Ekleziast
3 Pou tou kitsoz ena enn moman fixe,
Enn moman pou tou aktivite anba lesiel:
2 Enn moman pou ne ek enn moman pou mor;
Enn moman pou plante ek enn moman pou derasinn seki’nn plante;
3 Enn moman pou touye ek enn moman pou geri;
Enn moman pou kraze ek enn moman pou ranze;
4 Enn moman pou plore ek enn moman pou riye;
Enn moman pou plengne ek enn moman pou danse;*
5 Enn moman pou zet ros ek enn moman pou ramas ros;
Enn moman pou maye ek enn moman pou aret maye;
6 Enn moman pou rode ek enn moman pou aksepte ki enn kitsoz inn perdi;
Enn moman pou garde ek enn moman pou zete;
7 Enn moman pou desire ek enn moman pou koud;
Enn moman pou res trankil ek enn moman pou koze;
8 Enn moman pou kontan ek enn moman pou deteste;
Enn moman pou lager ek enn moman pou lape.
9 Ki enn travayer gagne pou tou so bann zefor? 10 Mo’nn trouv travay ki Bondie inn donn garson bann zom pou ki zot res okipe. 11 Li’nn fer tou kitsoz zoli* dan bon moman. Li’nn mem met leternite dan zot leker; pourtan bann imin zame pa pou dekouver travay ki vre Bondie inn fer depi koumansman ziska lafin.
12 Mo’nn realize ki pena nanye pli bon pou zot ki zot dan lazwa ek ki zot fer seki bon pandan zot lavi, 13 ek osi ki tou dimounn bizin manze, bwar ek gagn lazwa pou tou travay dir ki li fer. Sa se kado Bondie.
14 Mo’nn konpran ki tou seki vre Bondie fer pou reste pou touletan. Pena nanye pou azoute ladan ek pena nanye pou tire ladan. Vre Bondie inn fer sa dan sa fason-la pou ki bann dimounn ena enn gran respe pou li.
15 Seki arive inn deza arive, ek seki pou arive inn deza arive; me vre Bondie rod seki bann dimounn inn rode.*
16 Mo’nn trouv sa osi anba soley: Dan plas lazistis, ti ena seki move ek dan plas ladrwatir, ti ena seki move. 17 Alor mo ti dir dan mo leker: “Vre Bondie pou ziz bann dimounn drwat ek bann dimounn move toule-de, parski ena enn moman pou tou aktivite ek tou aksion.”
18 Konsernan garson bann zom, mo ti osi dir dan mo leker ki vre Bondie pou teste zot ek pou montre zot ki zot kouma bann zanimo, 19 parski ena enn lafin pou bann imin ek enn lafin pou bann zanimo; zot tou fini parey. Parey kouma enn mor, lot-la la osi mor; ek zot tou ena mem lafors lavi.* Alor bann zom pa pli siperyer ki bann zanimo, parski tou kitsoz initil. 20 Zot tou al mem plas. Zot tou sorti dan lapousier, ek zot tou retourn dan lapousier. 21 Kisann-la ki vremem kone si lafors lavi* bann dimounn mont lao, ek si lafors lavi bann zanimo desann dan later? 22 Ek mo ti trouve ki pena nanye pli bon pou enn zom ki li gagn lazwa dan so travay, parski se samem so rekonpans;* parski kisann-la kapav fer li trouve seki pou arive apre ki li’nn ale?