Zenez
39 Ti amenn Zozef dan Lezip ek enn Ezipsien ki apel Potifar, enn ofisie dan lakour Faraon ek sef bann gard rwayal, ti aste li ar bann Ishmaelit ki ti’nn amenn li laba. 2 Me Zeova ti avek Zozef. Akoz sa li ti reisi dan tou seki li ti fer ek ti met li an-sarz lakaz so met, sa Ezipsien-la. 3 Ek so met ti trouve ki Zeova ti avek li ek ki Zeova ti pe fer tou seki Zozef fer reisi.
4 Zozef ti kontign gagn faver so met ek li ti vinn so serviter personel. Potifar ti met Zozef an-sarz so lakaz ek tou seki li ti ena. 5 Depi ki Potifar ti met Zozef an-sarz so lakaz ek tou seki li ti ena, Zeova ti kontign beni lakaz sa Ezipsien-la akoz Zozef. Ek Zeova ti beni tou seki li ti ena dan so lakaz ek dan so bann karo. 6 Finalman li ti les tou seki li ti ena dan lame Zozef, ek li pa ti gagn traka nanye apart manze ki li ti pe manze. Anplis, Zozef ti vinn enn zoli garson ki bien kosto.
7 Apre sa, madam so met ti koumans atire ar Zozef ek ti dir: “Dormi ar mwa.” 8 Me Zozef ti refize ek ti dir madam so met: “Mo met nepli okip nanye dan lakaz, ek li’nn konfie mwa tou so bann kitsoz. 9 Pena personn pli gran ki mwa dan sa lakaz-la ek li pa’nn refiz mwa nanye apart twa, parski to so fam. Alor kouma mo kapav fer enn move kitsoz koumsa ek vremem fer pese kont Bondie?”
10 Alor sak zour li ti kontign koz avek Zozef, me Zozef zame ti aksepte pou dormi ar li ouswa pou res avek li. 11 Me enn zour kan Zozef ti rant dan lakaz pou fer so travay, pa ti ena okenn serviter ki ti la. 12 Alor fam Potifar ti atrap Zozef par so linz ek ti dir: “Dormi ar mwa!” Me Zozef ti kit so linz dan so lame ek ti sove ti al deor. 13 Deswit kouma li ti trouve ki Zozef inn kit so linz dan so lame ek inn sove inn al deor, 14 li ti koumans kriye bann zom dan so lakaz ek li ti dir zot: “Gete! Mo mari inn amenn sa Ebre-la kot nou pou imilie nou.* Li ti anvi dormi ar mwa me mo’nn koumans kriy pli for ki mo kapav. 15 Lerla deswit kouma li’nn tann mwa kriye, li’nn kit so linz pre ar mwa ek li’nn sove li’nn al deor.” 16 Apre sa, li ti gard linz Zozef pre kot li ziska ki Potifar, Zozef so met, retourn lakaz.
17 Lerla fam-la ti rakont so mari mem kitsoz. Li ti dir: “Sa serviter ebre ki to’nn amenn kot nou la, inn vinn get mwa pou imilie mwa. 18 Me deswit kouma mo’nn kriye, li’nn kit so linz pre ar mwa ek li’nn sove li’nn al deor.” 19 Ek deswit kouma Zozef so met ti tann so fam dir: “Ala bann kitsoz ki to serviter inn fer mwa,” li ti bwi ar koler. 20 Alor Potifar ti pran Zozef ek ti fer met li dan prizon, kot ferm bann prizonie lerwa, ek li ti res dan prizon-la.
21 Me Zeova ti kontign res avek Zozef ek li ti kontign montre so lamour fidel anver li. Li ti fer li gagn faver sef prizon. 22 Alor sa sef prizon la ti met Zozef an-sarz tou bann prizonie dan prizon, ek se li ki ti pe dir bann-la ki travay zot bizin fer. 23 Sef prizon la pa ti okip okenn travay ki ti’nn konfie Zozef parski Zeova ti avek Zozef, ek Zeova ti pe fer tou seki Zozef fer reisi.