Bondie Kapav Resanti Lapenn​—Kouma Nou Kapav Fer So Leker Kontan?

Eski to’nn deza gagn enn douler telman for ki to’nn plore?—a Kitfwa nou tou pou reponn wi. Selman, parfwa nou kapav gagn bann douler, pa parski nou’nn gagn dimal. Me parski enn kikenn kitfwa inn dir bann move kitsoz ki fos lor nou. Sa osi kapav fer nou lapenn, pa vre?— Bondie osi resanti lapenn kan bann dimounn koz manti lor Li. Anou gete kouma nou kapav fer Bondie so leker kontan olie ki nou fer Li lapenn.

Labib dir ki sertin dimounn ki ti dir zot kontan Bondie ti “fer Li lapenn.” Wi, “zot ti fer [Bondie] lapenn!” Biensir, personn pa kapav fer Jéhovah gagn dimal. Limem Tou-Pwisan. Alor, anou gete kifer Jéhovah resanti lapenn kan nou pa fer seki Li demann nou.

De premie dimounn ki Jéhovah ti kree lor later ti fer Li boukou lapenn. Jéhovah ti met zot dan enn paradi lor later ki ti apel “zardin Éden.” Ki sa de dimounn-la sa?— Wi, Bondie ti kree Adam ek enn tipe apre, Li ti kree Ève. Les nou gete kouma zot inn arive fer Jéhovah lapenn.

Apre ki Jéhovah ti met zot dan zardin Éden, Li ti demann zot pou okip sa zardin-la. Li ti osi dir zot ki zot ti pou kapav gagn bann zanfan ek zot tou ti pou kapav viv ansam dan sa zardin-la, san ki zot mor. Me avan ki Adam ek Ève ti gagn bann zanfan, enn move kitsoz ti arive. Eski to kone ki ti arive?— Enn anz ti pous Adam ek Ève pou rebel kont Jéhovah. Anou gete kouma sa ti pase.

Anz-la ti servi enn serpan ek ti fer krwar ki se serpan-la ki ti pe koze. Ève ti kontan seki li ti tande​—serpan-la ti dir ki Ève pou vinn parey “kouma Bondie.” Alor Ève ti fer seki serpan-la ti dir. Eski to kone ki li’nn fer?—

Ève ti manz frwi sa pie ki Jéhovah ti defann zot pou manze la. Avan ki Bondie ti kree Ève, Li ti dir Adam: “To kapav manz frwi tou bann pie ki ena dan zardin, kantite ki to anvi. Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.”

Ève ti konn sa lalwa-la. Malgre sa, li ti kontign get sa pie-la, ek li ti trouve ki frwi sa pie-la “ti bon pou manze ek pie-la ti enn kitsoz ki so lizie ti anvi kontign gete . . . Alor, li ti pran so frwi ek li ti manze.” Plitar li ti donn sa frwi-la Adam, ek “li ti manze.” Kifer to panse Adam ti fer sa?— Parski li ti kontan Ève plis ki Jéhovah. Li ti swazir pou fer plezir so madam olie fer plezir Bondie. Me li pli inportan pou obeir Jéhovah ki obeir enn dimounn!

Eski to rapel sa serpan ki ti koz avek Ève la? Parey kouma enn dimounn kapav fer krwar ki enn maryonet pe koze, enn kikenn ti fer krwar ki sa serpan-la ti pe koze. An realite, kisannla ti pe koze?— Se “sa serpan orizinel-la, ki apel Diab ek Satan.”

Eski to kone kouma to kapav fer Jéhovah kontan?— To kapav fer sa kan touletan to esey fer Li plezir. Satan dir ki li kapav pous tou dimounn pou fer bann kitsoz ki li anvi zot fer. Me, Jéhovah ankouraz nou: “Vinn saz mo garson [ouswa mo tifi], ek fer mo leker kontan, pou ki mo kapav reponn sa kikenn ki pe provok mwa la.” Satan provok Jéhovah. Li dir ki li kapav detourn tou dimounn pou fer zot aret servi Jéhovah. Alor, to pou fer Jéhovah kontan kan to obeir Li ek kan to servi Li! Eski to pou fer bann zefor pou fer sa?—