LESON 51
Kouma Ou Kapav Fer Zeova Kontan kan Ou Koze?
Kan Zeova finn kree nou, Li’nn donn nou enn zoli kado: Li’nn donn nou kapasite pou koze. Eski fason ki nou servi sa kado-la vremem inportan pou Li? Wi! (Lir Zak 1:26.) Me kouma nou kapav servi nou kapasite pou koze pou fer Zeova kontan?
1. Kouma nou kapav servi nou kapasite pou koze?
Labib dir ki nou bizin ‘ankouraz ek fortifie’ sakenn nou kamarad. (1 Tesalonisien 5:11) Eski ou kapav mazinn enn kikenn ki bizin lankourazman? Ki ou kapav fer pou ki li santi li pli bien? Rasir li ki ou vremem gagn so traka. Kitfwa ou kapav dir li seki ou bien apresie ar li. Eski ou kapav pans enn verse ki kapav ankouraz enn kikenn ki ou kone? Ena boukou verse ki ou kapav servi pou ankouraz li. Pa bliye ki fason ki ou dir enn kitsoz li ena mem lefe ki bann parol ki ou dir. Alor, touletan fer zefor pou koz bien ek avek douser.—Proverb 15:1.
2. Ki kalite koze fode pa nou koze?
Labib dir: “Napa koz move koze.” (Lir Efezien 4:29.) Alor, fode pa ki nou servi enn langaz vilger ouswa dir bann zafer blesan ek kriel zis pou bles enn kikenn. Anplis, fode pa ki nou fer palab ek koz manti lor lezot.—Lir Proverb 16:28.
3. Ki kitsoz kapav ed nou pou koz dan enn fason ki pou ankouraz lezot?
Souvan seki nou dir montre seki ena dan nou leker ouswa seki ena dan nou lespri. (Lik 6:45) Alor, ou bizin fer zefor pou res konsantre lor bann kitsoz pozitif, setadir bann kitsoz ki zis, prop, admirab, ek ki merit gagn loner. (Filipien 4:8) Pou ki nou kapav res konsantre lor sa bann kitsoz-la, nou bizin swazir bien nou bann divertisman ek nou bann kamarad. (Proverb 13:20) Enn lot kitsoz ki kapav ed nou, se kan nou reflesi bien avan ki nou koze. Reflesi osi lor lefe ki nou bann parol pou ena lor lezot. Labib dir: “Bann koze san reflesi zot koumadir bann kout lepe, me lalang enn dimounn saz, li enn gerizon.”—Proverb 12:18.
ANOU GET INPE PLIS
Aprann kouma ou kapav koz dan enn fason ki fer Zeova kontan ek ki ankouraz lezot.
4. Kontrol nou lalang
Parfwa, nou tou nou dir bann kitsoz ki plitar nou regrete. (Zak 3:2) Lir Galat 5:22, 23, ek apre sa, get sa bann kestion-la ansam:
Ki bann kalite ou kapav demann Zeova pou donn ou pou ki ou kapav kontrol seki ou dir? Kouma sa bann kalite-la kapav ed ou?
Lir 1 Korintien 15:33, ek apre sa, get sa kestion-la ansam:
Ki linflians bann kamarad ek bann divertisman ki ou swazir kapav ena lor seki ou dir ek fason ki ou koze?
Ki kitsoz kapav inflians fason ki ou koze?
Lir Ekleziast 3:1, 7, ek apre sa, get sa kestion-la ansam:
Dan ki sitiasion li pli bon ki ou res trankil ouswa atann enn pli bon moman pou koze?
5. Koz an bien lor lezot
Kouma nou kapav evit dir bann zafer ki bles lezot ouswa dir bann move kitsoz lor lezot? Zwe VIDEO-la, ek apre sa, get sa bann kestion-la ansam:
Dan sa video-la, kifer sa frer-la ti anvi sanz fason ki li ti pe koz lor lezot?
Ki li ti fer pou sanze?
Lir Ekleziast 7:16, ek apre sa, get sa kestion-la ansam:
Ki kitsoz nou bizin rapel kan nou tante pou dir enn kitsoz negatif lor enn kikenn?
Lir Ekleziast 7:21, 22, ek apre sa, get sa kestion-la ansam:
Kouma sa bann verse-la kapav ed ou pou pa ankoler ouswa agase kan enn kikenn dir enn kitsoz negatif lor ou?
6. Ou bizin zanti kan ou koz ar ou fami
Zeova anvi ki nou zanti ek ki nou montre lamour kan nou koz avek nou fami. Zwe VIDEO-la, ek apre sa, get sa kestion-la ansam:
Ki kitsoz pou ed ou pou koz dan enn bon fason ar ou fami?
Lir Efezien 4:31, 32, ek apre sa, get sa kestion-la ansam:
Ki kalite koze kapav ankouraz nou fami?
Zeova ti dir seki Li resanti lor so Garson, Zezi. Lir Matie 17:5, ek apre sa, get sa kestion-la ansam:
Kouma ou kapav imit Zeova dan fason ki ou koz ar ou fami?
Rod bann lokazion pou felisit lezot
SERTIN DIMOUNN DIR: “Mo dir seki mo panse. Li pa mo problem si lezot pa kontan seki mo dir.”
Eski ou dakor ar sa? Kifer ou pans koumsa?
SEKI NOU’NN APRANN
Seki nou dir kapav ankouraz ouswa bles lezot. Nou bizin reflesi bien lor seki nou dir, kan nou dir li, ek kouma nou dir li.
Eski Ou Rapel?
Kouma ou kapav koz dan enn fason ki pou ankouraz lezot?
Ki kalite koze ou pou anvi evite?
Ki kitsoz kapav ed ou pou touletan koz dan enn bon fason ek ki ankourazan?
DEKOUVER
Ki kitsoz kapav ed nou pou koz dan enn fason pozitif?
Gete seki kapav ed ou pou evit ena enn langaz grosie.
Gete kouma ou kapav evit tom dan piez pou fer palab.
Dekouver kouma Zeova finn ed enn misie ki ti pe gagn difikilte pou aret zoure.