Zot pena mem droit
“Kan mo trouve fason ki traite bann femme, mo pa envie vinn grand.”—ZAHRA, 15 AN, ki cité dan magazine GÉO, en français.
BANN parole ki sa jeune tifi-la ti dire ek ki nou trouvé a droite, montré enn realité bien triste—partout dan le monde, violence ek discrimination affecté bann tifi ek bann femme toute longue zot la vie. Anou guette certain fait:
Preference pou gagne garson. Dan l’Asie, la plupart parent prefere bann garson plutot ki bann tifi. En 2011, enn rapport ki l’Organisation Nation uni ti faire dan sa partie le monde-la, ti montré ki apepré 134 million femme disparette dan population a cause l’avortement, touye bann ti-baba ki fek né, ek a cause negligence.
L’education. Dan le monde, parmi bann ki’nn al lekol moins ki quatre an, deux tiers ladan c’est bann femme ek bann tifi.
Harcelement sexuel. Plus ki 2.6 milliard femme vive dan bann pays kot la loi pa considere enn missié marié ki viole so madame, couma enn cas ki merite condamnation.
La santé. Dan bann pays en developpement, environ chaque deux minute, enn femme mort a cause so grossesse, ou-soit a cause bann complication ki li gagné kan li accouché parski pena bann soin medical necessaire.
Droit proprieté. Mem si c’est bann femme ki travail dan plus ki la moitié bann plantation dan le monde, dan beaucoup pays la loi pa donne zot droit pou ena zot prop la terre ou-soit pou herite enn la terre.
Kifer finn empeche bann femme gagne sa bann droit important-la? Ena certain culture ki suive bann croyance ek bann pratik religieux ki encourage ek mem justifié ki maltraite ek agir dan enn fason violent avek bann femme. Enn journal français ti ecrire seki enn avocat indien, ki appel Chandra Rami Chopra, ti dire: “Tou bann la loi religieux ena enn kitsoz ki pareil: zot soutenir discrimination envers bann femme.”
Eski ou pense pareil? Eski ou pensé ki la Bible abaisse bann femme pareil couma beaucoup lezot livre religieux faire? Pou certain, li parette ki ena deux-trois verset la Bible ki donne sa l’impression-la. Mais couma Bondié ki finn faire ecrire la Bible considere bann femme vrai-mem? Mem si sa sujet-la kapav bien sensible pou beaucoup dimoune, si nou examine bien ek dan enn fason honnete seki la Bible dire lor la, sa kapav aide nou pou gagne enn reponse pou sa question-la.