Eski ou couma enn pié Lagani Auna?
DAN enn village en dehors la ville Port Moresby, en Papouasie-Nouvelle-Guinée, deux proclamateur ti pé retourne lakaz apré predication. Letan zot ti pé marché, zot ti trouve enn joli pié. Proclamateur ki ti pli agé-la ti dire: “Ah, enn pié lagani auna!” Li ti tourne vers so compagnon ki pli jeune, ek li ti dire: “Sa nom-la vedir pié annuel.’ Sa pié-la li different ar lezot pié ki poussé dan bann pays tropical. Toulé-l’année li perdi so bann feuille, ek kan guette li, pou croire li’nn mort. Mais, kan saison la pluie vini, li revive, li gagne fleur, ek encore enn fois li montré so beauté.”
Nou kapav aprann enn leson ar pié lagani auna, ki nou, nou appel pié flamboyant. Dapré certain expert, li parmi bann cinq pié ki pli joli dan le monde, kan zot en fleur. Mem si li perdi so bann fleur ek so bann feuille en hiver, sa pié-la garde enn stock de l’eau. So bann racine tellement solid ki zot kapav pousse mem autour bann roche ki bien dan fond. Sa permette li tini ferme kont bann gros di-vent. Nou kapav dire ki li reussi poussé parski li adapté ar bann situation difficile.
Kitfois nou kapav trouve-nou dan bann situation ki testé nou la-foi. Ki pou aide nou pou enduré? Pareil couma pié flamboyant, nou kapav absorbe ek garde en stock sa de-l’eau la vie ki Parole Bondié donné-la. Nou bizin aussi attache-nou avek ‘nou roche,’ Jéhovah, ek so l’organisation aussi. (2 Samuel 22:3) Oui, pié flamboyant li enn joli pié ki rappel nou ki mem dan enn mauvais l’environnement, nou kapav garde nou la-force ek nou beauté spirituel, si nou konn profite tou seki Jéhovah donne nou. Si nou faire sa, nou pou “gagne bann promesse” ki Li finn faire, parmi ena promesse pou donne nou la vie eternel.—Hébreux 6:12; Révélation 21:4.