Éden—L’endroit kot dimoune ti supposé vive?

MAZINÉ ki ou dan enn jardin. Pena nanyin ki pé derange ou, ek ou pa tann bann tapage la ville lot coté muraille. Jardin-la grand, ek pena nanyin ki troublé la paix ki ena la. En plus, seki pli bon c’est ki ou l’esprit trankil ek ou pena okenn tracas. Pena okenn maladie, allergie ou-soit douleur ki pé affecté ou lekor. Ou kapav tendé, trouvé, senti, touché, ek comprend tou seki ena autour ou.

Ou faire ou lizié content kan, d’abord, ou guette bann couleur vif bann fleur. Apré sa, ou trouve enn la riviere ki pé brillé ek apré, ou trouve tou qualité couleur vert bann feuille ek l’herbe kan soleil tapé ek kan ena l’ombrage. Ou ressenti enn ti la brise lor ou la peau ek ou senti bon parfum ki li amené. Ou tann bann feuille pé bougé, de l’eau ki pé tombe lor bann roche, bann zoiseau pé chanté ek son ki bann insecte faire kan zot pé travail. Eski ou pa ti pou content vive dan enn l’endroit coumsa?

Bann dimoune dan le monde croire ki au commencement bann dimoune ti vive dan enn l’endroit coumsa. Pendant plusieurs siecle, bann membre religion juif, la chretienté ek l’islam finn enseigne l’existence jardin Éden, kot Bondié ti mette Adam ek Ève pou vive. Dapré la Bible, zot ti ena enn la vie trankil ek heureux. Zot ti vive en paix avek zot camarade, avek bann zanimo ek avek Bondié, ki dan so bonté, ti donne zot l’espoir pou vive pou touletan dan sa joli l’environnement-la.—Genèse 2:15-24.

Bann hindou aussi ena zot prop fason pensée concernant enn paradis ki’nn existé bien longtemps. Bann bouddhiste croire ki bann grand chef spirituel, ou-soit bann bouddha, apparette dan bann lepok ki zot appel l’âge d’or, kot le monde li couma enn paradis. Ek beaucoup religion dan l’Afrique enseigne bann zistoire ki bien ressemblé zistoire Adam ek Ève.

En realité, nou kapav trouve l’idée concernant enn paradis lor la terre dan beaucoup religion ek tradition. Jean Delumeau, enn historien, ti ecrire: “Beaucoup civilisation ti croire dan enn paradis ki ti existé au commencement, kot ti ena perfection, liberté, la paix, bonheur, [tou kitsoz en] abondance, ek kot pa ti ena okenn pression, stress ek conflit. . . . Sa croyance-la finn reste dan conscience tou bann dimoune ek sa finn amenn zot pou ressenti enn grand tristesse pou paradis ki finn perdi, mais ki zot pa finn blié, ek zot ena enn grand desir pou retrouve sa.”

Eski li possible ki tou sa bann zistoire ek tradition-la ena enn sel racine? Eski li possible ki “conscience tou bann dimoune” influencé par enn kitsoz ki réel ki’nn reste dan zot memoire? Eski jardin Éden inn vrai-mem existé bien longtemps dan le passé? Eski Adam ek Ève inn vrai-mem existé?

Bann dimoune ki ena bann doute riyé kan zot tann sa bann question-la. Dan sa le monde kot la plupart dimoune croire dan la science-la, beaucoup considere sa bann recit-la couma bann zistoire ki’nn inventé. Seki etonne nou c’est ki mem bann dimoune ki croire dan la religion ena bann doute. Beaucoup chef religieux encourage bann dimoune pou pa croire dan jardin Éden. Zot dire ki sa jardin-la jamais inn existé ek ki sa recit-la, li zis enn zistoire ki’nn inventé, enn parabole.

Bien sur, dan la Bible ena bann parabole. Jésus li-mem ti dire bann pli grand parabole ki ena. Mais la Bible pa presente recit lor jardin Éden couma enn parabole, mais plutot couma enn kitsoz ki’nn vrai-mem arrivé dan l’Histoire. Alors, si bann l’evenement ki’nn passé dan jardin Éden jamais inn arrivé, couma eski nou kapav faire confiance lezot recit ki ena dan la Bible? Anou guetté kifer certain dimoune ena bann doute lor jardin Éden ek si bann raison ki zot donné, zot vrai-mem solide. Apré sa, nou pou guetté kifer sa recit-la concerne sakenn parmi nou.