LESON 18
Kouma Nou Kapav Kone Kisannla Bann Vre Kretien?
Bann milyon dimounn dir ki zot Kretien. Me selman, zot tou pena mem krwayans ni viv dan mem fason. Alor, kouma nou kapav kone kisannla ki bann vre Kretien?
1. Ki ete enn Kretien?
Enn Kretien se enn disip Zezi Kris, setadir enn dimounn ki swiv Zezi. (Lir Zistwar Bann Apot 11:26.) Kouma enn kikenn montre ki li enn disip Zezi? Zezi ti dir: “Si zot gard mo parol, zot mo bann vre disip.” (Zan 8:31) Savedir ki bann vre Kretien bizin obeir seki Zezi ti ansegne. Seki Zezi ti ansegne ti touletan baze lor Labib, alor bann vre Kretien osi fer parey.—Lir Lik 24:27.
2. Kouma bann vre Kretien montre lamour?
Zezi ti dir so bann disip: “Kontan zot prosin, parey kouma mwa mo kontan zot.” (Zan 15:12) Kouma Zezi ti montre ki li ti kontan so bann disip? Li ti pas letan ar zot, li ti ankouraz zot, ek li ti ed zot. Li ti mem donn so lavi pou zot. (1 Zan 3:16) Dan mem fason, bann vre Kretien pa zis koz lor lamour. Zot montre par zot bann parol ek zot bann aksion ki zot kontan sakenn zot kamarad.
3. Ki travay bien inportan bann vre Kretien fer?
Zezi ti donn so bann disip enn travay. ‘Li ti avoy zot pou al proklam Rwayom Bondie.’ (Lik 9:2) Bann premie Kretien pa ti zis pres dan bann plas kot zot ti ador Bondie, me osi kot bann dimounn ek dan bann plas piblik. (Lir Zistwar Bann Apot 5:42; 17:17.) Azordi osi, bann vre Kretien koz lor bann verite ki ena dan Labib partou kot bann dimounn ete. Zot lamour pou bann dimounn pous zot pou servi zot letan ek zot lenerzi pou partaz mesaz ki ena dan Labib. Sa mesaz-la kapav rekonfort bann dimounn ek donn zot enn lespwar.—Mark 12:31.
ANOU GET INPE PLIS
Gete kouma ou kapav fer diferans ant bann vre Kretien, ek bann dimounn ki pa swiv lexanp Zezi ek seki li ti ansegne.
4. Zot rod laverite dan Labib
Bann premie Kretien ti montre ki Labib ti ena valer pou zot
Boukou dimounn dir ki zot Kretien, me zot pa panse ki li inportan pou konpran ek aplik seki ena dan Labib. Zwe VIDEO-la, ek apre sa, get sa kestion-la ansam:
Kouma sertin legliz Kretien finn anpes bann dimounn pou aprann seki Zezi ti ansegne?
Zezi ti ansegn laverite ki sorti dan Labib. Lir Zan 18:37, ek apre sa, get sa kestion-la ansam:
Dapre Zezi, kouma nou kapav kone kisannla ki bann Kretien “ki dan laverite”?
5. Zot pres bann verite ki ena dan Labib
Bann premie Kretien ti pres ar lezot
Avan ki Zezi ti al dan lesiel, li ti donn so bann disip enn travay ki zot ti pou bizin kontign fer ziska azordi. Lir Matie 28:19, 20 ek Zistwar Bann Apot 1:8, ek apre sa, get sa kestion-la ansam:
Ziska kan ek ziska kotsa zot ti pou prese?
6. Zot met an pratik seki zot prese
Enn misie ki apel Tom inn konpran kisannla bann vre Kretien. Ki kitsoz inn ed li pou konpran sa? Zwe VIDEO-la, ek apre sa, get sa bann kestion-la ansam:
Dan sa video-la, kifer Tom ti degoute ar larelizion?
Kifer li ti sir ki li finn trouv laverite?
Seki enn dimounn fer ena plis pwa ki seki li dir. Lir Matie 7:21, ek apre sa, get sa kestion-la ansam:
Ki kitsoz pli inportan pou Zezi, seki nou dir ouswa seki nou fer?
7. Zot kontan sakenn zot kamarad
Bann premie Kretien ti kontan sakenn zot kamarad
Eski bann Kretien vremem pre pou donn zot lavi pou bann lezot Kretien? Zwe VIDEO-la, ek apre sa, get sa bann kestion-la ansam:
Dan video-la, ki ti pous Lloyd pou riske so lavi pou Frer Johansson?
Eski ou panse ki li’nn azir kouma enn vre Kretien?
Lir Zan 13:34, 35, ek apre sa, get sa bann kestion-la ansam:
Kouma bann disip Zezi (setadir bann vre Kretien) bizin tret bann dimounn ki sorti dan enn lot ras ouswa enn lot pei?
Kouma bann Kretien montre vre lamour kan ena enn lager?
SERTIN DIMOUNN DIR: “Ena boukou relizion Kretien. Alor, lekel ki vre?”
Ki verse ou ti pou servi pou montre kisannla bann vre Kretien ete?
SEKI NOU’NN APRANN
Bann vre Kretien swiv seki Labib dir, zot montre vre lamour anver sakenn zot kamarad, ek zot pres bann verite ki ena dan Labib.
Eski Ou Rapel?
Lor ki kitsoz bann vre Kretien baz zot bann krwayans?
Ki kalite bann vre Kretien bizin ena pou ki nou kapav rekonet zot?
Ki travay bann vre Kretien fer?
DEKOUVER
Aprann plis lor enn group dimounn ki anvi swiv lexanp Zezi ek so bann lansegnman.
Gete ki’nn ed enn madam ki ti enn maser, pou trouv bann dimounn ki ena enn lafwa sinser.
Gete kouma bann vre Kretien montre lamour pou zot bann kamarad kan zot bizin led.
Gete kouma bann Kretien dan premie siek ek bann vre Kretien azordi, montre ki zot bann vre disip Zezi.
“Couma pou identifié vrai religion chretien?” (Latour Degard, 1e Me 2012)