La priere

LA PRIERE. Pena beaucoup sujet biblik ki interesse bann dimoune ek faire zot envie konn plus couma la priere. Anou guette sept question ki bann dimoune souvent posé concernant la priere; ek apré anou examine ensam bann reponse ki la Bible donné. Sa bann lartik-la finn ecrire pou aide ou prié—pou commence prié ou-soit pou faire ou bann la priere vinn pli efficace.

PARTOUT dan le monde, dan tou culture ek religion, bann dimoune faire la priere. Zot prié kan zot tousel; zot prié en groupe. Zot prié dan bann l’eglise, bann temple, bann synagogue, bann mosquée, ek dan bann l’endroit sacré. Kitfois zot servi bann tapis pou faire la priere, bann chapelet, bann la roue kot finn ecrire bann la priere, bann zidole, bann livre la priere, ou-soit bann la priere ki finn ecrire lor bann tipti planche ki zot enpandan lor bann board.

La priere faire bann dimoune different ar tou lezot kitsoz ki ena la vie lor la terre. Li vrai, ena beaucoup kitsoz ki faire nou pareil avek bann zanimo. Pareil couma zot, nou bizin mangé, l’air, ek de l’eau. Pareil couma zot, nou né, nou vive ek nou mort. (Ecclésiaste 3:19) Mais zis bann dimoune ki prié. Kifer?

Kitfois, reponse pli simple c’est ki nou ena enn besoin pou prié. Apré tou, en general bann dimoune considere la priere couma enn fason pou zot gagne contact avek bann kitsoz spirituel, ki zot considere couma saint, ou-soit sacré ek eternel. La Bible montré ki nou finn crée avek enn desir pou sa bann kitsoz-la. (Ecclésiaste 3:11) Enn jour Jésus Christ ti dire: “Heureux bann ki reconette ki zot pauvre lor plan spirituel.”—Matthieu 5:3.

Bann dimoune “reconette ki zot pauvre lor plan spirituel”—sinon, couma nou pou kapav expliké kifer ena tou sa bann batiment ek objet religieux-la, ek tou sa le temps ki bann dimoune passé pou faire la priere-la? Bien sur, certain dimoune compte lor zot-mem ou-soit lor lezot dimoune pou satisfaire zot bann besoin spirituel. Mais eski ou pena sentiment ki bann dimoune zot trop limité pou aide lezot couma bizin? Nou tellement fragile, nou la vie courte, ek nou pa trouve seki pou arrivé dan l’avenir. Zis enn dimoune ki pli sage, ki pli puissant, ek ki vive pli longtemps ki nou, ki kapav donne nou seki nou bizin. Alors, ki sa bann besoin spirituel ki pousse nou pou prié-la?

Anou reflechi: Eski ou finn deja rod direction, sagesse ou-soit bann reponse pou bann question ki parette impossible pou gagné ar connaissance ki bann dimoune ena? Eski ou finn deja senti ki ou bizin reconfort kan ou ti pé souffert parski ou finn perdi enn kikenn ki ou content? Eski ou finn deja senti ki ou bizin direction kan ou ti ena pou prend enn decision bien difficile, ou-soit eski ou finn bizin ki pardonne ou parski ou finn senti-ou coupable ek sa ti bien affecté ou?

Dapré la Bible, tousala c’est bann bon raison ki nou ena pou prié. La Bible c’est livre lor ki nou kapav plus compté lor sa sujet-la, ek ladan ena enn quantité la priere ki beaucoup zom ek femme fidele inn faire. Zot ti prié pou gagne reconfort, direction, pardon, ek pou gagne bann reponse pou bann question bien difficile.—Psaume 23:3; 71:21; Daniel 9:4, 5, 19; Habaqouq 1:3.

Mem si sa bann la priere-la zot ti different, zot ti ena enn kitsoz en commun. Sa bann dimoune ki ti prié-la, zot tou ti konn enn kitsoz important pou ki zot la priere ecouté, enn kitsoz ki zordi bann dimoune dan le monde souvent pa koné ou-soit nepli prend compte. Sa bann dimoune ki la Bible mentionné-la, zot ti koné ar kisannla zot ti bizin prié.