Izai
24 Gete! Zeova pe devid pei-la* ek pe fer li vinn enn dezer.
Li pe devir li anba-lao ek pe fer so bann abitan fane partou-partou.
2 Sa pou parey pou zot tou:
Pou lepep parey kouma pou pret,
Pou serviter-la ek so met,
Pou servant-la ek so met,
Pou seki aste ek seki vande,
Pou seki prete ek seki pran prete,
Pou seki donn kredi ek seki pran kredi.
3 Pou devid pei-la net;
Pou pran tou seki ena dan pei-la,
Parski se Zeova ki’nn dir sa parol-la.
4 Pei-la an-dey;* li pe fini net.
Bon later pe sek; li pe perdi so lafors.
Bann dimounn inportan sa pei-la pe deperi.
5 Bann abitan sa pei-la finn kontaminn pei-la,
Parski zot pa’nn respekte bann lalwa,
Zot inn sanz bann komannman,
Ek zot inn kas lalians ki dire pou touletan.*
6 Se akoz sa ki malediksion pe fini pei-la net,
Ek ki so bann abitan koupab.
Se akoz sa ki bann abitan sa pei-la pe diminie tigit-tigit,
Ek ki res bien tigit zom.
7 Nouvo divin an-dey,* pie rezin pe fletri,
Ek tou bann ki zot leker dan lazwa pe pous bann soupir.
8 Inn aret tann son lazwa ki bann tanbourin fer;
Tapaz bann ki kontan amize inn arete;
Nepli tann son lazwa ki laarp fer.
9 Zot bwar divin san ki zot sante,
Ek bann ki pe bwar labwason ki ena lalkol gagn enn gou amer dan zot labous.
10 Lavil ki’nn abandone inn kraze;
Inn ferm tou bann lakaz pou ki personn pa rantre.
11 Zot pe kriye dan bann sime parski pena divin.
Tou kontantman inn disparet;
Nepli ena lazwa dan pei.
12 Lavil-la inn vinn enn ta ros;
Laport inn tonbe, inn kraze net.
13 Parski ala kouma sa pou ete dan pei-la, parmi bann pep:
Li pou kouma kan inn grenn zoliv lor pie avek enn golet,
Kouma kan inn ramas bann rezin ki’nn reste lor pie apre ki rekolt inn fini.
14 Avek enn lavwa for zot pou kriye,
Zot pou kriye avek lazwa.
Depi lamer* zot pou anons grander Zeova.
15 Se akoz sa ki zot pou donn laglwar Zeova dan rezion lalimier;*
Lor bann zil dan lamer zot pou donn laglwar nom Zeova Bondie Izrael.
16 Depi lot bout later nou tann bann sante:
“Laglwar* pou sa Kikenn Ki Drwat la!”
Me mo pe dir: “Mo pe deperi, Mo pe deperi!
Maler lor mwa! Sa kikenn ki tret la inn fer tret.
Avek manigans sa kikenn ki tret-la inn fer tret.”
17 Laper, bann trou, ek bann piez pe atann twa, twa abitan sa pei-la.
18 Dimounn ki pe sove akoz son ki fer per, pou tom dan trou,
Ek dimounn ki pe sorti dan trou pou rant dan piez.
Parski bann laport delo dan lesiel pou ouver,
Ek bann fondasion later pou tranble.
19 Pei-la inn fann;
Pei-la inn gagn bann sekous;
Pei-la pe sakouye bien for.
20 Pei-la pe balote kouma enn zom ki sou,
Ek li pe balanse kouma enn kabann dan divan.
So pese pe pez lour lor li;
Li pou tonbe, ek li pa pou leve ankor.
21 Sa zour-la, Zeova pou pran kont larme ki dan lesiel
Ek bann lerwa ki lor later.
22 Ek pou rasanble zot ansam
Kouma bann prizonie ki’nn rasanble dan enn trou,
Ek pou ferm zot dan enn kaso;
Apre boukou zour pou pran zot kont.
23 Plennlinn pou dekonserte,
Ek soley ki pe briye pou gagn onte,
Parski Zeova Sef bann larme inn vinn Lerwa lor Montagn Sion ek dan Zerizalem,
Li’nn gagn laglwar devan bann ansien ki dan so pep.*