Eski ou ti koné?
Couma bann chef religieux juif dan lepok Jésus ti considere bann ti-dimoune?
▪ Dan premier siecle nou lepok, bann dimoune ki ti ena enn grand position dan la societé ek bann chef religieux en Israël ti meprise bann ki pa ti ena enn grand l’education ou-soit bann ki pa ti ena okenn l’education. Bann Pharisien ti dire sa bann parole-la: “Sa la foule ki pa konn la Loi-la, zot bann dimoune maudit.”—Jean 7:49.
A part la Bible, bann lezot livre montré ki bann dimoune ki ti ena enn grand position dan la societé ek bann chef religieux, ti appel dan enn fason meprisant tou bann dimoune ki pa ti ena l’education, ’am ha’arèts, ou-soit “bann dimoune dan pays.” Au commencement, ti servi sa mot-la avek respé pou koz lor bann dimoune ki ti reste dan enn territoire precis. Parmi ti ena bann dimoune misere ek humble ek aussi bann dimoune ki ti ena enn grand position.—Genèse 23:7; 2 Rois 23:35; Ézékiel 22:29.
Mais selman dan lepok Jésus, ti servi sa mot-la pou qualifié dan enn fason meprisant bann dimoune ki certain ti considere couma bann ki pa ti konn la Loi mosaïk ou-soit ki pa ti reussi obeir dan tou ti detail tradition bann rabbin. Mishna (tou bann commentaire ki ti rassemblé ensam ek ti servi pou ecrire Talmud) averti bann dimoune pou zot pa reste dan lakaz bann ’am ha’arèts. Dapré The Encyclopedia of Talmudic Sages, Rabbi Meir, enn bibliste dan deuxieme siecle ti enseigné: “Kan enn missié ti marié so tifi avek enn am ha’arètz, c’est coumadir li ti attache li ek ti mette li devant enn lion ki monte lor so victime avant ki li devore li.” Talmud cite bann parole enn lot rabbin ki ti dire ki “bann dimoune ki pena l’education pa pou ressuscité.”
Ki signification nom César dan la Bible?
▪ César ti nom famille Caius Julius Caesar, ki ti enn Romain. Li ti vinn dictateur dan Rome en 46 a.n.l. Plusieurs empereur romain ki ti vini apré, ti choisir pou porte nom César. Parmi ena trois ki la Bible mentionné—Auguste, Tibère ek Claude.—Luc 2:1; 3:1; Actes 11:28.
Tibère ti vinn empereur en l’an 14 n.l., ek li ti gouverné pendant periode ki Jésus ti accompli so ministere. Sa vedir ki c’est li-mem ki ti César kan Jésus ti reponn enn question concernant taxe. Jésus ti dire: “Rann César bann kitsoz ki pou César, mais rann Bondié bann kitsoz ki pou Bondié.” (Marc 12:17) Pena doute, ki par so reponse Jésus pa ti faire reference zis ar Tibère. Au contraire, “César” represente l’autorité, ou-soit gouvernement.
Vers l’an 58 n.l., kan gouvernement romain ti juge l’apotre Paul dan enn fason injuste, li ti servi so droit en tant ki enn citoyen romain pou faire appel ar César. (Actes 25:8-11) Kan li ti faire sa, Paul pa ti demandé ki Néron, l’empereur sa lepok-la, juge li, mais plutot ki li passe devant pli grand la cour supreme l’empire romain.
Parski sa nom famille César-la finn associé ar bann le roi, mem apré ki lepok bann César inn fini, bann dimoune inn garde sa nom-la couma enn titre royal.
[Zimage page 30]
Enn denier en argent kot ena zimage Tibère