Ki ena demal avek bann koutim Nwel?

Depi lontan, bann dimounn dir ki Nwel se enn fet Kretien ek ki fer sa fet-la pou selebre nesans Zezi. Ena boukou koutim ki ena enn rapor avek sa fet-la. Me sertin demann zotmem, ki lien sa bann koutim-la ena avek nesans Zezi.

Pou koumanse, anou get koutim Bonom Nwel. Bonom Nwel se enn personaz bien zwaye, ki ena enn labarb blan, bann lazou roz, ek enn linz rouz. Ti kree sa personaz-la pou enn piblisite Nwel an 1931 pou enn konpagni labwason dan l’Amérique du Nord. Sa piblisite-la ti gagn bann gran sikse. Dan bann lane 1950, sertin Brezilien ti esey ranplas Bonom Nwel avek enn lot personaz ki bann dimounn dan Brésil bien kone​—Granper Inka. Ki rezilta sa finn ena? Bonom Nwel finn ena plis sikse ki Granper Inka. Anplis, Profeser Carlos E. Fantinati dir ki li finn mem ena “plis sikse ki ti Zezi ek li’nn vinn reprezantan ofisiel sa fet-la le 25 Desam.” Me apart Bonom Nwel, eski ena lezot koutim ki ena enn rapor avek fet Nwel? Pou gagn sa repons-la, anou retourn dan lepok bann premie Kretien.

Encyclopedia Britannica dir ki pandan de premie siek Nou Lepok, “bann premie Kretien pa ti dakor ditou ki selebre laniverser nesans bann martir ouswa, dan sa ka-la, laniverser nesans Zezi.” Kifer? Parski bann Kretien ti konsider laniverser nesans kouma enn koutim payin, enn koutim ki zot pa ti bizin swiv. Dayer okenn plas dan Labib pa mansionn dat nesans Zezi.

Mem si bann premie Kretien pa ti dakor ki selebre laniverser nesans, dan katriem siek Nou Lepok, Legliz Katolik ti koumans selebre Nwel. Legliz ti anvi vinn pwisan. Pou fer sa, li ti bizin tir enn obstak prinsipal ki ti pe met baton dan so larou​—popilarite bann relizion Romin ek zot bann fet liver. Dan so liv Nwel dan l’Amérique (an Angle), Penne L. Restad dir ki sak lane, apartir 17 Desam ziska 1^e Zanvie “laplipar bann Romin ti fer fet, zwe, amize, fer bann defile, ek partisip dan lezot fet pandan ki zot rann omaz zot bann bondie.” Ek le 25 Desam, bann Romin ti selebre nesans Soley Invinsib. Kan legliz ti etabli fet Nwel sa zour-la, li ti konvink boukou Romin pou selebre nesans Zezi olie nesans soley. Dan so liv Bonom Nwel, enn Biografi (an Angle), Gerry Bowler dir ki bann Romin “ti ankor kapav swiv tradision sa bann fet ki ti pe fer omilie liver la.” Ofet, zot “ti pe selebre bann nouvo fet me zot ti pe gard bann ansien koutim.”

Alor problem ki ena avek fet Nwel se lorizinn so bann koutim. Dan so liv Lalit pou Fer Nwel (an Angle), Stephen Nissenbaum dir ki fet Nwel se “sinpleman enn fet payin kot inn pas enn kous verni pou fer li paret enn fet Kretien.” Akoz sa, fet Nwel pa donn loner Bondie ek so Garson, Zezi. Eski se enn kitsoz banal? Labib poz sa bann kestion-la: “Kouma seki drwat kapav fer partner ar seki move? Oubien, kouma lalimier kapav asosie li ar teneb?” (2 Korintien 6:14) Parey kouma tron enn pie ki’nn pous traver, fet Nwel inn telman deforme ki “pa kapav dres” li.​—Ekleziast 1:15.