Li pratik pou nou lepok
“To parole li enn la lampe pou mo lipié, ek enn la lumiere pou mo chemin.”—PSAUME 119:105.
COUMA ESKI LA BIBLE LI DIFFERENT? Certain livre zot consideré couma bann publication extraordinaire, mais zot pas approprié pou donne enn direction dan la vie. Ek chaque fois bizin faire bann changement dan bann livre ki donne conseil pou nou lepok. Parkont, la Bible dire ki “tou bann kitsoz ki finn ecrire longtemps finn ecrire pou nou l’instruction.”—Romains 15:4.
ENN L’EXEMPLE: Mem si la Bible li pa enn livre medical, li donne bann suggestion pratik lor plan affectif ek physik. Par exemple, li dire ki “enn leker calme li la vie pou lekor.” (Proverbes 14:30) La Bible donne aussi sa l’avertissement-la: “Enn kikenn ki reste dan so coin li tousel, pou rod so prop desir egoïste; li pou resisté kont la sagesse ki pratik.” (Proverbes 18:1) Parkont, li dire ki “ena plus bonheur kan donné ki kan recevoir.”—Actes 20:35.
KI BANN RECHERCHE MONTRÉ: Kan enn dimoune li calme, li ena bann l’amitié solide, ek li genereux, sa kapav ameliore so la santé. The Journal of the American Medical Association dire: “Bann dimoune ki explosé ar colere ena deux fois plus risk pou gagne enn attak cerebral ki bann dimoune ki maitrise zot colere.” Dapré enn l’etude ki’nn faire pendant dix an en Australie, finn trouvé ki bann dimoune agé ti ena plus chance pou vive pli longtemps kan zot ti ena “plus contact avek zot bann camarade ek avek bann dimoune ar ki zot ti confié-zot-mem.” Ek en 2008, bann Canadien ek bann Américain ki ti faire bann recherche ti aprann ki “kan enn dimoune depense kass pou lezot, sa donne li plus la joie ki kan li depense kass pou li-mem.”
KI OU PENSÉ? Eski ou pou faire confiance ar bann conseil lor la santé ki trouve dan n’importe ki livre ki finn completé inn gagne preské 2,000 an? Ou-soit eski c’est zis la Bible ki coumsa?
[L’encadré page 8]
“La Bible extra interesse moi . . . parski ena bann conseil extraordinaire lor la santé ladan.”—HOWARD KELLY, M.D., KI TI PARMI BANN PREMIER DIMOUNE KI TI MEMBRE THE JOHNS HOPKINS UNIVERSITY SCHOOL OF MEDICINE