Pierre ek Ananias Ti Koz Menti​—Ki Leson Nou Kapav Aprann?

Couma to koné, koz menti c’est dire enn kitsoz ki to koné fausse. Eski to’nn deja koz menti?​—a Mem certain adulte ki content Bondié inn deja koz menti. Kitfois to konn enn dimoune dan la Bible ki ti koz menti. So nom c’est Pierre ek li enn parmi bann 12 zapotre Jésus. Anou ecoute enn zistoire ki pou montré nou kifer parfois li ti koz menti.

Inn arrete Jésus. Ek bann ki’nn arrete li, amenn li kot grand pretre. Inn arrive bien tard au milieu la nuit. Pierre rente dan la cour grand pretre sans ki lezot reconette li. Mais dan lekleraz enn difé ki pé allumé, servante grand pretre ki’nn laisse Pierre rentré reconette li. Li dire: “To’si to ti avek Jésus.” Pierre dan so la peur dire ki li pa ti avek Jésus.

La Bible dire ki plitar “enn lot tifi ti remark li.” Tifi-la dire: “Sa zom-la ti avek Jésus.” Ankor enn fois, Pierre dire ki li pa ti avek Jésus. Apré enn ti moment, lezot dimoune vinn vers Pierre ek dire: “Pena doute, to’si to enn parmi zot.”

Pierre gagne peur. Alors pou enn troisieme fois, li koz menti ek li dire: “Mo pa konn sa zom-la!” Enn coq chanté. Jésus guette Pierre, ek Pierre rappel ki deux-trois ler temps avant Jésus ti dire li: “Avant ki enn coq chanté, to pou renié moi trois fois.” Pierre pa kapav tini ek li commence ploré. Li bien triste!

Eski enn kitsoz coumsa kapav arrive toi?​— Kitfois dan lekol to tann bann zenfant pé koz lor bann Témoins de Jéhovah. Enn dire: “Zot pa salué pavillon.” Enn lot ajouté: “Zot pa la guerre pou zot pays.” Enn lot ankor dire: “Zot pa vrai-mem bann Chretien parski zot pa faire Noël.” Apré sa, enn guette toi ek demandé: “Eski to pa enn Témoin de Jéhovah, toi?” Ki to pou dire?​—

Avant ki enn kitsoz coumsa arrivé, to bizin prepare-toi pou donne enn bon reponse. Pierre pa ti prepare-li. Alors, kan lezot inn mette pression lor li, li’nn koz menti! Mais, li ti bien chagrin ar seki li’nn faire, ek Bondié ti pardonne li.

Ananias, enn lot disciple Jésus ki ti vive dan premier siecle, ti aussi koz menti. Mais Bondié pa ti pardonne ni li ni so madame, Sapphira. Sapphira ti tombe d’accord avek so missié pou koz menti. Anou guetté kifer Bondié pa ti pardonne Ananias ek Sapphira.

Dix jour apré ki Jésus ti quitte so bann zapotre ek ti retourne dan le ciel kot Bondié, environ 3,000 dimoune ti baptisé dan Jérusalem. Beaucoup ti sorti dan bann pays bien loin pou vinn celebré la Pentecôte, ek apré ki zot ti vinn bann disciple Jésus, zot ti envie reste pli longtemps pou aprann plis lor zot nouveau croyance. Alors, certain parmi bann disciple Jésus ti servi zot l’argent pou aide sa bann nouveau disciple-la.

Ananias ek so madame vann enn partie zot di-bien pou gagne kass pou aide sa bann ki’nn fek baptisé-la. Kan Ananias donne bann zapotre sa l’argent-la, li dire ki c’est tou kass ki li’nn gagné ar sa la vante-la. Mais li pé koz menti! Li’nn garde enn partie sa kass-la pou li-mem! Bondié faire Pierre konn sa, alors Pierre dire Ananias: “C’est pa bann dimoune ki to’nn rod trompé, mais Bondié.” Kan li tann sa, Ananias tombe en-bas ek mor! Environ trois heure temps apré, so madame vini. Sans ki li koné ki’nn arrive so missié, li’si li koz menti ek li tombe en-bas ek li mor.

C’est enn grand leson pa vrai! Li important ki nou dire la verité! Oui, nou tou nou bizin aprann sa leson-la! Pourtant, nou tou nou pou faire bann erreur, surtout kan nou jeune. Eski sa pa faire toi plaisir ki Jéhovah content toi ek Li pou pardonne toi pareil couma Li ti faire avek Pierre?​— Mais rappel ki nou bizin dire la verité. Ek si li arrivé ki nou koz menti, nou bizin, oui, nou bizin suppliye Bondié pou pardonne nou. Surement, c’est sa-mem ki Pierre ti faire, ek Bondié ti pardonne li. Si nou faire bann grand zeffort pou arrete koz menti, Bondié pou pardonne nou’si!