LESON 7
Bann Profet Fer Konn Seki Bondie Inn Promet
BANN profet dan lepase ti montre ki zot ti ena lafwa dan Bondie. Zot ti krwar dan so bann promes ek samem ki ti pli inportan dan zot lavi. Me ki sa bann promes-la sa?
Apre ki Adan ek Ev ti rebele dan zardin Eden, deswit Bondie ti promet ki li ti pou swazir enn kikenn pou kraz latet “serpan-la,” sa vedir ki ti pou detrir li net. (Zenez 3:14, 15) Me kisann-la sa serpan-la? Li reprezant “sa gro dragon-la,” “sa premie serpan-la, limem ki apel Diab ek Satan.” (Revelasion 12:9, 12) Me, ki sa Kikenn Ki Bondie Inn Swazir la?
Anviron 2,000 an apre ki Zeova ti anons sa premie profesi-la, li ti promet profet Abraam ki sa Kikenn Ki Li’nn Swazir la ti pou enn so bann desandan. Bondie ti dir Abraam: “Par mwayin to desandans tou bann nasion lor later pou gagn enn benediksion pou zot parski to’nn ekout mo lavwa.”—Zenez 22:18.
Lane 1473 Avan Nou Lepok,a Bondie ti donn profet Moiz plis linformasion lor sa “desandans” la. Moiz ti dir bann zanfan Izrael: “Zeova to Bondie pou fer enn parmi to bann prop frer vinn enn profet, parey kouma mwa. Zot pou bizin ekout li.” (Deteronom 18:15) Alor, sa profet ki ti pou vini la ek ki ti pou parey kouma Moiz la, ti pou enn desandan Abraam.
Sa profet-la ti pou osi enn desandan Lerwa David ek li ti pou vinn enn gran lerwa. Bondie ti fer Lerwa David sa promes-la: “Mo pou donn twa enn desandans apre twa” ek “mo pou fixe tronn so rwayom bien solid pou touletan.” (2 Samiel 7:12, 13) Bondie ti dir osi ki ti pou apel sa desandan David-la “Prins Lape.” Apre sa, Bondie ti dir: “So regn pou kontign ogmante ek lape zame pa pou fini, lor tronn David ek so rwayom, pou ki so rwayom bien etabli ek res stab par lazistis ek ladrwatir, depi aster-la mem ek pou touletan.” (Izai 9:6, 7) Wi, sa Sef ki drwat la pou re-amenn lape ek lazistis partou lor later. Me kan li pou vini?
Sa “desandans” ki Bondie ti promet la ti pou . . . enn desandan Abraam, enn profet, parey kouma Moiz, enn desandan David, vini lane 29 Nou Lepok, kraz latet Satan, sa serpan-la
Plizir lane apre, anz Gabriel ti dir profet Daniel: “To bizin kone, ek to bizin konpran ki depi ki’nn gagn lord pou repar ek rekonstrir Zerizalem, ziska Lemesi, sa Sef-la, pou ena 7 semenn ek osi 62 semenn.” (Daniel 9:25) Sa fer antou 69 semenn, sak semenn reprezant 7 lane, seki fer antou 483 lane. Sa inn koumanse lane 455 Avan Nou Lepok ek inn fini lane 29 Nou Lepok.b
Eski Lemesi, sa profet ki kouma Moiz la ek sa “desandans” ki bann dimounn ti pe atann la, ti vremem vini lane 29 Nou Lepok? Anou get sa ansam.
a Bann dimounn abitie servi lexpresion “Avan Zezi Kris” pou lexpresion “Avan Nou Lepok” ek lexpresion “Apre Zezi Kris” pou lexpresion “Nou Lepok.”
b Get not 2 lor paz 255 dan liv Viv Ere pou Touletan! ki’nn pibliye par bann Temwin Zeova.