Anou partage nou l’esperance lor Royaume Bondié avek lezot
1 Dan sa bann dernier jour ki critik-la, beaucoup dimoune dan le monde, zot desesperé. (Éph. 2:12) Lezot finn mette zot confiance dan bann richesse materiel, dan bann dirigeant humain, dan la science moderne, etc., sans reflechi. Mais nou, nou vrai-mem heureux pou ena enn vrai l’esperance pou l’avenir, enn l’esperance ki “couma enn l’ancre bateau pou nou nâme, ki sur ek en mem temps ki solide”!—Héb. 6:19.
2 Kan Bondié pou dirigé a travers so Royaume, la terre pou transformé ek pou vinn enn paradi. Bann ki nou content mais ki’nn mort pou ressuscité. (Actes 24:15) La pauvreté, l’injustice, maladie, vieillesse, ek la mort nepli pou existé. (Ps. 9:18; Mat. 12:20, 21; Rév. 21:3, 4) Sa c’est zis dé-trois promesse ki Jéhovah finn faire ki pou realisé bientot. Ki partie dan nou l’esperance eski ou pé attann avek impatience?
3 Annonce bann bon nouvel: Fodé pa ki nou garde l’esperance lor Royaume Bondié zis pou nou. L’amour pou Bondié ek pou nou prochain pousse nou pou imite Jésus ek “pou annonce bann bon nouvel ar bann pauvre, . . . pou preche avek bann prisonnier ki zot pou liberé ek bann aveugle ki zot pou retrouve clair, pou libere bann ki souffert.” (Luc 4:18) L’apotre Paul aussi ti preche la bon nouvelle dan bazar ek partout kot ti ena dimoune. Li ti bien occupé ar so ministere. (Actes 18:5) Si nou imite zele ki li ti ena dan so ministere, sa pou empeche “bann tracas ki ena dan sa lé-monde-la ek pouvoir ki la richesse ena pou embete dimoune” affaibli nou l’esperance chretien.—Marc 4:19.
4 L’esperance ki nou ena dan Royaume Bondié pa affaibli kan nou joinde bann dimoune ki indifferent, ki pa montré enn grand l’interet pou message lor Royaume Bondié, ou-soit ki completement opposé ar nou message. Nou “tini ferme declaration publik nou l’esperance sans ballotté.” (Héb. 10:23) Nou pa “honté a cause la bonne nouvelle.” (Rom. 1:16) Kan certain dimoune trouve nou conviction ek nou perseverance, sa kapav pousse zot pou ecoute nou.
5 Mem si li bon ki nou montré couma bann prophetie la Bible pé realisé concernant bann condition dan lé-monde ki pé degradé, selman nou pa bann predicateur ki annonce malheur. Au contraire, nou ministere mette l’accent lor l’esperance Royaume Bondié—c’est sa la bonne nouvelle lor Royaume Bondié. Anou preche sa bon nouvel-la avek conviction ek zele ‘pou ki ziska la fin, nou pena okenn doute concernant nou l’esperance.’—Héb. 6:11.