Ki kitsoz beaucoup dimoune peur?

“Ou pa bizin enn croyant pou ou trouvé ki nou pé al vers enn grand catastrophe.”—STEPHEN O’LEARY, MAITRE DE CONFERENCE, DAN L’UNIVERSITÉ CALIFORNIE DU SUD.a

ESKI ou d’accord avek sa declaration ki ena la-haut-la? Sa serie lartik-la pou examine certain raison kifer bann dimoune peur pou l’avenir. Mais li pou montré nou aussi kifer nou kapav sur ki la vie lor la terre jamais pa pou disparette. Malgré bann kitsoz ki nou pou lire ki kapav bien bouleverse nou, ena bann bon raison pou nou reste positif.

Possibilité ki ena enn la guerre nucleaire, li bien réel. En 2007, Bulletin of the Atomic Scientists ti donne sa l’avertissement-la: “Jamais, depuis ki ti largue bann premier bombe atomik lor Hiroshima ek Nagasaki, le monde pa finn faire face ar bann choix dangereux coumsa.” Alors kifer bizin gagne tracas? Sa rapport-la dire ki en 2007, ti ena encore preské 27,000 zarme nucleaire ek ‘kapav active 2,000 ladan dan zis deux-trois minute.’ Si zis enn ti pourcentage sa bann zarme-la explosé, pou ena enn grand catastrophe!

Eski depuis sa, menace enn la guerre nucleaire inn diminué? L’Annuaire SIPRI 2009 dire ki toulé-cinq pli grand puissance nucleaire—l’Angleterre, l’Amérique, la Chine, la France ek la Russie—“pé soit servi bann nouveau systeme nucleaire ou-soit inn annoncé ki zot ena l’intention pou servi sa.”bc Mais sa livre-la dire ki pa zis sa bann pays-la ki ena zot prop zarme nucleaire. Bann ki faire recherche inn calculé ki l’Inde, Pakistan ek Israël, sakenn possede entre 60 ek 80 bombe nucleaire. Zot dire aussi ki dan le monde entier, ena en tou 8,392 zarme nucleaire ki en position ek ki pré pou lancé.

Changement climat kapav amenn enn grand catastrophe. Bulletin of the Atomic Scientists ki nou ti mentionné la-haut dire: “Bann consequence ki ena a cause changement climat, presente mem danger ki bann consequence ki bann zarme nucleaire kapav causé.” Bann grand scientifik, couma Stephen Hawking, professeur mathématique dan l’Université Cambridge, ki’nn retraité, ek Sir Martin Rees, directeur Trinity College dan l’Université Cambridge, zot aussi zot donne sa bann mem l’avertissement bien grave-la. Zot pensé ki parski dimoune pa finn bien konn servi technologie ek a cause bann changement ki bann dimoune finn faire dan l’environnement, sa kapav change la vie lor la terre ou-soit mem detruire civilisation net, ek pena nanyin ki kapav empeche sa.

Bann dimoune tracassé kan zot tann bann prediction lor enn grand catastrophe. Si ou al lor Internet ek ou tape phrase “la fin du monde” ek l’année 2012, ou pou trouve enn quantité page ki dire ki soi-disant la fin pé vini en 2012. Kifer zot dire sa? Dapré bann calcule, enn ancien calendrier Maya, ki appel “ le compte-long, ” supposé fini en 2012. Beaucoup dimoune peur attention ki, dan enn certaine fason, sa pé annonce la fin civilisation bann dimoune couma nou, nou koné.

Beaucoup croyant croire ki la Bible enseigné ki la terre kot nou pé resté pou detruire enn jour. Zot pensé ki tou bann fidele pou al dan le ciel alors ki le reste dimoune pou konn enn grand souffrance lor la terre kot tou pou devire enba la-haut ou-soit ki zot pou al dan l’enfer.

Mais, eski la Bible dire ki la terre entier pou detruire? L’apotre Jean ti donne sa l’avertissement-la: “Pa croire tou parole inspiré, mais verifié bann parole inspiré pou guetté si zot sorti kot Bondié.” (1 Jean 4:1) Au lieu ki ou zis croire seki lezot dire, kifer ou pa ouvert enn la bible ek guetté par ou-mem ki la Bible dire lor la fin du monde? Seki li enseigné kitfois kapav etonne ou.

[Notes]

[Zimage page 4]

Nuage atomik: U.S. National Archives photo; photo enn cyclone: WHO/League of Red Cross and U.S. National Archives photo