Eski Ou Bizin Faire Partie Dans enn Religion?

‘MO PA obligé faire partie dans enn religion, ou-soit al l’église régulièrement pou mo croire dans Bondié!’ Ala couma beaucoup dimoune réagir pou justifié ki zot pa bizin enn religion. Avrédire, certains dire ki zot senti zot pli proche ar Bondié, kan zot admire la nature ki kan zot assisté bann cérémonies religieux dans l’église. Oui zordi, de plus en plus dimoune pa trouve l’importance pou faire partie dans enn religion pou croire en Bondié.

Mais, pa tou dimoune ki partage sa l’opinion-la. Éna pensé sincèrement ki enn dimoune bizin faire partie dans enn religion ek li bizin al l’église, si li envie gagne faveur Bondié. Donc, sa question si bizin faire partie dans enn religion ou non, li pa zis concerne bann dimoune ki faire bann recherches lor la religion. Li concerne nou tou. En fait, si nou pé koz lor nou relation avec Bondié, eski ou pa pensé ki li normal ki nou considère l’opinion Bondié lor sa sujet-la? Ki la Bible enseigne nou lor là?

Couma Bondié Ti Agir Avec Bann Dimoune Dans le Passé

Environ 4,400 ans de cela, enn grand déluge ti inonde la terre complètement. C’est enn évenement tellement inoubliable, ki éna bann légendes lor là dans culture beaucoup peuples à travers la terre. Mem si bann détails pa pareil, sa bann zistoires-la éna beaucoup kitsoz en commun. Par exemple, zot tou mentionné ki seulement deux-trois dimoune ek certains zanimaux ti sapé.

Eski ou pensé ki c’est par hasard ou par chance, ki ti éna bann survivants dans Déluge? Non, c’est pa sa ki la Bible dire nou. Li vrai ki Bondié pa ti informe chaque dimoune personellement ki ti pou éna enn déluge. Mais, li ti informe Noé ki en retour, ti averti lézot.—Genèse 6:13-16; 2 Pierre 2:5.

Donc, pou gagne la vie sauve, bann dimoune ti bizin associé zot avec sa groupe bien soudé-la, c’est-à-dire Noé ek so famille. Zot ti bizin aussi accepté direction ki Bondié ti donne Noé. Mem bann zanimaux ki ti survive dans Déluge, ti bizin reste dans sa groupe-la. D’ailleurs, Bondié ti donne Noé bann instructions précis pou li kapav préserve la vie bann zanimaux.—Genèse 6:17–7:8.

Plusieurs siècles plitar, bann descendants Noé, à travers so garçon Sem, ti vinn esclaves dans l’Égypte. Mais Bondié ti éna l’intention libère zot, ek amène zot dans pays ki Li ti promette Abraham, zot ancêtre. Là encore, Bondié pa ti révèle so projet ar chaque dimoune personellement. Mais Li ti révèle sa d’abord ar Moïse ek so frère Aaron, ki Jéhovah ti choisir pou guide bann Israélites. (Exode 3:7-10; 4:27-31) Après zot délivrance dans l’Égypte, Bondié ti donne zot So la-Loi kot Montagne Sinaï, et Li ti faire zot vinn la nation Israël.—Exode 19:1-6.

Si enn Israélite ti arrivé libéré de l’Égypte, c’est seulement parski li ti associé li ar enn groupe ki Bondié ti’nn établi, et li ti suive direction bann dimoune ki Bondié ti placé à la tête sa groupe-la. Mem certains Égyptiens ti gagne la possibilité pou faire partie dans sa groupe-la, ki péna doute, ti éna faveur Bondié. Kan bann Israélites ti quitte l’Égypte, sa bann Égyptiens-la ti al avec zot, et donc zot ti mette zotmem dans enn position favorable pou gagne bénédictions Bondié.—Exode 12:37, 38.

Plitar, kan Jésus ti commence so l’activité prédication dans premier siècle, li ti rassemblé bann dimoune, li ti faire zot vinn so bann disciples. Li ti agir avec zot en tant ki groupe, mem si parfois li ti donne certains enn l’attention personel selon zot besoins. Jésus ti dire so 11 fidèle apôtres: “Zot, zot finn contigne reste avec moi dans mo bann l’épreuves. Mo pé faire enn alliance avec zot, pareil couma mo Papa finn faire enn alliance avec moi pou enn royaume.” (Luc 22:28, 29) Inpé lé-temps après, l’esprit saint Bondié ti vinn lor bann disciples kan zot ti rassemblé ensemble en groupe.—Actes 2:1-4.

Sa bann l’exemples-la montré clairement ki Bondié finn toujours agir avec so peuple en-tant ki enn groupe organisé. Mais, si Bondié ti agir avec certain dimoune personellement—Noé, Moïse, Jésus, ek lézot encore—c’est pou servi zot pou communique avec sa groupe ki ti associé directement avec zot. Bondié pa’nn changé; zordi aussi, Li pé faire pareil. Bien-sûr, sa soulève enn l’autre question: Eski li suffi ki rentre dans n’importe ki religion pou faire Bondié plaisir? Nou pou réponn sa question capital-la dans prochain l’article.

[Zimage lor page 4]

Bondié finn touletan agir avec so peuple en tant ki groupe organisé