Exod
7 Lerla Zeova ti dir Moiz: “Gete, mo’nn fer twa vinn kouma Bondie* pou Faraon, ek Aaron to frer pou vinn to profet. 2 To bizin repet tou seki mo pou donn twa lord, ek Aaron to frer pou koz ar Faraon, ek Faraon pou fer bann Izraelit ale depi so pei. 3 Me mwa, mo pou les leker Faraon vinn dir, ek mo pou fer boukou sign ek mirak dan pei Lezip. 4 Me Faraon pa pou ekout zot, ek mo pou met mo lame lor pei Lezip ek mo pou fer mo pep ki bien boukou,* setadir bann Izraelit sorti dan Lezip gras-a bann gran zizman. 5 Ek vremem bann Ezipsien pou kone ki momem Zeova kan mo pou lev mo lame kont Lezip ek fer bann Izraelit sorti parmi zot.” 6 Moiz ek Aaron ti fer seki Zeova ti’nn donn zot lord pou fer; zot ti fer exakteman seki ti dir zot. 7 Moiz ti ena 80 an ek Aaron ti ena 83 an kan zot ti koz ar Faraon.
8 Lerla Zeova ti dir Moiz ek Aaron: 9 “Si Faraon dir zot, ‘Fer enn mirak,’ lerla dir Aaron, ‘Pran to baton ek zet li anba devan Faraon.’ Baton-la pou vinn enn gro serpan.” 10 Alor Moiz ek Aaron ti al get Faraon ek zot ti fer exakteman seki Zeova ti’nn donn zot lord. Aaron ti zet so baton devan Faraon ek so bann serviter, ek baton-la ti vinn enn gro serpan. 11 Selman Faraon ti fer apel bann zom ki ena sazes ek bann sorsie. Lerla bann pret ki fer mazik dan Lezip ti servi zot mazik pou fer mem kitsoz. 12 Sakenn ti zet so baton, ek bann baton-la ti vinn bann gro serpan; me baton Aaron ti aval zot baton. 13 Malgre sa, Faraon so leker ti vinn dir, ek li pa ti ekout zot, parey kouma Zeova ti’nn dir.
14 Lerla Zeova ti dir Moiz: “Faraon so leker insansib. Li’nn refiz pou les mo pep ale. 15 Al get Faraon gramatin. Gete! Li pou al kot Larivier Nil! To bizin atann li lor bor Larivier Nil; ek pran avek twa dan to lame sa baton ki ti vinn enn serpan la. 16 Ek to bizin dir li, ‘Zeova Bondie bann Ebre inn avoy mwa dir twa: “Les mo pep ale pou ki li kapav servi mwa dan dezer,” me ziska aster-la to pa’nn obeir. 17 Ala seki Zeova dir: “Se koumsa ki to pou kone ki momem Zeova. Mo pou tap delo ki dan Larivier Nil avek sa baton ki dan mo lame la, ek delo-la pou vinn disan. 18 Ek bann pwason ki dan Larivier Nil pou mor, Larivier Nil pou santi pi, ek bann Ezipsien pou nepli kapav bwar delo ki dan Larivier Nil.”’”
19 Lerla Zeova ti dir Moiz: “Dir Aaron, ‘Pran to baton ek tini li dan direksion bann delo Lezip: bann larivier, bann kanal,* bann lamar, ek tou bann rezervwar, pou ki zot vinn disan.’ Pou ena disan partou dan pei Lezip, mem dan bann resipian ki an dibwa ek an ros.” 20 Deswit Moiz ek Aaron ti fer exakteman seki Zeova ti’nn demande. Aaron ti lev so baton ek ti tap delo Larivier Nil devan lizie Faraon ek so bann serviter, ek tou delo ki ti dan larivier-la ti vinn disan. 21 Ek bann pwason ki ti dan larivier-la ti mor, larivier-la ti koumans santi pi, ek bann Ezipsien pa ti kapav bwar delo Larivier Nil. Ti ena disan partou dan pei Lezip.
22 Selman bann pret ki fer mazik dan Lezip ti servi zot mazik* pou fer mem kitsoz, pou ki leker Faraon kontign res dir, ek li pa ti ekout Moiz ek Aaron, parey kouma Zeova ti’nn dir. 23 Lerla Faraon ti retourn kot li, ek ankor enn fwa li pa ti pran kont seki ti arive. 24 Alor tou bann Ezipsien ti pe fouy toutotour Larivier Nil pou gagn delo pou bwar, parski zot pa ti kapav bwar delo Larivier Nil. 25 Ek set zour ti pase apre ki Zeova ti’nn tap Larivier Nil.