Kifer nou bizin koné kisannla ki l’antichrist?

Ena bien longtemps, l’apotre Jean ki ti inspiré par Bondié, ti ecrire: “Zot finn tann dire ki l’antichrist pé vini.” (1 Jean 2:18) Kan nou lire sa bann parole-la, enn quantité question vinn dan nou l’esprit, pa vrai? Pendant bann siecle, bann dimoune finn rod koné ki sa vedir. Kisannla ki l’antichrist? Kan eski li pou vini? Ki li pou faire kan li vini?

PENDANT tou sa bann l’année ki’nn passé-la, finn ena enn quantité dimoune ki finn gagne nom antichrist. Parmi finn ena bann Juif, bann lé-pape catholique, ek bann l’empereur romain. Par exemple, kan l’empereur Frédéric II (1194-1250) pa ti prend part dan enn “la-guerre saint” au nom l’Eglise, le pape Grégoire ti appel li l’antichrist ek ti excommunié li. Innocent, le pape ki ti remplace Grégoire, li aussi ti excommunié Frédéric. Lerla Frédéric li, li ti dire ki c’est Innocent ki l’antichrist.

Parmi bann ki’nn ecrire la Bible, zis l’apotre Jean ki servi mot “antichrist.” Dan deux parmi bann lettre ki li’nn ecrire, nou trouve sa mot-la cinq fois dan forme singulier ek pluriel toulé-deux. Dan l’encadré ki a coté, ena bann verset kot sa mot-la apparette. Sa bann verset-la montré nou ki l’antichrist li enn menteur ek enn kikenn ki trompe bann dimoune, ek tou seki li envie c’est detruire relation ki enn dimoune ena avek Christ ek avek Bondié. A cause sa, l’apotre Jean ti donne sa conseil-la so bann compagnon chrétien: “Mo bann frere ki mo bien content, pa croire tou parole inspiré, mais verifié bann parole inspiré pou guetté si vrai-mem zot sorti kot Bondié, parski beaucoup fausse prophete finn sorti dan le monde.”—1 Jean 4:1.

Jésus aussi ti donne enn l’avertissement kont bann ki pou trompe bann dimoune, setadir bann fausse prophete, kan li ti dire: “[Bannla] vinn kot zot habillé couma bann mouton, mais endan, zot couma bann loulou vorace. Par zot fruit [ou-soit par seki bannla faire] ki zot pou reconette bannla.” (Matthieu 7:15, 16) Eski Jésus ti pé aussi averti so bann disciple kont seki l’antichrist été lor plan symbolik? Anou guetté couma nou kapav koné kisannla ki pé trompe nou pou faire nou di-tort.