REPONS POU BANN KESTION BIBLIK

Eski Labib vremem Parol Bondie?

Kitfwa ou atann ki pena enn lot liv kouma Parol Bondie, ek se seki nou kapav dir lor Labib. Plizir milyon kopi Labib finn inprime dan plizir santenn lang. Sazes ki ena dan Labib, ena pouvwar pou fer bann dimounn vinn meyer.​—Lir 1 Thessaloniciens 2:13; 2 Timothée 3:16.

Nou kone ki Labib sorti kot Bondie parski li predir lavenir dan enn fason exakt. Okenn dimounn pa kapav fer sa par limem. Get par exanp liv Isaïe. Ti dekouver enn kopi sa liv-la, ki ti ekrir plis ki enn siek avan nesans Jésus, dan enn lakav pre ar la Mer Morte. Sa liv-la ti dir ki Babylone ti pou vinn enn lavil kot dimounn pou nepli reste. Sa ti realize plizir lane apre minister Jésus lor later.​—Lir Isaïe 13:19, 20; 2 Pierre 1:20, 21.

Kouma inn ekrir Labib?

Finn ekrir Labib lor enn peryod apepre 1,600 an. Ti ena anviron 40 zom ki’nn ekrir Labib, ek zot inn ekrir lor enn sel tem san ki zot kontredir zot kamarad. Kouma sa ti posib? Bondie ti diriz zot pou ekrir Labib.​—Lir 2 Samuel 23:2.

Parfwa Bondie ti koz ar bann ekrivin Labib atraver bann anz, bann vizion, ouswa bann rev. Souvan, Bondie ti met so lide dan lespri ekrivin-la ek Bondie ti les li swazir bann mo ki li ti pou servi pou exprim mesaz Bondie.​—Lir Révélation 1:1; 21:3-5.