Oktob

Eski parfwa to gagn difikilte pou obeir? Lerwa David osi ti gagn difikilte pou obeir. Akoz sa, li ti dir Zeova: “Donn mwa enn lespri dobeisans.” (Ps. 51:12) David ti kontan Zeova. Kanmem sa, parfwa li ti trouv sa difisil pou obeir, ek kitfwa nou osi nou gagn sa difikilte-la. Kifer? Premierman, akoz nou inparfe, dezobeisans form parti nou leritaz. Deziemman, Satan kontign pous nou pou rebel kont Zeova, parey kouma li’nn fer. (2 Kor. 11:3) Ek trwaziemman, nou pe viv dan enn lemond ki rebel, setadir “parmi bann dimounn ki dezobeir.” (Efe. 2:2) Akoz sa, nou bizin fer zefor pou lit kont nou linperfeksion, kont Satan, ek kont sa lemond-la. Ek si nou fer sa, nou pou kapav obeir Zeova ek bann dimounn ki Li’nn donn enn sertenn lotorite. w23.10 6 ¶1

Ki nou kapav aprann ar mirak ki Zezi ti fer dan Kana? Nou aprann ki Zezi ena limilite. Kan li ti fer delo vinn divin, Zezi pa ti fer gran-nwar. An realite, zame li’nn fer gran-nwar pou bann kitsoz ki li’nn fer. Okontrer, li’nn montre ki li ena limilite kan plizir fwa li’nn donn laglwar so Papa pou bann kitsoz ki li’nn fer. (Zan 5:19, 30; 8:28) Si nou swiv lexanp Zezi ek ki nou ena limilite, nou pa pou fer gran-nwar pou bann kitsoz ki nou fer. Fode pa nou fer vantar parski se gras-a Li ki nou pe reisi fer sa. Anou pa bliye ki nou ena enn extra gran privilez pou servi Zeova. (Zer. 9:23, 24) Nou bizin donn Zeova laglwar ki Li merite. Apre tou, nou pa kapav fer nanye san led Zeova! (1 Kor. 1:26-31) Kan nou ena limilite, nou pa fer vantar kan nou ed lezot. Nou kontan parski nou kone ki Zeova inn trouv seki nou’nn fer, ek ki sa ena boukou valer pou Li. (Konpar ar Matie 6:2-4; Ebre 13:16) Nou kapav sir ki nou fer Zeova plezir kan nou ena limilite, parey kouma Zezi.—1 Pier 5:6. w23.04 4 ¶9; 5 ¶11-12

Pol ti ankouraz bann Kretien pou ‘rod lintere lezot.’ Kouma nou kapav swiv sa konsey-la pandan bann renion? Nou fer sa kan nou rapel ki lezot osi anvi reponn parey kouma nou. Anou pran enn lexanp. Kan to pe koz ar to bann kamarad, eski to pou koz tou tomem ek to pa donn zot lokazion pou koze? To pa pou fer sa, pa vre! To anvi ki zot osi zot partisip dan konversasion-la. Dan mem fason, pandan bann renion, nou anvi ki maximum dimounn gagn lokazion pou reponn. Ek enn parmi bann meyer fason pou ankouraz nou bann frer ek ser, se kan nou donn zot lokazion pou partaz zot lafwa. (1 Kor. 10:24) Alor, donn bann ti repons, koumsa pou ankor ena letan pou ki lezot reponn. Mem kan to donn enn ti repons, pa koz lor tro boukou lide. Si to koz lor tou bann lide ki ena dan paragraf-la, lezot pa pou ena nanye pou dir. w23.04 22-23 ¶11-13

Fode pa nou bliye ki li bien inportan ki nou kontign ed lezot, sirtou kan nou prese. Dan predikasion osi nou bizin rezonab. Kifer? Parski nou zwenn bann dimounn ki’nn grandi dan diferan lanvironnman, ek zot ena diferan krwayans ek diferan kiltir. Lapot Pol ti adapte li ar bann dimounn ki li ti zwenn. Anou gete seki nou kapav aprann ar so lexanp. Zezi ti fer Pol vinn “enn zapot bann nasion.” (Rom. 11:13) Pol ti bizin pres ar bann Zwif, bann Grek, bann dimounn intelizan, bann ti-dimounn, bann ofisie gouvernman, ek bann lerwa. Pou li reisi tous leker tou sa bann dimounn-la, Pol ti bizin “vinn tou kitsoz pou tou sort kalite dimounn.” (1 Kor. 9:19-22) Li ti pran letan pou reflesi lor lanvironnman kot bann dimounn sorti, lor zot krwayans ek zot kiltir, ek li ti adapte li. Nou osi nou pou vinn pli efikas dan predikasion si nou pran letan pou reflesi lor bann dimounn ki nou kapav zwenn kan nou prese ek nou koz lor bann size ki pou interes zot. w23.07 23 ¶11-12

Douser se enn lafors, se pa enn febles. Nou bizin ena lafors pou res kalm kan ena bann sitiasion difisil. Douser form parti “frwi lespri sin.” (Gal. 5:22, 23) Mo Grek ki servi pou mo “douser,” parfwa dekrir enn seval sovaz ki’nn fini drese. Esey mazinn enn seval sovaz ki bien dous. Mem si aster-la li dous, li ankor for. Nou osi, nou kapav ena sa de kalite-la, setadir nou kapav for ek anmemtan ena douser. Pou nou gagn sa, nou bizin priye Zeova ek demann Li so lespri sin. Boukou dimounn inn fer zefor pou ena douser. Par exanp, boukou parmi nou bann frer ek ser finn ena douser kan bann dimounn inn provok zot. Ek gras-a zot bon lexanp, bann dimounn inn gagn enn pli bon lopinion lor bann Temwin Zeova.—2 Tim. 2:24, 25. w23.09 14 ¶3

Dan enn vizion extraordiner, Zan ti trouv 24 ansien dan lesiel pe ador Zeova. Zot ti pe loue Zeova parski zot ti kone ki Li merite gagn “laglwar, loner ek pwisans.” (Rev. 4:10, 11) Bann anz fidel osi ena boukou rezon pou loue Zeova. Zot dan lesiel avek Li ek zot inn aprann konn Li bien. Zot trouv bann kalite Zeova dan tou seki Li fer. Ek kan zot trouve kouma Zeova azir, sa pous zot pou loue Li. (Zob 38:4-7) Nou osi nou bizin loue Zeova dan nou lapriyer. Nou fer sa kan nou dir Li kifer nou kontan Li ek respekte Li. Kan to lir ek etidie Labib, esey trouv bann kalite ki Zeova ena ek ki to vremem apresie. (Zob 37:23; Rom. 11:33) Apre sa, dir Zeova seki to resanti pou sa bann zoli kalite-la. Nou kapav osi loue Zeova parski Li ed nou ek Li ed tou nou bann frer ek ser.—1 Sam. 2:1, 2. w23.05 3-4 ¶6-7

An 1919, Gran Babilonn, ti nepli ena okenn kontrol lor bann serviter Bondie. Sa lane-la, enn “esklav fidel ek saz” ti koumans travay pou ki bann dimounn ki kontan Bondie kapav koumans mars lor “Semin ki Sin.” (Mat. 24:45-47; Iza. 35:8) Gras-a travay ki lezot ti fer dan lepase pou prepar sa semin-la, boukou inn kapav koumans mars lor “Semin ki Sin” kan zot inn aprann plis lor Zeova ek lor so proze. (Prov. 4:18) Zot ti osi fer bann sanzman dan zot lavi pou ki zot kapav swiv bann prinsip Zeova. Zeova pa ti atann ki so bann serviter fer tou sa bann sanzman-la enn sel kout. Okontrer, tigit-tigit Li ti ed so pep pou fer bann sanzman. Nou tou nou pou bien kontan kan nou pou reisi fer Zeova plezir dan tou seki nou fer! Pou ki enn semin res dan enn bon leta, ena bann travay ki bizin fer. Dan mem fason, depi 1919, bann travay pe kontigne lor “Semin ki Sin” pou ki pli boukou dimounn kapav sorti dan Gran Babilonn. w23.05 17 ¶15; 19 ¶16

Komite Santral form bann asistan pou ede dan bann diferan komite ki dirize par Komite Santral. Sa bann asistan-la pe asim zot bann responsabilite avek fidelite. Zot pare pou kontign pran swin pep Zeova. Kan dernie Kretien ki ankor lor later pou mont dan lesiel avan lafin gran soufrans, pep Zeova ki lor later pou kontign ador Li avek fidelite. Nou kone ki sa lepok-la, Gog ki sorti pei Magog, setadir plizir nasion ki’nn zwenn ansam, pou atak pep Zeova. (Eze. 38:18-20) Me sa latak-la pou bien kourt, ek sa pa pou anpes pep Zeova pou kontign ador Li. Ek alafin, Zeova pou sap so pep! Dan enn vizion, lapot Zan ti trouv enn “gran lafoul” bann lezot mouton ki “finn travers gran soufrans.” (Rev. 7:9, 14) Alor, nou sir ki Zeova pou sap so bann serviter! w24.02 5-6 ¶13-14

Ki nou bizin fer pou ki nou gagn lespri sin? Nou bizin priye Zeova, etidie so Parol Labib, ek swiv bann instriksion ki nou gagne ar so lorganizasion, ki dirize par lespri sin. Kan nou fer sa bann kitsoz-la, sa pou ed nou pou devlop “frwi lespri sin.” (Gal. 5:22, 23) Zeova donn so lespri sin zis bann dimounn ki fer zefor pou ena enn bon fason panse ek enn bon kondwit. Parkont, si nou kontign pans lor bann move kitsoz ek ki nou fer sa bann kitsoz-la, Zeova pa pou donn nou so lespri sin. (1 Tes. 4:7, 8) Pou ki nou kontign gagn lespri sin Zeova, nou bizin osi “pa mepriz bann profesi.” (1 Tes. 5:20) Dan sa verse-la, “bann profesi” se bann mesaz ki Zeova inn fer nou kone gras-a so lespri sin, parmi ena mesaz konsernan zour Zeova ek osi mesaz konsernan lepok difisil ki nou pe viv. Fode pa nou panse ki zour Zeova, ouswa Armagedon, pa pou arive tanki nou vivan. Okontrer, nou bizin montre ki nou pe atann sa zour-la arive. Nou fer sa kan nou kontign res bien okipe dan ‘bann aksion ki montre ki nou atase ar Bondie,’ ek kan nou kontign ena enn bon kondwit.—2 Pier 3:11, 12. w23.06 12 ¶13-14

Ki bann Kretien bizin fer kan enn zimaz porno aparet lor zot laparey elektronik? Deswit nou bizin tir sa zimaz-la devan nou lizie. Li pou pli fasil nou fer sa, si nou pa bliye ki seki pli inportan pou nou, se nou lamitie ar Zeova. An realite, mem bann zimaz ki pa porno kitfwa kapav fer nou ena bann panse imoral. Kifer nou bizin rezet sa bann kalite zimaz-la? Parski nou pa anvi mem pans pou fer enn kitsoz ki imoral. (Mat. 5:28, 29) Enn ansien, ki apel David ek ki res Tayland, dir: “Mo ti demann momem: ‘Mem si sa bann zimaz-la pa porno, eski Zeova pou kontan si mo kontign get zot?’ Kan mo reflesi koumsa, sa ed mwa pou azir ar sazes.” Kan nou ena enn gran respe pou Zeova ek ki nou pa anvi desevwar Li, sa pou ed nou pou azir avek sazes. Respe pou Bondie se “koumansman lasazes.” w23.06 23 ¶12-13

“Bann lasam ki trouv andan,” kitfwa reprezant nou bann lasanble. Pandan gran soufrans, Zeova promet ki Li pou protez nou si nou kontign servi Li ansam ar nou bann frer ek ser. Alor, li bien inportan ki aster-la mem nou pa zis toler nou bann frer ek ser. Nou bizin fer zefor pou kontan zot. Nou lavi depann lor nou lamour pou nou bann frer ek ser! “Gran zour Zeova” pou enn moman bien difisil pou tou dimounn! (Sof. 1:14, 15) Bann serviter Zeova osi pou gagn bann difikilte sa lepok-la. Me si nou prepar nou depi aster-la mem, nou pou reisi gard nou kalm ek nou pou kapav ed lezot. Nou pou reisi andir ninport ki leprev ki nou gagne. Kan nou bann frer ek ser pou dan difikilte, nou pou fer nou maximum pou montre konpasion anver zot, nou pou soutenir, ek nou pou donn zot seki zot bizin. Nou pou osi res pros ar nou bann frer ek ser, parski depi aster-la mem nou pe fer zefor pou kontan zot. Lerla, Zeova pou rekonpans nou kan Li pou donn nou lavi eternel dan enn lemond kot pa pou ena okenn soufrans!—Iza. 65:17. w23.07 7 ¶16-17

Labib souvan dekrir bann dimounn ki fidel ar Zeova, kouma bann dimounn ki for. Selman, zot pa ti touletan santi zot for. Par exanp, Lerwa David parfwa ti santi li “for kouma enn montagn.” Me ena fwa, li “ti gagn bien per.” (Ps. 30:7) Gras-a lespri sin Zeova, Sanson ti ena enn lafors extraordiner. Selman, li ti kone ki san lafors ki Zeova donn li, li ti pou “vinn feb, parey kouma ninport ki zom.” (Ziz 14:5, 6; 16:17) Sa bann zom fidel-la ti for zis parski Zeova ti donn zot lafors. Lapot Pol ti rekonet ki li osi li ti bizin lafors ki Zeova done. (2 Kor. 12:9, 10) Li ti tom malad. (Gal. 4:13, 14) Ena fwa, li ti osi gagn difikilte pou “fer seki bon.” (Rom. 7:18, 19) Ek parfwa, li ti trakase ek li ti gagn per, parski li pa ti kone seki ti pou ariv li. (2 Kor. 1:8, 9) Selman, mem si Pol ti feb, li ti vinn pwisan. Kouma? Zeova ti donn Pol lafors ki li ti bizin pou andir so bann difikilte. w23.10 12 ¶1-2

Si parfwa to santi ki to pa vo nanye, pa bliye ki se Zeova Limem ki’nn atir twa ver Li. (Zan 6:44) Li trouv to leker ek to bann zoli kalite, mem si twa to pa trouve. (2 Kro. 6:30) Alor, kan Li dir ki to ena boukou valer pou Li, to kapav sir ki se samem ki Li resanti. (1 Zan 3:19, 20) Avan ki zot konn laverite, sertin ti fer bann move kitsoz. Akoz sa, kitfwa zot ankor santi zot koupab. (1 Pier 4:3) Mem bann fidel serviter Zeova ki pe servi Li depi plizir lane, kitfwa ankor pe lit kont sa santiman-la. Eski to dan sa sitiasion-la? Eski parfwa to panse ki Zeova pa’nn pardonn twa? Si to dan sitiasion-la, kan to reflesi lor bann serviter Zeova ki ti ena mem santiman ki twa, sa pou bien rekonfort twa. Par exanp, kan lapot Pol ti mazinn bann pese ki li ti fer dan lepase, sa ti bien dekouraz li. (Rom. 7:24) Ek mem si li ti repanti ek pran batem, li ti panse ki limem “pli tipti parmi bann zapot,” ek parmi “bann ki fer pese,” li ti dir ki limem “premie.”—1 Kor. 15:9; 1 Tim. 1:15. w24.03 27 ¶5-6

Enn leson ki nou kapav aprann ar move desizion ki Lerwa Zoas ti pran, se ki nou bizin swazir bann kamarad ki pou ena enn bon linflians lor nou, setadir bann kamarad ki kontan Zeova ek ki anvi fer Li plezir. Fode pa nou rod fer kamarad zis ar bann ki ena mem laz ki nou. Pa bliye ki Zoas ti boukou pli zenn ki so kamarad Zoad. Kan to swazir to bann kamarad, to kapav demann tomem: ‘Eski zot pou ed mwa pou ena plis lafwa an Zeova? Eski zot pou ankouraz mwa pou swiv bann prinsip Zeova? Eski zot koz lor Zeova ek lor bann verite ki ena dan Labib? Eski zot ena respe pou bann prinsip Zeova? Eski zot pou dir mwa zis bann kitsoz ki mo anvi tande, ouswa eski zot pou ena kouraz pou koriz mwa kan mo fer bann erer?’ (Prov. 27:5, 6, 17) Avredir, si to bann kamarad pa kontan Zeova, to pa bizin zot. Me si to ena bann kamarad ki kontan Zeova, tas ar zot parski zot pou ena enn bon linflians lor twa.—Prov. 13:20. w23.09 9 ¶6-7

Alfabe Grek koumans par alfa ek li terminn par omega. Alor, kan Li dir ki Li “Alfa ek Omega,” Zeova pe rod dir ki kan Li koumans enn kitsoz, Li terminn li. Apre ki Li ti kree Adan ek Ev, Li ti dir zot: “Gagn zanfan, vinn boukou, ranpli later ek ena kontrol lor li.” (Zen. 1:28) Kan Zeova ti explik so proze pou later ek pou bann dimounn, sa ti enn koumansman, koumadir Zeova ti dir “Alfa.” Ek kan so proze pou akonpli, setadir kan later ki’nn vinn enn paradi, pou ranpli ar bann desandan Adan ek Ev ki’nn vinn parfe, se koumadir Li pou dir “Omega.” Apre ki Zeova ti fini “kree lesiel ek later, ek tou seki ena ladan,” Li ti donn enn garanti. Se garanti ki so proze pou later ek pou bann dimounn pou realize lafin sa setiem zour-la.—Zen. 2:1-3. w23.11 5 ¶13-14

Sa ti pou pran apepre kat mwa pou ki bann Zwif sorti Babilonn pou retourn Zerizalem, ek sa vwayaz-la ti pou bien difisil. Selman, Zeova ti promet bann Izraelit ki Li ti pou tir tou bann obstak ki ti kapav anpes zot retourne. Bann Zwif ki ti fidel ar Zeova ti kone ki zot ti pou gagn boukou bienfe si zot ti retourn Izrael. Sa bann bienfe-la ti pou pli boukou ki ninport ki sakrifis ki zot ti pou bizin fer. Ek pli gran bienfe ki zot ti pou gagne ti konsern zot ladorasion pou Zeova. Pa ti ena okenn tanp pou Zeova dan Babilonn. Anplis, dapre Lalwa Moiz, bann Izraelit ti bizin fer bann sakrifis. Me dan Babilonn pa ti ena okenn lotel kot zot ti kapav fer sa bann sakrifis-la. Pa ti pran okenn dispozision osi pou ki bann pret fer sa bann sakrifis-la. Dan sa lavil-la, ti ena osi pli boukou dimounn ki ti pe ador bann fos bondie ek ki pa ti ena okenn respe pou Zeova ek so bann prinsip. Akoz sa, bann milye Zwif ki ti kontan Zeova, ti bien anvi retourn dan Izrael pou ki zot kapav ador Zeova kouma bizin. w23.05 14-15 ¶3-4

Pou nou kontign konport nou “kouma bann zanfan lalimier,” nou bizin led lespri sin Bondie. Kifer? Parski li pa fasil pou res fidel ar Zeova dan sa lemond imoral la. (1 Tes. 4:3-5, 7, 8) Lespri sin Bondie kapav ed nou pou rezet fason panse sa move lemond-la. Li kapav osi ed nou pou kontign fer seki bon. (Efe. 5:9) Pou nou gagn lespri sin, nou bizin priye Zeova. Zezi ti dir ki Zeova “donn lespri sin bann ki demann li.” (Lik 11:13) Enn lot fason osi ki nou gagn lespri sin, se kan nou loue Zeova ansam ar nou bann frer ek ser dan renion. (Efe. 5:19, 20) Lespri sin pou ed nou pou viv dan enn fason ki pou fer Bondie plezir. w24.03 23-24 ¶13-15

Eski to bizin plis pasians? Si wi, alor priye Zeova pou to gagn li. Pasians form parti frwi lespri sin Bondie. (Gal. 5:22, 23) Alor, nou bizin priye Zeova ek demann Li pou ed nou pou devlop bann kalite ki form parti frwi lespri sin. Si nou dan enn sitiasion kot nou bien bizin ena pasians, nou bizin ‘kontign demann’ Zeova so lespri sin pou ki Li ed nou pou ena pasians. (Lik 11:13) Nou kapav osi demann Zeova pou ed nou pou trouv bann kitsoz parey kouma Li. Lerla, apre ki nou’nn fini priye Li, nou bizin fer nou maximum pou ki nou ena pasians toulezour. Plis nou priye ek nou fer zefor pou ena pasians, plis sa kalite-la pou form parti nou personalite. Reflesi osi lor bann lexanp ki ena dan Labib. Labib koz lor boukou dimounn ki ti ena pasians. Kan nou reflesi lor zot lexanp, nou pou trouve seki nou bizin fer pou ki nou ena pasians. w23.08 22 ¶10-11

Zezi ti ed lapot Pier pou konpran ki Zeova ti pou pran li swin. Apre so rezireksion, Zezi ti fer enn mirak ek li ti fer Pier ek bann lezot zapot gagn boukou pwason. (Zan 21:4-6) Sa mirak-la sirman ti fer Pier konpran ki Zeova ti pou kapav donn li seki li bizin pou viv. Sirman Pier ti rapel osi ki Zezi ti dir ki Zeova pou pran swin bann ki “kontign met Rwayom Bondie . . . an premie.” (Mat. 6:33) Ki lefe sa finn ena lor lapot Pier? Olie ki li met so biznes lapes an premie dan so lavi, li ti fer so servis pou Zeova vinn so priorite. Lapantkot lane 33 Nou Lepok, Pier ti prese avek kouraz, ek gras-a li, plizir milye dimounn ti aksepte bon nouvel. (Zist. 2:14, 37-41) Apre sa, li ti ed bann Samariten ek bann non-Zwif pou aprann konn Zezi ek pou swiv li. (Zist. 8:14-17; 10:44-48) Zeova ti servi Pier dan enn fason extraordiner pou ed boukou dimounn pou vinn dan lasanble Kretien. w23.09 20 ¶1; 23 ¶11

Anviron de-z-an apre ki bann Babilonien ti detrir Zerizalem, Lerwa Babilonn, Naboukodonozor, ti fer enn rev ki ti fer li gagn per. Dan so rev, ti ena enn gran stati. Li ti fer apel tou bann zom ki ena sazes dan so rwayom, ek parmi ti ena Daniel. Li ti demann zot ki rev li’nn fer, ek li ti osi demann zot pou explik rev-la. Si zot pa ti reisi fer sa, li ti pou touy zot tou. (Dan. 2:3-5) Daniel ti bizin azir vit, sinon boukou dimounn ti pou mor. Li “ti al get lerwa ek ti demann li pou donn li inpe letan pou ki li kapav explik lerwa so rev.” (Dan. 2:16) Pou fer sa, Daniel ti bizin ena kouraz ek lafwa. Anplis, okenn par dan Labib pa dir ki Daniel ti deza explik bann rev. Daniel ti al get so bann kamarad ek li ti demann zot “pou priye Bondie ki dan lesiel pou ki li montre mizerikord anver zot ek ki li fer zot konn sa sekre-la.” (Dan. 2:18) Zeova ti reponn zot lapriyer. Avek led Zeova, Daniel ti explik Naboukodonozor so rev. Daniel ek so bann kamarad ti reisi sap zot lavi. w23.08 3 ¶4

Reflesi lor bann bienfe ki nou gagne kan nou ena pasians. Kan nou ena pasians, nou pa trakase plis ki bizin, ek nou pli ere. Alor, kan enn kikenn ena pasians, li ena enn pli bon lasante mantal ek fizik. Kan nou pasian ar lezot, nou ena enn pli bon relasion avek zot. Lerla, ena plis linite dan lasanble. Kan enn kikenn provok nou, nou pa ankoler vit, ek sa ede pou ki sitiasion-la pa anpire. (Ps. 37:8; Prov. 14:29) Me pli inportan, nou imit nou Papa Zeova ek nou vinn pli pros ar Li. Pasians li vremem enn zoli kalite, ek nou gagn boukou bienfe kan nou ena li. Mem si parfwa nou kapav gagn difikilte pou ena pasians, avek led Zeova nou kapav kontign devlop sa kalite-la. Ek pandan ki nou pe atann avek pasians lemond nouvo, nou kapav sir ki “lizie Zeova lor tou bann ki ena enn gran respe pou li, lor tou bann ki atann so lamour fidel.” (Ps. 33:18, NW) Alor, anou bien deside pou kontign abiy nou ar pasians. w23.08 21 ¶7; 25 ¶16-17

Zak servi lexanp enn zom ki zanti anver enn dimounn ris, me ki maltret enn dimounn pov. Zak dir ki bann aksion sa dimounn-la montre ki li pena lafwa. (Zak 2:1-5, 9) Zak koz osi lor enn kikenn ki trouve ki ‘enn frer ouswa enn ser pena linz ek pena ase manze.’ Selman, li pa fer nanye pou ed li. Mem si sa dimounn-la dir ki li ena lafwa, so bann aksion pa montre sa. (Zak 2:14-16) Zak ti servi lexanp Raab, ek li ti dir ki Raab ti montre par so bann aksion ki li ti ena lafwa. (Zak 2:25, 26.) Raab ti tann koz lor Zeova, ek li ti konpran ki Zeova ti pe soutenir bann Izraelit. (Zozwe 2:9-11) Akoz sa, kan lavi de espion Izraelit ti an danze, Raab ti protez zot. Li ti montre par so bann aksion ki li ti ena lafwa an Zeova. Se pou sa rezon-la ki, mem si Raab pa ti enn Izraelit, Zeova ti konsider li kouma enn kikenn ki drwat, parey kouma Abraam. So lexanp montre nou ki se par nou bann aksion ki nou montre ki nou ena lafwa. w23.12 5-6 ¶12-13

Nou bann Kretien, akoz sa fode pa nou kontant nou zis ar bann kitsoz debaz ki ena dan Labib. Avek led lespri sin Zeova, nou anvi aprann “mem bann kitsoz profon ki konsern Bondie.” (1 Kor. 2:9, 10) Dan to letid personel, eski to kapav etidie plis an profonder, pou ki to kapav vinn pli pros ar Zeova? Par exanp, to kapav etidie kouma Zeova inn montre lamour anver so bann serviter dan lepase, ek kouma sa montre ki Li kontan nou osi. To kapav etidie bann dispozision ki Zeova ti pran pou ki bann Izraelit ador Li, ek kouma bann Kretien swiv bann dispozision koumsa azordi. Ouswa to kapav etidie plis an profonder bann profesi ki Zezi ti realize kan li ti lor later. Bann size koumsa pou pli interesan pou etidie, si to servi l’Index des publications des Témoins de Jéhovah ouswa Liv Resers pou Bann Temwin Zeova. Kan to etidie Labib an profonder, sa pou ranforsi to lafwa ek sa pou ed twa pou “trouv konesans Bondie.”—Prov. 2:4, 5. w23.10 18-19 ¶3-5

Mo “profon” ki lapot Pier servi, vedir “ki grandi.” Deziem parti sa verse-la explik lefe ki enn lamour profon ena, setadir li kouver pese nou bann frer ek ser. Pou nou konpran sa, anou pran enn lexanp. Nou lamour pou nou bann frer ek ser bizin parey kouma enn latwal stretch. Plis nou ris li, plis li grandi ek li kouver, pa zis enn ouswa de pese, me “enn kantite pese.” Dan mem fason, si nou ena enn lamour profon pou nou bann frer ek ser, nou pou kapav kouver ouswa pardonn zot bann erer ek pas lor zot bann defo. Kan nou ena enn gran lamour pou nou bann frer ek ser, nou pou kapav pardonn zot bann erer mem kan sa bien difisil pou fer. (Kol. 3:13) Kan nou pardonn lezot, nou montre ki nou ena enn gran lamour ek ki nou anvi fer Zeova plezir. w23.11 10-12 ¶13-15

Kan li ti ena 26 an, Lerwa Zozias ti donn lord pou fer enn renovasion dan tanp. Pandan sa renovasion-la, zot ti retrouv “liv lalwa Zeova, ki ti done atraver Moiz.” Kan lerwa ti aprann seki ti ena dan sa liv-la, deswit li ti fer bann sanzman pou obeir lalwa Zeova. (2 Kro. 34:14, 19-21) Eski to anvi lir Labib regilierman? Kitfwa to pe deza fer zefor pou lir li toulezour. Eski to kontan seki to pe aprann? Eski to not bann verse ki kapav ed twa? Kan li ti ena anviron 39 an, Zozias ti fer enn erer ek li ti mor akoz sa. Olie ki li ti demann Zeova pou gid li, li ti kont lor limem. (2 Kro. 35:20-25) Ki leson nou aprann? Ninport ki laz nou ena ek ninport ki kantite letan nou dan laverite, nou bizin kontign vinn pli pros ar Zeova. Pou nou fer sa, nou bizin kontign priye Li regilierman pou rod so direksion, etidie so Parol Labib, ek ekout konsey bann Kretien ki ena lexperyans. Si nou fer sa bann kitsoz-la, nou pou evit fer bann gro erer ek nou pou plis zwaye.—Zak 1:25. w23.09 12 ¶15-16

Labib koz lor bann fam ki ti servi Zeova ek ki ti bien kontan Li. Zot ti “ekilibre dan zot bann labitid” ek “fidel dan tou kitsoz.” (1 Tim. 3:11) Dan nou bann lasanble osi, ena boukou madam ki vremem kontan Zeova ek nou kapav aprann boukou kitsoz avek zot. Zenn ser, eski to konn de-trwa ser dan to lasanble ki ena matirite ek ki to kapav swiv zot lexanp? Reflesi lor bann zoli kalite ki zot ena ek gete kouma to kapav devlop sa bann kalite-la twa osi. Limilite bien inportan pou ki enn Kretien ena matirite. Si enn ser ena limilite, li pou ena enn bon lamitie avek Zeova ek avek lezot. Par exanp, si enn ser ena limilite ek li kontan Zeova, li pou obeir prinsip lotorite ki Zeova inn etabli. (1 Kor. 11:3) Li pou swiv sa prinsip-la dan so fami ek dan so lasanble. w23.12 18-19 ¶3-5

Zeova anvi ki enn mari kontan so madam, ek ki li pran li swin lor plan fizik, emosionel, ek spiritiel. Kan to devlop kapasite pou reflesi, to respekte bann madam, ek to vinn enn kikenn lor ki lezot kapav konte, sa kapav ed twa pou vinn enn bon konzwin. Apre ki to marye, to kapav desid pou gagn zanfan. Kouma lexanp Zeova kapav ed twa pou vinn enn bon papa? (Efe. 6:4) Zeova pa ti ezite pou dir so garson Zezi ki Li bien kontan li. (Mat. 3:17) Si to vinn enn papa, fer an-sort ki to dir to zanfan ki kantite to kontan li. Pa ezite pou felisit li pou bann bon kitsoz ki li fer. Bann papa ki swiv lexanp Zeova, zot ed zot zanfan pou vinn bann Kretien ki ena matirite. To kapav prepar twa depi aster-la mem pou asim sa responsabilite-la, kan to pran swin to fami ek to bann frer ek ser dan lasanble, ek kan to pa ezite pou dir zot ki kantite to kontan zot.—Zan 15:9. w23.12 28-29 ¶17-18

Mem si nou fidel anver Zeova, nou gagn bann difikilte ek nou tom malad, parey kouma tou dimounn. Kitfwa osi nou gagn persekision ar bann dimounn ki pa kontan Zeova. Mem si Zeova pa anpes nou gagn sa bann difikilte-la, Li promet ki Li pou ed nou. (Iza. 41:10) Avek so led, nou kapav res zwaye, nou kapav pran bann bon desizion ek res fidel anver Li malgre bann difikilte ki nou gagne. Zeova promet nou ki Li pou donn nou seki Labib apel “lape Bondie.” (Fil. 4:6, 7) Nou kapav gagn sa lape-la parski nou kamarad Zeova, ek sa lape-la ed nou pou res kalm. Sa lape-la “depas tou seki nou kapav konpran”; li pli extraordiner ki seki nou kapav mazine. Eski to’nn deza santi twa anpe apre ki to’nn priye Zeova ar tou to leker? Se samem “lape Bondie.” w24.01 20 ¶2; 21 ¶4

Bann dimounn ki kontan Zeova, zot anvi loue so nom avek tou zot leker. Lerwa David ti kone ki kan nou loue nom Zeova, se koumadir nou pe loue Zeova Limem. Kan nou tann nom Zeova, sa fer nou mazine ki kalite Bondie Li ete, sa fer nou pans so bann zoli kalite, ek tou bann bon kitsoz ki Li fer. Pou David, nom Zeova ti sin ek li ti loue nom Zeova ‘ar tou so leker.’ Bann Levit osi ti fer boukou zefor pou loue nom Zeova. Avek limilite, zot ti rekonet ki zot bann parol pa ti ase for pou loue Zeova kouma Li, Li merite. (Ne. 9:5.) Nou sir ki, kan zot ti loue Zeova avek limilite ek avek tou zot leker, sa ti fer Zeova plezir. w24.02 9 ¶6

To kapav sir ki Zeova zame pa pou konsider twa kouma enn lamone zete, parski to pa’nn reisi realiz enn lobzektif ki ti tro difisil pou twa. (2 Kor. 8:12) Si enn kitsoz inn anpes twa realiz enn lobzektif, tir bann leson. Mazinn bann progre ki to’nn fer dan lepase. Labib dir ki “Bondie pa inzis pou bliye seki [nou’nn] fer.” (Ebre 6:10) Alor, fode pa to bliye twa osi! Reflesi lor seki to’nn deza fer. To’nn devlop enn lamitie avek Zeova, to’nn sorti predikasion, ek to’nn pran batem. Parey kouma to’nn fer bann progre ek to’nn realiz bann lobzektif spiritiel dan lepase, to kapav kontign progrese ek realiz lobzektif ki to’nn fixe. Avek led Zeova, to kapav realiz to bann lobzektif spiritiel. Kan to pe fer zefor pou realiz to lobzektif, esey trouve kouma Zeova pe ed twa ek beni twa. Lerla, to pou zwaye. (2 Kor. 4:7) Ek si to pa bes lebra, to pou gagn bann pli gran benediksion ankor.—Gal. 6:9. w23.05 31 ¶16-18

Kan Zeova kontan enn kikenn, Li dir sa dimounn-la ki li ena so faver. Se seki Li ti fer kan Zezi ti lor later. Labib montre ki de fwa Li ti dir Zezi: “Limem mo Garson ki mo bien kontan, li’nn gagn mo faver.” (Mat. 3:17; 17:5) Eski to ti pou kontan “tann” Zeova dir twa ki to ena so faver? Li vre ki Zeova pa koz ar nou direk azordi, me Li servi Labib pou koz ar nou. Par exanp, kan nou lir seki Zezi ti dir so bann disip, se koumadir nou pe “tann” Zeova dir nou sa bann parol-la. Zezi ena mem santiman ki so Papa. Alor, kan nou lir dan Labib kouma Zezi ti dir so bann disip ki li kontan zot ek ki zot ena so faver, se koumadir nou pe “tann” Zeova dir nou sa bann parol-la. (Zan 15:9, 15) Me kan nou gagn bann difikilte, sa pa vedir ki nou’nn perdi so faver. Okontrer, sa donn nou lokazion pou montre ki kantite nou kontan Li ek nou fer Li konfians.—Zak 1:12. w24.03 27-28 ¶10-11