Zistwar 93
Jésus Nouri Enn Lafoul
ENN kitsoz terib finn arive. Fek touy Jean Baptiste. Hérodiade, madam lerwa, pa ti kontan li. Ek li’nn reisi konvink lerwa pou fer koup latet Jean.
Kan Jésus tann sa, li bien tris. Li al dan enn plas kot pena personn. Me bann dimounn swiv li. Kan Jésus trouv bann lafoul, li ena pitie pou zot. Alor, li koz lor rwayom Bondie ar zot ek li geri bann malad.
Sa swar-la so bann disip vinn dir li: ‘Inn ariv tar ek se enn landrwa kot pena nanye mem. Fer bann dimounn-la ale pou ki zot kapav aste kitsoz pou zot manze dan bann vilaz ki pre.’
Jésus reponn: ‘Pa neseser zot ale. Donn zot kitsoz pou manze zotmem.’ Jésus demann Philippe: ‘Kotsa nou kapav aste ase manze pou nouri tou sa dimounn-la?’
Philippe reponn: ‘Pou bizin boukou kas, zis pou donn sakenn enn ti bouse manze.’ André dir: ‘Sa garson ki pe sarye nou manze la, ena sink dipin ek de pwason. Me li pa pou ase pou tou sa dimounn-la.’
Jésus dir: ‘Fer tou dimounn asize lor lerb.’ Lerla, li remersie Bondie pou sa manze-la ek li koumans kas bann dipin-la bout-bout. Apre sa, bann disip donn tou bann dimounn dipin ek pwason. Ena 5,000 zom ek plizir milye madam ek zanfan. Zot tou manze ziska ki zot vant bien plin. Ek kan bann disip ramas seki finn reste, ena 12 panie ranpli!
Asterla Jésus fer so bann disip mont dan enn bato pou travers lamer Galilée. Pandan lanwit, enn gro siklonn leve ek bann vag sakouy bato-la. Bann disip extra per. Lerla, omilie lanwit, zot trouv enn kikenn pe marse lor delo pe vinn ver zot, zot pa kone kisannla sa. Laper dan zot, zot kriye.
Jésus dir: ‘Pa bizin gagn per. Mwa sa!’ La osi zot pa krwar. Alor Pierre dir: ‘Si vremem twa sa, Segner, dir mwa mars lor delo pou vinn zwenn twa.’ Jésus reponn: ‘Vini!’ Lerla Pierre sorti dan bato ek li koumans mars lor delo! Me enn kou, laper trap li ek li koumans koule, me Jésus sap li.
Plitar, ankor enn fwa Jésus nouri plizir milye dimounn. Sa fwa-la li fer sa avek set dipin ek de-trwa ti pwason. Ek ankor enn fwa, ena ase manze pou tou dimounn. Eski sa pa extraordiner fason ki Jésus pran kont bann dimounn? Kan li pou regne kouma lerwa ki Bondie inn swazir, zame nou pou bizin trakase pou okenn kitsoz!
Matthieu 14:1-32; 15:29-38; Jean 6:1-21.