Ekleziast
1 Sa se bann parol sa kikenn ki rasanble la,* garson David, lerwa dan Zerizalem.
3 Ki enn dimounn gagne pou tou sa travay dir ki li fer la
Kan li rinte anba soley?*
6 Divan al dan Lesid ek fer letour pou al dan Lenor;
Li kontign tourn an-ron; divan-la kontign fer so bann letour.
7 Tou bann larivier* desann dan lamer, ek pourtan lamer pa ranpli.
Bann larivier retourn dan plas kot zot ti koumans koule pou ki zot rekoumans koule ankor.
8 Tou bann kitsoz fatigan;
Personn pa kapav mem dekrir tou sa bann kitsoz-la.
Lizie pa satisfe ar seki li trouve;
Ek zorey pa satisfe ar seki li tande.
9 Seki’nn arive, samem pou re-arive,
Ek seki’nn fer, samem pou refer ankor;
Pena nanye nouvo anba soley.
10 Eski ena enn kitsoz lor ki enn kikenn kapav dir, “Get sa—li nouvo”?
Sa ti deza existe depi bien lontan;
Sa ti deza existe avan nou lepok.
11 Personn pa rapel bann dimounn lontan;
Personn pa pou rapel bann dimounn ki pou vini apre;
Ni mem bann ki pou vini bien apre zot, pa pou rapel zot.
12 Mwa, sa kikenn ki rasanble la, mo ti lerwa lor Izrael dan Zerizalem. 13 Mo’nn fer boukou zefor pou etidie ek explor avek sazes tou seki’nn fer anba lesiel—travay mizerab ki Bondie inn donn garson bann zom pou ki zot touletan res okipe.
14 Mo’nn trouv tou bann travay ki ti fer anba soley,
Ek gete! Tou kitsoz ti initil, parey kouma galoup deryer divan.
15 Pa kapav redres seki traver,
Ek pa kapav kont seki manke.
16 Lerla, dan mo leker mo ti dir: “Gete! Mo’nn gagn enn gran sazes, plis ki ninport kisann-la ki ti la avan mwa dan Zerizalem, ek mo leker inn vinn vremem saz ek inn gagn enn kantite konesans.” 17 Mo’nn fer boukou zefor pou konn lasazes, pou konn lafoli,* ek pou konn seki bet, ek sa osi se koumadir galoup deryer divan.
18 Parski enn kantite sazes amenn enn kantite sagrin,
Donk ninport kisann-la ki ogmant so konesans pou ogmant so lapenn.