Vinn proche ar Bondié

JUGES 2:11-18

EN TANT ki bann dimoune imparfait, parfois nou tou nou gagne bann regret. Par exemple, nou kapav ressenti enn chagrin apré ki nou’nn rann nou compte ki nou’nn faire enn erreur. Seki etrange c’est ki la Bible dire ki Jéhovah aussi kapav ena bann regret. Kitfois ou pou dire: ‘Mais Bondié, Li parfait, Li pa faire erreur!’ Alors, dan ki sens eski Bondié Li regretté? Reponse sa question-la kapav aide nou pou comprend enn kitsoz extraordinaire: Jéhovah ena bann sentiment, ek nou bann action kapav ena enn l’effet lor so bann sentiment. Anou guette bann parole ki trouve dan Juges 2:11-18.

Livre Juges ki trouve dan la Bible, raconte bann l’evenement ki ti passé pendant enn lepok difficile dan l’histoire Israël. Nation Israël ti’nn bien installé dan Canaan, la terre ki Bondié ti’nn promette Abraham. Pou faire enn resumé la vie nation Israël pendant plusieurs siecle ki’nn suive, nou kapav dire ki c’est enn cycle en quatre etape ki ti pé repeté a chaque fois: zot abandonne Bondié, zot bann l’ennemi faire dominere ar zot, zot suppliye Bondié, ek Bondié delivré zot.a

Zot abandonne Bondié. Parski zot ti influencé par bann Cananéen, bann Israélite “ti abandonne Jéhovah” ek zot ti commence suive lezot Bondié; surtout zot “ti commence servi Baal ek bann image Ashtoreth.”b Kan zot ti abandonne l’adoration Jéhovah dan sa fason-la, zot ti commette enn peché: l’apostasie. Li pa etonnant ki bann Israélite “ti offense Jéhovah,” sa Bondié ki ti’nn faire zot sorti l’Égypte-la!—Verset 11-13; Juges 2:1.

Zot bann l’ennemi faire dominere ar zot. Avek enn colere ki justifié, Jéhovah ti retire so protection lor so peuple ki ti vire lé-dos ar Li. Alors, bann Israélite ti tombe “dan la main zot bann l’ennemi,” ki ti prend zot pays ek kokin tou zot bann kitsoz.—Verset 14.

Zot suppliye Bondié. Letan zot ti dan bann grand difficulté, bann Israélite ti regrette zot bann mauvais conduite ek zot ti criyé vers Bondié pou gagne l’aide. Nou kapav trouvé ki zot ti pé suppliye Jéhovah kan nou lire l’expression “plaigné a cause bann ki ti pé faire dominere ar zot.” (Verset 18) Faire bann supplication envers Bondié ti forme partie dan sa cycle ki ti repeté a chaque fois-la. (Juges 3:9, 15; 4:3; 6:6, 7; 10:10) Couma Bondié ti reagir?

Bondié delivré zot. Jéhovah ti tann Israël plaigné ek Li “ti regretté.” Mot hébreu ki finn servi pou traduire “regretté” kapav vedir “change l’idée ou-soit l’intention.” Enn livre reference dire: “Parski bannla ti pé plaigné, Jéhovah ti senti Li poussé pou change so projet, au lieu Li envoye enn punition, Li ti delivré zot.” Dan so misericorde, Jéhovah ti “etabli bann juge,” ki ti pou delivré so peuple ar zot bann l’ennemi.—Verset 18.

Eski ou finn remarké ki ti pousse Bondié pou regretté, ou-soit change so l’idée? C’est kan bann Israélite ti change zot l’attitude. C’est coumadir enn bon papa ki discipline so zenfant ki pa pé obeir, kitfois kan li prive li enn certain kitsoz ki li content. Mais kan papa-la trouvé ki sa zenfant-la li vrai-mem chagrin pou seki li’nn faire, papa-la decide pou arrete so punition.

Ki sa recit-la aprann nou lor Jéhovah? Kan enn dimoune faire enn peché volontairement, sa mette Jéhovah en colere; mais kan bann dimoune repenti, sa pousse Li pou montré misericorde. Kan nou pensé ki nou bann action ena enn l’effet lor sentiment Jéhovah sa pousse nou pou reflechi. Kifer ou pa aprann couma ou kapav faire Jéhovah so “leker content”? (Proverbes 27:11) Jamais ou pou regretté.

[Notes]