Eski Bondié interessé ar moi?

Bann reponse ki souvent nou tendé:

▪ “Bondié Li trop important pou Li tracasse-Li ar mo bann probleme.”

▪ “Mo pa pensé ki Bondié interessé ar moi.”

Ki Jésus ti dire?

▪ “Dimoune vann cinq moineau pou deux piece la monnaie ki ena enn tigit valeur, pa vrai? Pourtant Bondié pa blié enn sel parmi zot. Mais Li finn mem compte tou bann cheveux lor zot, zot la tête. Pa peur; zot vaut plus ki beaucoup moineau.” (Luc 12:6, 7) Li clair, Jésus ti enseigné ki Bondié Li interessé ar nou.

▪ “Alors, fodé jamais zot tracassé ek zot dire: ‘Ki nou pou mangé?’ ou-soit, ‘Ki nou pou boire?’ ou-soit, ‘Ki nou pou metté?’ C’est tou sa bann kitsoz-la ki bann nation pé faire tou pou gagné. Parski zot Papa ki dan le ciel, koné ki zot bizin tousala.” (Matthieu 6:31, 32) Jésus ti sur ki Bondié koné ki bann kitsoz nou bizin.

LA BIBLE montré dan enn fason clair ki Bondié Li interessé ar nou. (Psaume 55:22; 1 Pierre 5:7) Si Bondié interessé ar nou, kifer zordi nou passe par tou sa bann probleme-la? Si Bondié ena l’amour ek si Li tout-puissant, kifer Li pa faire kitsoz pou arrete souffrance?

Reponse sa bann question-la depann lor enn verité ki beaucoup dimoune pa koné—ki Satan le Diable chef sa mauvais le monde-la. Kan li ti tente Jésus, Satan ti offert li tou bann royaume dan le monde, li ti dire: “Mo pou donne toi tou sa pouvoir-la ek la gloire sa bann royaume-la, parski inn donne moi sa, ek mo donne sa kisannla mo envie.”—Luc 4:5-7.

Kisannla inn faire Satan vinn chef sa le monde-la? Kan nou premier parent, Adam ek Ève, ti obeir Satan ek ti refuse suive commandement Bondié, en realité, zot ti choisir Satan pou vinn zot chef. Depuis sa rebellion-la, Jéhovah avek patience inn laisse le temps passé pou montré ki domination Satan pa’nn reussi ditou. Jéhovah pa’nn force bann dimoune pou servi Li mais Li’nn donne nou l’occasion pou retourne vers Li.—Romains 5:10.

Parski Bondié interessé ar nou, li’nn prend bann disposition pou ki Jésus libere nou ar domination Satan. Dan enn l’avenir bien proche, Jésus pou “detruire sa kikenn ki ena pouvoir pou faire dimoune mort-la, setadir Satan le Diable.” (Hébreux 2:14) Kan li pou faire sa, li pou “detruire seki Satan finn faire.”—1 Jean 3:8.

Paradis pou retabli lor la terre. Lerla, Bondié “pou souye tou larme dan lizié [bann dimoune], ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant [pou’nn] disparette.”—Révélation 21:4, 5.a

[Note]

[Zimage lor page 8]

Paradis pou retabli lor la terre