Eski nou nepli koné ki sa vedir peché?

PA TROP longtemps dan le passé, bann dimoune ki ti al l’eglise souvent ti tann zot pretre condamne fort-fort lor l’estrade seki appel “ les sept peché capitaux ”—bann mauvais desir sexuel, mangé sans moderation, peng, paresse, la colere, l’envie, ek l’orgueil. Souvent, sa pretre-la ti montré bann mauvais consequence ki enn dimoune gagné kan li faire peché ek ti encourage bann ki ti pé ecoute li pou repenti. Enn ecrivain dire: “Azordi, [bann pretre] choisir pou pa koz lor bann sujet ki pou mette bann ki ecoute zot, mal a l’aise. Au contraire zot koz plus lor bann sujet ki pou faire bannla, ‘senti zot-mem bien.’ ”

Certain journaliste aussi finn remark sa mem tendance-la. Enba nou trouve deux-trois commentaire ki sorti dan bann journal:

▪ “[Bann pretre] nepli koz lor bann ancien categorie peché, repentance ek demann pardon. Asterla bann pretre servi enn langage ki faire di-bien bann dimoune, ek explik zot couma zot kapav augmente zot l’estime ek l’amour pou zot-mem.”—Star Beacon, Ashtabula, Ohio.

▪ “Bann dimoune nepli rann zot compte si ena peché ek nepli peur ki zot inn faire peché.”—Newsweek.

▪ “Nou nepli demann nou-mem: ‘Ki Bondié demann moi faire,’ mais plutot: ‘Ki Bondié kapav faire pou moi?’ ”—Chicago Sun-Times.

Parski zordi nou pé vive dan enn societé tolerant kot ena plusieurs culture, croyance, ek partie politik, alors bann dimoune hesité pou juge lezot lor plan moral. Dimoune considere sa couma enn kitsoz mal elevé pou juge moralité lezot. Li parette ki pli grand peché ki kapav existé c’est juge bann action enn dimoune. Alors bann dimoune raisonne coumsa: ‘Seki ou croire kapav parette bon pou ou, mais fodé pa ki ou essaye impose ou pensé lor lezot dimoune. Azordi, bann dimoune adapté zot la vie par rapport ar bann different principe moral. Personne pa kapav dire ki so principe moral ki bon. Bann principe moral lezot dimoune aussi bon pareil couma pou ou.’

Sa qualité raisonnement-la finn amenn bann dimoune pou change bann mot ki zot servi kan zot kozé. Azordi, li bien rare ki bann dimoune servi sa mot “peché-[la]” dan enn situation ki serieux. Pou beaucoup li finn vinn enn sujet ki comik. Dimoune nepli dire “pé vive dan peché,” zot pou zis dire “pé vive ensam.” Bann dimoune nepli dire zot “bann adultere”; mais zot dire “zot ena enn liaison.” Nepli dire bann “homosexuel”; mais zot prefere dire enn “lot fason vive.”

Pena doute ki seki bann dimoune disposé pou accepté couma “normal” ou-soit pou condamné couma enn “peché” finn changé. Mais kifer l’attitude bann dimoune finn changé? Ki finn arrive peché? Ek seki ou pensé lor la, eski li vrai-mem important?