsab dan zot tribi.

16 “Sa lepok-la mo ti donn zot bann ziz sa lord-la, ‘Kan zot bann frer prezant enn ka, zot bizin ziz avek lazistis ant enn zom ek so frer ouswa enn rezidan etranze. 17 Fode pa zot fer preferans kan zot zize. Zot bizin ekout enn ti-dimounn parey kouma zot ekout enn dimounn inportan. Fode pa zot per bann zom, parski se Bondie ki zize; ek si enn ka tro difisil pou zot, zot bizin prezant li devan mwa, ek mo pou ekout li.’ 18 Sa lepok-la mo ti explik zot tou bann kitsoz ki zot bizin fer.

19 “Lerla nou ti kit Oreb ek ti mars dan sa gran dezer ki fer per la, ki zot ti trouve kan zot ti al dan rezion bann Amorit kot ena bann montagn, parey kouma Zeova nou Bondie ti’nn donn nou lord, ek finalman nou ti ariv Kades-Barnea. 20 Lerla mo ti dir zot, ‘Zot inn ariv dan rezion bann Amorit kot ena bann montagn, ki Zeova nou Bondie pe donn nou. 21 Gete, Zeova to Bondie inn donn twa sa pei-la. Monte, pran li, parey kouma Zeova Bondie to bann anset, inn dir twa. Pa per ek pa panike.’

22 “Me selman, zot tou ti vinn get mwa ek ti dir, ‘Anou avoy bann zom pou gete kouma pei-la ete ek pou dir nou ki sime nou bizin pran ek ki kalite lavil ena laba.’ 23 Sa sizesion-la ti paret bon pou mwa, alor mo ti swazir 12 zom parmi zot, enn dan sak tribi. 24 Bann-la ti ale ek ti mont dan rezion kot ena bann montagn. Lerla, bann-la ti ariv Vale Eshkol ek zot ti espionn landrwa-la. 25 Bann-la ti pran inpe frwi dan pei-la ek zot ti amenn li kot nou, ek zot ti dir nou, ‘Pei ki Zeova nou Bondie pe donn nou, li bon.’ 26 Me zot, zot ti refiz pou monte, ek zot ti rebel kont lord ki Zeova zot Bondie ti donn zot. 27 Zot ti pas zot letan plengne dan zot latant ek ti dir, ‘Se parski Zeova ti ena laenn pou nou ki li’nn fer nou sorti dan pei Lezip pou livre nou dan lame bann Amorit pou ki bann-la detrir nou. 28 Ki kalite plas nou pe ale? Nou bann frer inn dekouraz nou kan zot inn dir, “Zot enn pep ki pli for ek pli ot ki nou, ek zot bann lavil gran ek proteze par bann miray ki ariv ziska lesiel, ek nou ti trouv bann garson bann Anakim laba.”’

29 “Alor mo ti dir zot, ‘Pa panike ouswa per akoz bann-la. 30 Zeova zot Bondie pou al devan zot ek pou lager pou zot, parey kouma li ti fer dan Lezip devan zot lizie. 31 Ek to ti trouve dan dezer kouma Zeova to Bondie ti sarye twa parey kouma enn zom sarye so garson, partou kot zot ti ale ziska ki zot ariv dan sa plas-la.’ 32 Me malgre tousala, zot pa ti ena lafwa dan Zeova zot Bondie, 33 ki ti al devan zot toutlong sime, pou rod enn plas pou zot kanpe. Li ti servi dife pou aparet ar zot aswar ek li ti servi enn niaz pou aparet ar zot pandan lizour pou montre zot sime kot zot bizin marse.

34 “Pandan tou sa letan-la, Zeova ti tann seki zot ti pe dir, ek li ti ankoler ek ti fer sa serman-la, 35 ‘Okenn bann zom ki dan sa move zenerasion-la pa pou trouv sa bon pei ki mo ti promet pou donn zot bann anset la, 36 apart Kaleb, garson Zefoune. Li pou trouv pei-la ek mo pou donn li ek so bann garson sa pei lor ki li ti marse la, parski li ti obeir Zeova avek tou so leker.* 37 (Zeova ti mem ankoler avek mwa akoz zot, ek li ti dir, “Twa osi to pa pou rant laba. 38 Se Zozwe, garson Noun, to serviter,* ki pou rant dan pei-la. Fer li vinn for* parski li pou fer Izrael erit pei-la.”) 39 Anplis zot bann zanfan, ki zot ti dir zot bann lennmi pou pran ek zot bann garson ki azordi pa kone ki bon ek ki pa bon, se bann-la mem ki pou rant dan pei-la ek mo pou donn zot sa kouma enn leritaz. 40 Me zot, fer demi-tour ek al ver dezer par semin Lamer Rouz.’

41 “Lerla zot ti dir mwa, ‘Nou’nn fer pese kont Zeova. Aster nou pou monte ek lager parey kouma Zeova nou Bondie inn donn nou lord!’ Alor sakenn parmi zot ti pran zot zarm pou lager, ek zot ti panse ki sa ti pou fasil pou mont lor montagn-la. 42 Me Zeova ti dir mwa, ‘Dir zot: “Fode pa zot monte pou al lager, parski mo pa pou avek zot. Si zot fer sa, zot bann lennmi pou gagn laviktwar lor zot.”’ 43 Alor mo ti koz ar zot, me zot pa ti ekoute. Okontrer zot ti rebel kont lord Zeova ek zot ti montre zot arogan kan zot ti esey mont lor montagn-la. 44 Lerla bann Amorit ki ti res dan sa montagn-la ti vinn atak zot ek ti pourswiv zot parey kouma bann mous dimiel fer, ek ti fer zot disperse dan Seir ziska Orma. 45 Alor zot ti retourne ek ti koumans plore devan Zeova, me Zeova pa ti ekout zot ek pa ti pran zot kont. 46 Akoz samem ki zot ti res dan Kades tou sa letan-la.